InfoHub Logo

پەداگوگتار مەن اتا-انالار Kundelik.kz جۇيەسىمەن جۇمىس ىستەۋ كۇردەلى ەكەنىنە شاعىمدانۋدا. بۇل تۋرالى ق ر ۇكىمەت باسشىسىنىڭ ورىنباسارى ەربولات دوسايەۆقا جولداعان ساۋالىندا دەپۋتات ايزادا قۇرمانوۆا ايتتى.

 «جاقىندا ءبىلىم جانە عىلىم مينيسترلىگى كەڭ جولاقتى ينتەرنەتى بار مەكتەپتەردە تەك ەلەكتروندى جۋرنالدار تولتىرىلاتىنىن مالىمدەدى. (...) ەلەكتروندى جۋرنالداردى ساقتاۋ ۇزاق مەرزىمدى تۇردە ساقتاۋ ءۇشىن رەزەرۆتىك كوشىرمە جۇيەسىن تالاپ ەتەدى. قازىرگى كەزدە مەكتەپتەردە وسىنداي جاعداي جوق. سونىمەن قاتار ەلەكتروندى جۋرنالداردى ساقتاۋدىڭ نۇسقاۋلارى مەن ەرەجەسى دە ەسكەرىلمەگەن. ءاربىر توقساننىڭ سوڭىندا ەلەكتروندى جۋرنالداردى باسىپ شىعارۋدىڭ ءوزى ءتيىستى شىعىنداردى تۋدىرادى. سايكەسىنشە، وسى شارالارعا مەكتەپتەردە بيۋدجەتتىك قارجى قاراستىرىلماعان»، - دەپ توقتالدى ا. قۇرمانوۆا ءماجىلىستىڭ جالپى وتىرىسىندا.

بۇدان بولەك، دەپۋتاتتار Kundelik.kz جۇيەسىنىڭ قاۋىپسىزدىگىنە كۇمانمەن قارايتىندىعىن ايتتى.

 «الماتى قالاسىنداعى № 61 مەكتەپتەگى وقيعاعا توقتالساق، سول كەزدە بەلگىسىز بىرەۋلەر ەلەكتروندى كۇندەلىكتەردە بىرنەشە وقۋشىنىڭ اۆاتاركالارىن وزگەرتكەن. وسى ارقىلى بۇل جاعداي وقۋشىلاردىڭ جەكە مالىمەتتەرىن قورعاۋ قاجەتتىگىن كورسەتتى»، - دەدى ول.

سونىمەن قاتار دەپۋتات مينيسترلىك وكىلدەرى وسىعان دەيىن بۇل جۇيەگە اتا-انالاردىڭ ەرىكتى ءارى اقىسىز تۇردە قاتىساتىندىعى تۋرالى بىرنەشە رەت جاريالاعانىن ءسوز ەتتى. ونىڭ ايتۋىنشا، شىن مانىندە Kundelik.kz. قىزمەتتەرىنىڭ ءبىر بولىگى عانا اقىسىز، ال اتا-انالارعا قاجەتتى ءبىرقاتارى اقىلى بولىپ وتىر.

«پەداگوگتار Kundelik.kzء-تى ەنگىزۋ ماسەلەسىندە سايتقا ادامداردىڭ كىرۋىنە بايلانىستى ق ر بعم تاراپىنان جۇرگىزىلەتىن مونيتورينگكە كوڭىلى تولمايدى. مونيتورينگ نەگىزىندە قولدانۋشىلاردىڭ بەلسەندىگى بويىنشا وڭىرلەردەگى ءبىلىم بەرۋ مەكەمەلەرىنىڭ جاريا ەمەس رەيتينگى قۇرىلادى. سوندىقتان دا پەداگوگتارعا اتا-انالاردىڭ لوگيندەرى مەن ءقۇپياسوزىن جيناۋعا تۋرا كەلەدى. وسى ورايدا مۇعالىمدەر ولاردىڭ اتىنان پاراقشالارعا كۇندەلىكتى كىرۋگە ءماجبۇر. كەيبىر مەكتەپتەردە ينتەرنەت تەك ءبىر كابينەتتە عانا قوسىلعان، بۇل تۇرعىدا ءمۇعالىم ساباقتان كەيىن تاعى 2-3 ساعات ۋاقىتىن ەلەكتروندى جۋرنالعا جۇمسايدى. ال ەگەر بۇل شارالاردى ورىنداماسا، مەكتەپ اكىمشىلىگى تاراپىنان سوگىس الۋى مۇمكىن»، - دەيدى دەپۋتات.

ونىڭ پايىمىنشا، نەگىزى جاڭا جۇيە پەداگوگتارعا جۇكتەمەنى ازايتۋى ءتيىس ەدى، ءبىراق ءىس جۇزىندە مۇعالىمدەر ەكى جۇمىس جاساۋعا ءماجبۇر. ياعني، جۋرنالداردىڭ بىرنەشە ءتۇرىن تولتىرىپ، سايتقا كىرەتىندەردىڭ سانىن ارتتىرۋ تۇرعىسىندا بالالار مەن اتا-انالار اتىنان پايدالانۋعا ارتىق ۋاقىت جۇمسايدى.

«كەزەكتى رەت بارلىق جۇكتەمە مەن جاۋاپكەرشىلىك قازاقستاندىق مۇعالىمدەرگە جۇكتەلگەن. جالپىعا بىردەي سيفرلاندىرۋ جاعدايىندا اتالعان باعدارلامانى جەتىلدىرۋ قاجەتتىگى ايقىن بايقالىپ وتىر. سوندىقتان Kundelik.kz سايتىنا كىرۋ كورسەتكىشىنە ءتۇرلى مونيتورينگ پەن رەيتينگتەر تاجىريبەسىن جويىپ، جوعارىدا اتالعان پروبلەمالاردى قاراستىرۋدى سۇرايمىز. سونىمەن قاتار «سيفرلىق قازاقستان» باعدارلاماسى اياسىندا بۇل پروبلەمالاردى شەشۋدىڭ شارالارىن قابىلداۋدى ۇسىنامىز»، - دەدى ايزادا قۇرمانوۆا. 

قازاقپارات

---