InfoHub Logo

ق ر دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ كوميتەتى جاڭا وقۋ جىلىنىڭ الدىندا بالالارعا مەكتەپ فورماسى مەن سومكەنى قالاي دۇرىس تاڭداۋعا بولاتىندىعىنا قاتىستى كەڭەس بەردى.

الەمدىك تاجىريبە كورسەتكەندەي، مەكتەپ پورتفەلىنىڭ اۋىر سالماعى بالا دەنساۋلىعىنا كەرى اسەرىن تيگىزەدى. رانەستى دۇرىس تاڭداي ءبىلۋ سكوليوز، وستەوحوندروز جانە  جارىق اۋرۋى سياقتى ءبىرقاتار سىرقاتتاردىڭ الدىن الۋعا سەپتىگىن تيگىزەدى.  

ارقا قورجىنىن تاڭداۋ كەزىندە كەلەسى ماسەلەلەرگە نازار اۋدارعان ءجون:

- ارنايى قاڭقاسى بار، ومىرتقاعا تۇسەتىن سالماق پەن قىسىمدى بىردەي  بولەتىن جانە ومىرتقانى قيسايتپاي، بالانىڭ ارقاسىن ءتۇزۋ ۇستاۋعا ارنالعان ورتوپەديالىق رانەستى تاڭداۋ؛

- يىقباۋلارى اۋىر سالماقتان بالانىڭ يىعىن قيىپ كەتپەيتىندەي ىڭعايلى ماتەريالدان جاسالعان، جالپاق بولۋى ءتيىس. تۇتقالارى ۇزىندىعى بويىنشا رەتتەلەتىن بولۋى كەرەك، بالا ونى ارقاسىندا تەك ەكى يىقباۋىمەن اسىنۋى ءتيىس، بۇل رەتتە بالانىڭ بەلى مەن موينىن قىسپاۋى قاجەت؛

- رانەستىڭ ولشەمى مەن سالماعى بالانىڭ بويىنا جانە جاسىنا سايكەس كەلۋى ءتيىس. ىشىندەگى زاتتارسىز مەكتەپ ريۋكزاگى 1 كەلىدەن اسپاۋى ءتيىس. ال ىشىندە زاتتارى بار سومكەنىڭ سالماعى بالانىڭ جاس مولشەرىنە سايكەس كەلۋى قاجەت،  مىسالى:

1-2 سىنىپتار -  1،5 كگ دەيىن

3-4 سىنىپتار - 2 كگ دەيىن

5-6 سىنىپتار - 2،5 كگ دەيىن

7-8 سىنىپتار - 3،5 كگ دەيىن

9-11 سىنىپتار - 4كگ دەيىن. 

- سونىمەن قاتار جارىق شاعىلىستىراتىن بولشەكتەردىڭ بولعانى ابزال، بۇل جولدان ءوتۋ كەزىندە قاۋىپسىزدىك ءۇشىن قاجەت. جۇرگىزۋشىلەر تاۋلىكتىڭ قاراڭعى كەزىندە نەمەسە ناشار جارىقتاندىرىلعان جەرلەردە جولدان ءوتىپ بارا جاتقان بالانى دەرەۋ بايقاي الادى.

ال مەكتەپ فورماسىن ساتىپ الۋ كەزىندە بالانىڭ وسى كيىمدە 5-6، ءتىپتى ودان دا كوپ ساعات جۇرەتىنىن ەستە ساقتاۋ ماڭىزدى. كيىم ولشەمىن دۇرىس تاڭداۋ كەرەك جانە بالاعا ول كيىمدە وتىرعاندا دا، جۇرگەندە دە ىڭعايلى ەكەنىنە كوز جەتكىزۋ قاجەت. كيىم بالانىڭ قوزعالىسىنا كەدەرگى بولماۋى ءتيىس، وتە تار بولماۋى كەرەك، سەبەبى تار بەلدەمشە نەمەسە شالبار ءىشتىڭ اۋىرۋىنا اكەلەدى، ال تار كويلەك پەن سارافان تىنىس الۋدى بۇزۋى مۇمكىن. سوندىقتان ءبىرىنشى كەزەكتە مەكتەپ فورماسى بالانىڭ دەنساۋلىعىن جانە قوزعالىس بەلسەندىلىگىن ساقتاۋدى قامتاماسىز ەتۋى ءتيىس.

ءبىلىم بەرۋ مەكەمەسىندە ۇزاق ۋاقىت بولاتىن بالانىڭ كيىمى تەحنيكالىق رەگلامەنتتەرگە سايكەس بيولوگيالىق جانە حيميالىق قاۋىپسىزدىك تالاپتارىنا ساي كەلەتىن تابيعي ماتەريالداردان تىگىلۋى ءتيىس.  بالانىڭ تەرىسى دەمالىپ، اللەرگيالىق رەاكسيالاردىڭ الدىن الۋ ءۇشىن گيگيەنالىق جاقسى قاسيەتتەرى بار تابيعي تالشىقتان (ءجۇن، ماقتا، زىعىر، جىبەك) جانە ۆيسكوزادان جاسالعان ماتانى تاڭداۋ ۇسىنىلادى.

ماتانىڭ قۇرامى:

- كيىمنىڭ ۇستىڭگى قاباتى كەمىندە 35 % تابيعي تالشىقتان نەمەسە ۆيسكوزادان؛

- ەكىنشى قاباتى رەتىندە استارى 100 % تابيعي تالشىقتان نەمەسە ۆيسكوزادان؛

- بلۋزكا مەن كويلەك كەمىندە 65 % تابيعي تالشىقتان نەمەسە ۆيسكوزادان بولۋى ءتيىس. 

سونداي-اق مەكتەپ فورماسىنىڭ قاۋىپسىزدىگى مەن ساپاسىن قامتاماسىز ەتەتىن مىناداي كريتەرييلەر بار: اۋا وتكىزگىشتىگى،  ەلەكتروستاتيكالىق ءورىس كەرنەۋلىگى جانە بوياۋىنىڭ تۇراقتىلىعى.

ءتۇس گامماسىن تاڭداعان كەزدە بالاڭىز وقيتىن مەكتەپتىڭ جالپى ەرەجەلەرىن باسشىلىققا الۋ كەرەك. سونىمەن بىرگە گيگيەنالىق قاعيدالاردى ساقتاۋ ماقساتىندا ءبىر اپتا ىشىندە اۋىستىرىپ وتىرۋ ءۇشىن مەكتەپ كيىمىنىڭ بىرنەشە زاتتارىن تاڭداپ الۋ قاجەت.  

ءبىلىم جانە عىلىم مينيسترلىگىنىڭ وكىلدەرىمەن باستاۋىش سىنىپ وقۋشىلارىنىڭ قورجىنى اۋىر بولۋى  ماسەلەسى تالقىلانعاننان كەيىن، پارلامەنت ءماجىلىسىنىڭ دەپۋتاتتارىمەن بىرلەسىپ جانە گيگيەنا ماماندارىنىڭ ۇسىنىمدارى بويىنشا مەكتەپتەرگە ءار وقۋشىعا وقۋلىقتاردى، اۋىستىراتىن اياق كيىمدى جانە سپورت كەرەك-جاراقتاردى ساقتاۋعا ارنالعان جەكە شكافتار قويۋ شەشىلدى.

---