InfoHub Logo

ەلەكتروندى قۇرىلعىلاردىڭ ءومىرىمىزدىڭ ءبىر بولشەگىنە اينالىپ، مىزعىماس ورىن العانى شىندىق. اتا-انالار مەن مۇعالىمدەر دابىل قاعىپ، بالالارىن سمارتفون، پلانشەتتەردەن شەكتەۋگە تىرىسقانىمەن، مۇنداي قۇرىلعىلاردى بالانىڭ ءوي-ورىسىن دامىتاتىن پايدالى قوسىمشالاردىڭ بار ەكەندىگىن بىلە بەرمەيدى. باعدارلاما جاساۋشىلار بالالاردى مەكتەپكە دايىنداۋعا ارنالعان ءتۇرلى پايدالى قوسىمشالار جاساۋدى الدەقاشان قولعا العان. بۇل ورايدا نازارلارىڭىزعا بۇلدىرشىندەرىمىزدى دامىتاتىن پايدالى قوسىمشالار قاتارىن ۇسىنامىز.

«مەكتەپ جاسىنا دەيىنگى بالالارعا ارنالعان ماتەماتيكا»

بالانى ءتۇرلى ەسەپتەر مەن مىسالداردى شەشۋگە كوندىرۋ وڭايدىڭ ءىسى ەمەس. اتالعان قوسىمشا بالالاردى ويىن تۇرىندە ساندارمەن تانىستىرىپ، قوسۋ-الۋعا، سالىستىرۋعا جانە ەسەپتى جىلدامدىققا شەشۋگە كومەكتەسەدى. تاپسىرمالار كۇردەلىلىگى بويىنشا بىرنەشە دەڭگەيگە بولىنگەن جانە 3-7 جاس ارالىعىنداعى بالالارعا ارنالادى.

قوسىمشاعا ەنگىزىلگەن كومەكشى قۇرالداردىڭ كومەگىمەن بالا ونى وزدىگىنەن قولدانا الادى. الايدا ارنايى اتا-انالار ءۇشىن ستاتيستيكا ءبولىمىن قاراستىرعان. قوسىمشا ينتەرفەيسى – قاراپايىم ءارى تۇسىنۋگە جەڭىل. ال قوسىمشاعا دەگەن قىزىعۋشىلىعىن تۋعىزىپ، نازارىن اۋدارۋ ماقساتىندا ءتۇرلى كولەمدى، قىزىقتى سۋرەتتەر ەنگىزىلگەن.

• Android

«ۋچۋبۋكا PRO»

ەكراندا پايدا بولعان ارىپتەر جانۋار اتاۋىن قۇراستىرۋعا مۇمكىندىك بەرەتىن قوسىمشا بالانى وقۋعا ۇيرەتەدى. مۇندا بىردەن ەكى ءادىس قولدانىلادى. ءداستۇرلى تۇرىندە جانۋار اتاۋىن قۇراعان كەزدە ءار ءارىپ دىبىستالىپ وتىرادى. ال ەكىنشى فونەتيكالىق ءادىس بويىنشا، قوسىمشاداعى ديكتور دىبىستىڭ قانداي بولۋى كەرەكتىگىن كورسەتەدى. اتالعان ادىستەردىڭ بىرىكتىرىلۋى اقپاراتتىڭ اناعۇرلىم جاقسى ەستە ساقتالۋىنا كومەكتەسەدى.

ەڭ ءبىرىنشى كەزەكتە، «ۋچۋبۋكا» – بالالاردىڭ ەرتە جاستان دامۋىنا ارنالعان. الايدا قوسىمشادا كۇردەلىلىكتىڭ ەكى دەڭگەيى بار: جەڭىلدىكپەن جانە جەڭىلدىكسىز.

• iOS

«كىرپىنىڭ حيكاياسى»

4 پەن 6 جاس ارالىعىنداعى بالالارعا ارنالعان ينتەراكتيۆتى دامىتاتىن ويىن. مۇنداعى ەرتەگى لوگيكا، زەيىندىلىك، كورۋ ارقىلى ەستە ساقتاۋ جانە «كەڭىستىكتە ويلاۋ» قابىلەتىن دامىتۋدى قامتيدى. قوسىمشادا لابيرينتتەن ءوتىپ، پازلدار جيناپ، زاتتاردى توپتاستىرىپ، ارتىق جانە ەرەكشە بولشەكتەردى تابۋعا بولادى.

