InfoHub Logo

«پەداگوگ مارتەبەسى تۋرالى» زاڭ قابىلدانعاننان كەيىن دە وعان وزگەرتۋلەر ەنگىزەتىن كەز كەلەدى. بۇل تۋرالى بۇگىن ق ر ءبىلىم جانە عىلىم ءمينيسترى اسحات ايماعامبەتوۆ ايتتى.

«تاعى ءبىر ماڭىزدى باستاما، كوپتەن بەرى كوتەرىلىپ جۇرگەن پروبلەما — كوللەدج مۇعالىمدەرىنىڭ كاتەگوريالارىنا ۇستەماقى تولەۋ. ون جىل بويى كوللەدجدە ىستەيتىن مۇعالىمدەر وسى پروبلەمانى كوتەرىپ ءجۇر. شىن مانىندە بۇل وتە وزەكتى جانە ديرەكتورلارى مەن ولاردىڭ ورىنباسارلارىنىڭ، اسكەرلەردىڭ دە جالاقىسى تومەن. ولار وزدەرىنىڭ بىلىكتىلىگىنە سايكەس بۇگىنگى تاڭدا ۇستەماقى الىپ وتىرعان جوق. سوندىقتان، وسى زاڭ جوباسى اياسىندا وسى ماسەلەنى شەشۋدى دە قاراستىرىپ وتىرمىز. بىرىنشىدەن، وسى ارىپتەستەرىمىز ەڭبەكاقىسى ەكى ەسە كوتەرىلەتىن باسقا دا ۇستازدار ىشىنە كىرىپ وتىر. ەكىنشىدەن، وزدەرىنىڭ كاتەگورياسىنا سايكەس، 30-دان 50-پايىزعا دەيىن ءتيىستى ۇستەماقىسىن الادى»، — دەدى ق ر پارلامەنتى ءماجىلىسىنىڭ جالپى وتىرىسىندا «پەداگوگ مارتەبەسى تۋرالى» زاڭ جوباسىن تانىستىرعان مينيستر.

ونىڭ اتاپ وتۋىنشە، پەداگوگتەردى ماتەريالدىق ىنتالاندىرۋلار قارجىمەن تولىق قامتاماسىز ەتىلگەن. جالپى بەس جىلعا وسى نورمالاردى جۇزەگە اسىرۋ ءۇشىن 5،3 ترلن تەڭگە بەرىلەدى.

«دەپۋتاتتار بۇل ماسەلەنى وزدەرى كوتەرىپ، قولداپ، «بيۋدجەت تۋرالى« زاڭدا قاراستىرعان بولاتىن. جالپى، زاڭ جوباسى اياسىندا ءمۇعالىم مارتەبەسىن ارتتىرۋ ماسەلەسى عانا ەمەس، ءبىلىم سالاسىنىڭ ساپاسىن كوتەرۋ ماسەلەسى دە شەشىلەدى. بۇگىنگى وتىرىستى پايدالانا وتىرىپ، ەلىمىزدىڭ بارلىق مۇعالىمدەرىنىڭ اتىنان جانە جەكە ءوز اتىمنان الەۋمەتتىك-مادەني دامۋ كوميتەتىنىڭ مۇشەلەرىنە، جۇمىس توبىنىڭ مۇشەلەرىنە ءبىزدىڭ زاڭ جوبالارىمىز بويىنشا اۋقىمدى جۇمىستارىڭىز ءۇشىن العىس بىلدىرەمىز. ءبىز قاراستىرماعان نورمالار بويىنشا ۇسىنىستار ءتۇسىپ جاتىر جانە جۇمىس ىستەپ جاتىرمىز. ەڭ باستىسى بۇل — قۇقىقتىق نەگىز بولاتىن زاڭ. ءالى دە زاڭدى جەتىلدىرۋگە بولادى. مەملەكەتتىڭ دامۋىنا بايلانىستى مۇعالىمدەردىڭ جاعدايىن جاقسارتۋ ءۇشىن بولاشاقتا ءتيىستى وزگەرىستەر ەنگىزەتىن كەز كەلەتىن شىعار دەپ ويلايمىن»، — دەدى اسحات ايماعامبەتوۆ.

---