لۋنا-9 عارىش كەمەسى
لۋنا-9 — اي بەتىنە جۇمساق قونعان الەمدەگى تۇڭعىش عارىش كەمەسى.
ول ايعا اۆتوماتتى اي ستانسياسىن (ااس) جەتكىزدى. ااس العاش رەت اي بەتىنىڭ تەلەپانوراماسىن ءتۇسىرىپ، ونى جەرگە ترانسلياسيالادى.
لۋنا-9 ستانسياسىنىڭ ۇزىندىعى 2،7 مەتر، ال اۆتوماتتى اي ستانسياسىنىڭ ديامەترى 58 سانتيمەتر بولدى. ااس ەكى جاعىنان ونى قورعايتىن امورتيزاتورلىق باللوندار ورناتىلعان ەدى، ءتورت انتەنناسى قونعاننان كەيىن اۆتوماتتى تۇردە اشىلاتىن. ااس اككۋمۋلياتورمەن، تەمپەراتۋرانى رەتتەۋ جۇيەسىمەن، راديولىق، باعدارلامالىق جانە عىلىمي قۇرىلعىلارىمەن جابدىقتالعان ەدى.
بۇعان دەيىن اي بەتىنە جۇمساق قونۋعا باعىتتالعان كەڭەس وداعىنىڭ 12 عارىش كەمەسى ءساتسىز ۇشىرىلعان بولاتىن. لۋنا باعدارلاماسىن جۇزەگە اسىرۋدى باستاعان وكب-1 كەيىنگى جۇمىستارىن لاۆوچكين اتىنداعى كونسترۋكتورلىق بيۋروعا تاپسىردى. جاڭا بيۋرو نەگىزىنەن امورتيزاتورلاردىڭ ساپاسىن جانە قوسىلۋىن رەتتەيتىن وزگەرىستەردى ەنگىزىپ، باعدارلامانى جالعاستىردى.
1966 جىلدىڭ 31 قاڭتارىندا ساعات 14:41:37 (UTC+3) لۋنا-9 بايقوڭىردان ۇشىرىلدى.
3 اقپاندا ساعات 21:44:52 (UTC+3) اپپارات ايعا قوندى. بۇل تاريحي وقيعا داۋىلدار مۇحيتىندا، كاۆالەري كراتەرىنىڭ سولتۇستىك-شىعىسىندا ورىن الدى.
ااس-پەن 8 ساعاتتان ارتىق جالعاسقان 7 بايلانىس سەانسى وتكىزىلدى. ول اي بەتىنىڭ پانورامالىق سۋرەتتەرىن ءتۇسىرىپ، ونى جەرگە جىبەردى. ءار پانوراماسىنىڭ جەتۋىنە 100 مينۋتتاي ۋاقىت كەتەتىن.
ۇشىرۋ ايى جانە كۇنى: 1966 جىل، 31 قاڭتار، بايقوڭىر قالاسى.
You Might Also Like
-
قازاقستان رەسپۋبليكاسىنىڭ تۇڭعىش كونستيتۋسياسىنىڭ قابىلدانعانىنا 30 جىل.
-
“دالا ءۋالاياتىنىڭ گازەتى” 1888 جىلدىڭ 1 قاڭتارىنان باستاپ 1902 جىلدىڭ 12 ساۋىرىنە دەيىن جارىق كورىپ تۇرعان. “دالا ءۋالاياتىنىڭ گازەتى” پاتشا ۇكىمەتىنىڭ ورگانى بولعانىمەن، قازاق...
