InfoHub Logo

قاراعاندى وبلىسىنىڭ مەكتەپ ديرەكتورلارى بيۋدجەت قارجىسى ەسەبىنەن شەتەلگە تاجىريبە الماسۋعا جىبەرىلەتىن بولادى. بۇل تۋرالى ءبىلىم قىزمەتكەرلەرىنىڭ ءداستۇرلى تامىز كونفەرەنسياسىندا وبلىستىق ءبىلىم باسقارماسىنىڭ باستىعى اسقات ايماعامبەتوۆ ايتتى.

ءبىلىم بەرۋ سالاسىندا جوسپارلانعان جاڭا جوبالارعا توقتالعان ا.ايماعامبەتوۆ  باسشىلاردىڭ بىلىكتىلىگىن كوتەرۋ كوزدەلىپ وتىرعانىن اتاپ ءوتتى. اتاپ ايتقاندا، قاراعاندىنىڭ مەكتەپ ديرەكتورلارى بيۋدجەت قارجىسى ەسەبىنەن شەتەلگە تاجىريبە الماسۋعا باراتىن بولادى.

«شىندىعىندا، كوپ ەستىپ، وقىعاننان، ءبارىن ءوز كوزىمەن كورۋ الدەقايدا ارتىق. سوندىقتان، مەكتەپ ديرەكتورلارى جۇمىس ناتيجەلى بولۋى ءۇشىن ارىپتەستەرىنىڭ تاجىريبەسىن ۇيرەنۋى، ءبىلۋى قاجەت. ءبىز سىزدەردى بۇل ماسەلەدە قولدايمىز. ەلىمىزدىڭ، جاقىن جانە الىس شەتەلدەردىڭ ۇزدىك مەكتەپتەرىنە تاجىريبە الماسۋعا جىبەرۋ باعدارلاماسىن ءبىر ايدىڭ ىشىندە جاساۋدى تاپسىرامىن. سونىمەن بىرگە، پەداگوگتاردى اتتەستاسيادان وتكىزۋدىڭ جۇيەسىن قايتا قاراڭىزدار. بىزگە ەلەكتروندى ۇلگىدە راسىمدەۋگە كوشۋ قاجەت»، - دەدى ۇسىنىستى قولداعان قاراعاندى وبلىسىنىڭ اكىمى ەرلان قوشانوۆ.

كونفەرەنسيادا ايماق باسشىسى قوعامداعى ۇستازدىڭ ءرولى مەن ماڭىزىن باسا ايتتى.

«مەن ءوزىم پەداگوگتار وتباسىندا وسكەندىكتەن، ءمۇعالىمنىڭ ەڭبەگىنە زور قۇرمەتپەن قارايمىن. پەداگوگ بولۋ - جاۋاپكەرشىلىكتى، كۇردەلى ءارى قۇرمەتتى ءىس. ءمۇعالىم ادامنىڭ قالىپتاسۋىنا جانە ونىڭ تاعدىرىنا ىقپال ەتەدى. ۋينستونا چەرچيللدىڭ «مەكتەپ مۇعالىمدەرى پرەمەر-مينيستر ارماندايتىنداي بيلىككە يە» دەگەن ءسوزى تەگىن ەمەس. ەلباسىنىڭ بىلىمگە، باسەكەگە قابىلەتتىلىككە جانە ۇلتىمىزدىڭ بولاشاعىن تاربيەلەۋدە العا قويعان تاپسىرماسىن ورىنداۋ تىكەلەي سىزدەردىڭ ەڭبەكتەرىڭىزگە بايلانىستى»، - دەدى ول.

ءىس-شارا ۇزدىك پەداگوگتارعا ق ر ءبىلىم جانە عىلىم مينيسترلىگى مەن وبلىس اكىمىنىڭ ماراپاتتاۋلارىن تاپسىرۋمەن اياقتالدى. ال جاس ماماندارعا نوۋتبۋكتەر سىيعا بەرىلدى.

---