ويىندى بالالار پسيحولوگى ويلاپ تاپقان. سوندىقتان ويىننىڭ استارىندا دامىتاتىن ساباقتاردا قولدانىلاتىن ادىستەر جاتىر.

• Android
• iOS

«MarcoPolo اۋا رايى»

قوسىمشا اۋا رايىنداعى ءتۇرلى وزگەرىستەر مەن قۇبىلىستاردى ويىن تۇرىندە ءتۇسىندىرىپ، قورشاعان ورتادا بولىپ جاتاتىن وزگەرىستەردى كورسەتەدى. ويىنشى جەلدى باسقارىپ، جاڭبىر مەن قار جاۋعىزىپ، كەمپىرقوساق جاساپ، اۋا تەمپەراتۋراسىن كوتەرىپ نە تومەندەتىپ، داۋىل، قۇيىن تۇرعىزا الادى. ويىنشىنىڭ ءار ارەكەتى قورشاعان ورتاعا اسەر ەتەدى. ناتيجەسىندە بالا اۋا رايىنىڭ تابيعي لاندشافتىنى قالاي وزگەرتەتىنىن، كەيىپكەرلەردىڭ كۇندەلىكتى ءومىرى مەن ءتۇرلى زاتتاردىڭ كۇيىن كورە الادى.

قوسىمشا ءار ءتۇرلى جاستاعى بالالارعا ارنالعان. سول سەبەپتى ويىن اياسىندا تابيعاتتاعى سۋ اينالىمىن ءبىلىپ قانا قويماي، كيىم تاڭداپ ۇيرەنۋگە دە بولادى. 

• Android
• iOS

«بالالارعا ارنالعان سۋرەت سالعىش»

«بالالارعا ارنالعان سۋرەت سالعىش» ەكراندا ءتۇرلى كەيىپكەرلەردى سالۋعا مۇمكىندىك بەرەدى. ول ەكرانداعى سىزىقتار بويىمەن ساۋساقتى جۇرگىزۋ ارقىلى جۇزەگە اسادى. مۇنداي ءادىس قولدى جازۋعا داعدىلاندىرۋعا، ۇساق موتوريكانى دامىتۋعا كومەكتەسەدى. قوسىمشادا ويىن ەلەمەنتى دە قاراستىرىلعان: سالىنعان سۋرەتتەر «ءتىرىلىپ»، كەيىپكەرلەر سەكىرىپ، ءتۇرلى دىبىستار شىعارا الادى. اتالعان قوسىمشا كەز-كەلگەن بالانىڭ قىزىعۋشىلىعىن تۋدىراتىنى انىق.

• Android
• iOS

«ادام دەنەسى»

قوسىمشا اناتوميا نەگىزدەرىمەن تانىسۋعا مۇمكىندىك بەرەدى. ول ارقىلى اعزالاردىڭ قالاي جۇمىس ىستەيتىنىن ءبىلىپ، ولاردىڭ اراسىنداعى بايلانىستى باقىلاۋعا بولادى. سونىمەن قاتار بالا التى قاباتقا بولىنگەن دەنە ۇلگىسىن زەرتتەي الادى: قاڭقا، بۇلشىق ەت، تىنىس الۋ، اس قورىتۋ، جۇيكە، جۇرەك-قان تامىرلار جۇيەلەرى جانە نەسەپ-جىنىس جۇيەسى. اتالعانداردىڭ سوڭعىسى تەك «اتا-انالارعا ارنالعان بولىمدە» كورسەتىلەدى. ودان بولەك قوسىمشادا دەنەمىزدەگى اعزالار انيماسيالانعان. سوندىقتان جۇرەك سوعىسىن، تىنىس العاندا وكپەنىڭ كەڭەيۋىن، ءىشتىڭ قۇرىلداۋىن كوزبەن كورە الاسىز. بۇل رەتتە قۇرىلعىنىڭ ءتۇرلى مۇمكىندىكتەرى دە ەسكەرىلگەن: الدىڭعى كامەرا كوز كورۋىن تاماشالاۋعا مۇمكىندىك بەرسە، ميكروفون – ەستۋ قابىلەتى جايلى ءتۇسىندىرۋ ءۇشىن.

