...سودان بەرى شىنىممەن جىلامادىم،
ءسۇرىندىم عوي، قويشى ونى، قۇلامادىم.
كوزىڭ نۇرسىز دەيسىڭ سەن ولدە ءازىلىڭ،
الدە ءبىر شىنىڭمەن-اق سىناعانىڭ
ونىڭ راس، نەسىنە قىنجىلامىن،
نۇرسىز كوزدىڭ كورسەڭشى تۇنجىراۋىن.
جانارىمنىڭ جارتىسى اعىپ كەتكەن،
سەبەبى، ءبىر-اق رەت شىن جىلادىم.
...اتتاندى اكەم جاۋ تۋىن قۇلاتۋعا،
قۋات بەرسىن، جەتسىن ءبىر مۇراتىنا.
جەلە جورتىپ، ارتىنان ىلەستىم مەن،
قونىپ الىپ اكەمنىڭ قۇلا اتىنا.
اقپان ەدى، بۇرىككەن ۇسكىرىگىن،
شىرىلداتىپ بۇرقاسىن ىسقىرىعىن.
ەس بىلگەلى ەڭ العاش جىلاعانىم،
كەشىرگەيسىڭ، ەسىمە ءتۇستى بۇگىن.
جىلايىن دەپ وندا مەن جىلامادىم،
شىدامادىم، قايتەيىن، شىدامادىم،
الپامىستاي اكەمنىڭ وكىرىپ كەپ،
كورىپ قالدىم شانادان قۇلاعانىن.
بولسام-داعى تۇڭعىشى، شولدەگەنى،
ماڭدايىمنان يىسكەپ كورمەپ ەدى.
وكىرىپ كەپ، ايمالاپ، جىلاپ جاتىر،
تىك كوتەرىپ قويدى دا جەرگە مەنى.
ءوزى كۇيرەپ جاتقاندا شاڭىراعىم،
شىنىمەنەن سوندا مەن اڭىرادىم.
وكىرگەندە تاۋ تۇردى كۇڭىرەنىپ،
سونداعى اكە، قازىرگى ارۋاعىم.
قاۋىم كەلىپ، قاۋمالاپ، الىپ كەتكەن،
قاپ-قاراڭعى دۇنيە، جارىق كەتكەن.
كوزىڭ نۇرسىز دەيسىڭ سەن،
سوندا مەنىڭ،
جانارىمنىڭ جارتىسى اعىپ كەتكەن...

---