قوسىمشا 4 جاستان اسقان بالالارعا ارنالعان. وندا بىرنەشە قولدانۋشىعا ارنالعان رەجيم بار. سونىمەن قاتار اتا-انالارعا ارنالعان ءبولىم مەن انىقتامالىق كىتاپحانا ەنگىزىلگەن.

• iOS

«Star Walk Kids: بالالارعا ارنالعان استرونوميا»

StarWalkKids بالالاردى عارىش جانە كۇن جۇيەسىمەن تانىستىرىپ، عالامشارلار مەن اسپان دەنەلەرى جايلى ماعۇلمات بەرىپ، جۇلدىزدى اسپان كارتاسىن وقۋعا ۇيرەتەدى. قوسىمشانىڭ قىزىقتى ەرەكشەلىگى – ءدال ءقازىر اسپاننان نەنى كورە الاتىنىڭىزدى انىقتاۋ ءۇشىن، گەولوكاسيا جانە گيروسكوپتى قولدانۋ. ول ءۇشىن پلانشەت نە تەلەفونىڭىزدى جوعارى كوتەرۋىڭىز جەتكىلىكتى. قوسىمشا ءدال سول ۋاقىتتا اسپاندا تۇرعان جۇلدىزدار، شوقجۇلدىزدار مەن عالامشارلاردى كورەسەتەدى. مالىمەت ءماتىن، مۋلتفيلم نەمەسە اۋديوترەك تۇرىندە بەرىلەدى.

• Android
• iOS

«ورماندا نە وسەدى»

بۇل قوسىمشا – ەۋروپالىق ورمانداعى اعاشتار، جەۋگە جارامlى جانە جارامسىز ساڭىراۋقۇلاقتار مەن جيدەكتەر، گۇلدەر جانە ت.ب. ءتارىزدى وسىمدىكتەر جايلى مالىمەت بەرەتىن ينتەراكتيۆتى انىقتامالىق. ويىنشى وسىمدىكتى نۇسقاعاندا، ونىڭ اتاۋى، جالپى مالىمەت پەن قىزىقتى دەرەكتەر پايدا بولادى.

«ورماندا نە وسەدى» قوسىمشاسى ءبىزدى قورشاعان فلورامەن تانىسىپ، وسىمدىكتەردىڭ ءتۇرلى قاسيەتىن بىلۋگە مۇمكىندىك بەرەدى. ال العان ءبىلىمىمىزدى سەرۋەندەگەندە نە ساباقتا تاجىريبە جۇزىندە قولدانا الامىز.

• Android
• iOS

«پىشىندەردى تانيمىز»

قوسىمشا گەومەتريا نەگىزدەرىمەن تانىسىپ، دوڭگەلەك، شەڭبەر، سوپاق، تىك ءتورتبۇرىش، رومب، تراپەسيا جانە شارشى سىندى نەگىزگى پىشىندەردى بىلۋگە ۇيرەتەدى. العان ءبىلىمدى بەكىتۋ ءۇشىن، ءار پىشىنگە بايلانىستى تاقپاقتار مەن ويىندار ەنگىزىلگەن.

• Android
• iOS

«توببي: جانۋارلار الەمى»

بالا كەيىپكەرگە وتباسىن تابۋعا كومەكتەسەتىن ويىن. وتباسىن ىزدەستىرۋ كەزىندە جولدا ءتۇرلى اڭدار مەن قۇستار ۇشىراسادى. ويىنشى ولاردىڭ اتاۋىن، قايدا تىرشىلىك ەتەتىنىن جانە نەمەن قورەكتەنەتىنىن بىلە الادى.

قوسىمشا 2-5 جاس ارالىعىنداعى بالالارعا ارنالعان ءارى بالانىڭ لوگيكاسى مەن زەيىندىلىگىن دامىتۋعا باعىتتالعان. ويىندا 25 ءتۇرلى جانۋارلار تۋرالى مالىمەت بەرىلەدى. سونىمەن قاتار بالا وزدىگىنەن قولدانا الاتىنداي جەڭىل ويلاستىرىلعان.

• Android
• iOS

---