مەكتەپتە بالالاردى تاماقتاندىرۋدى ۇيىمداستىرۋ ەرەجەسى وزگەرتىلدى
مەكتەپتە وقۋشىلاردى تاماقتاندىرۋدى ۇيىمداستىرۋ ەرەجەسىنە وزگەرىستەر ەنگىزىلدى. بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ءوزىنىڭ تەلەگرام كانالىندا حابارلادى.
مينيستر بۇعان دەيىن مەكتەپ اسحانالارىنداعى ونىمدەردىڭ قىمباتتىعى تۋرالى جازعان ەدى. بۋفەت ونىمدەرىنىڭ باعاسى كورشى دۇكەنگە قاراعاندا ەكى ەسە قىمبات بولاتىن جاعدايلار دا كەزدەسەدى. ەندى مامانداردىڭ قاتىسۋىمەن جۇمىس توبى قۇرىلىپ، قاجەتتى تۇزەتۋلەر ازىرلەنگەنىن مالىمدەپ وتىر.
«قانداي وزگەرىس ەنگىزىلدى؟ ەندى قىزمەتتەردى جەتكىزۋشىلەرمەن ازىق-تۇلىكپەن قامتاماسىز ەتۋ تۋرالى جاڭا شارتتار جاسالعاننان كەيىن مەكتەپ اسحانالارىنداعى باعالار، ونىڭ ىشىندە بۋفەت ونىمدەرى، سۋسىندار جانە ت.ب. قىزمەت كورسەتۋشىلەردىڭ قالاۋى بويىنشا ەمەس، ورتاشا نارىقتىق باعالاردى ەسكەرە وتىرىپ قالىپتاستىرىلادى.
سونداي-اق مەملەكەتتىك ساتىپ الۋ پورتالىنداعى دەرەكتەر بازاسى مەن ستاتيستيكا ورگاندارىنىڭ اقپاراتى نەگىزگە الىنادى. بۇل اسحانالاردا باعانىڭ كوتەرىلۋىنە جول بەرمەيدى.
سونىمەن قاتار ەندى جەتكىزۋشىلەر تەندەردى ۇيىمداستىرۋشىنىڭ كونكۋرس قۇجاتتاماسىندا كورسەتكەن اس ءمازىرى مەن باعالارعا سايكەس قاتاڭ جۇمىس ىستەيدى. بۇل تىيىم سالىنعان ونىمدەردى ءوندىرۋ جانە وتكىزۋ تاۋەكەلدەرىن جويۋ، سونىمەن بىرگە بۋفەت ونىمدەرىنىڭ باعاسىن بەلگىلەۋ ءۇشىن قاجەت.
سونداي-اق اتا-انالاردى تاماقتانۋ تۋرالى حاباردار ەتۋ نەمەسە ونىڭ ساپاسىن باعالاي الۋى ءۇشىن ءبىلىم رەسۋرسىنا كەزەڭ-كەزەڭىمەن نورما ەنگىزىلەدى. ول - پايدالانۋشىلارعا قىزمەت كورسەتۋ جانە قولما-قول اقشاسىز تولەمدەر ساپاسىن باعالاۋعا مۇمكىندىك بەرەتىن تاعامداردىڭ، اس ءمازىرىنىڭ، باعالاردىڭ فوتوسۋرەتتەرىن جاريالاۋ نورماسى.
سونىمەن قاتار بالاباقشالاردا، بالالار ۇيلەرىندە بالالاردى ۇزدىكسىز تاماقپەن قامتاماسىز ەتۋ ءۇشىن جەرگىلىكتى اتقارۋشى ورگانداردىڭ ينفلياسيا دەڭگەيىن ەسكەرە وتىرىپ، ازىق-تۇلىك باعاسىنىڭ وزگەرۋى بولىگىندە ساتىپ الۋ تۋرالى شارتتارعا وزگەرىستەر ەنگىزۋ مۇمكىندىگى كوزدەلگەن» دەپ جازدى اسحات ايماعامبەتوۆ.
ءمينيستردىڭ ايتۋىنشا، ازىق-تۇلىك باعاسىنىڭ وسۋىنە بايلانىستى قاڭتار ايىندا مەملەكەتتىك ساتىپ الۋ قورىتىندىسى بويىنشا، مىسالى، كارتوپ 100 تەڭگە تۇراتىن كەلىسىمشارت جاسالعان جاعدايلار ءجيى كەزدەسكەن. كەيىن بىرنەشە اي وتكەن سوڭ جەتكىزۋشى تاۋاردى جەتكىزۋدەن باس تارتىپ، ناتيجەسىندە ۇيىم ازىق-تۇلىكسىز قالعان.
«سوت پروسەدۋراسىنا ەنگىزىلگەن جوسىقسىز جەتكىزۋشىلەردىڭ ءتىزىمى بار ەكەنى تۇسىنىكتى، ءبىراق كوپتەگەن جەتكىزۋشى مۇنى ەلەمەيدى، ءسويتىپ جاڭا ۇيىم اشىلىپ، جۇمىسىن جالعاستىرا بەرەدى. ءبىراق بۇل ۋاقىتتا بالاباقشا بۇلدىرشىندەردى تاماقپەن قامتاماسىز ەتە الماي وتىرادى. ەندى جاڭا نورما بويىنشا اكىمدىكتەر مۇنداي جاعدايلاردا وسى ونىمدەردىڭ ورتاشا باعاسىنا سايكەس ۇيىمداردى ۇزدىكسىز قامتاماسىز ەتۋ ءۇشىن قوسىمشا كەلىسىم جاسايدى.
بۇل ەرەجەلەر كەلەسى جىلدان باستاپ قىزمەت كورسەتۋشىلەرمەن جاڭا كەلىسىمشارتتار جاسالعاننان كەيىن قولدانىسقا ەنگىزىلەدى»، - دەدى ول.
اسحات ايماعامبەتوۆ الماتىدا وسىنداي پيلوتتىق جوبا باستالىپ تا كەتكەنىن ايتادى.
«الماتىدا مەكتەپتە تاماقتاندىرۋدى ۇيىمداستىرۋ بويىنشا پيلوتتىق جوبا باستالعانىن اتاپ وتكىم كەلەدى.
بۇگىنگى تاڭدا تاماقتانۋدى ۇيىمداستىرۋ پروسەسىن وڭتايلاندىرۋعا جانە جەدەلدەتۋگە باعىتتالعان پيلوت قالانىڭ ءۇش مەكتەبىندە ىسكە قوسىلدى.
سونداي-اق، مەكتەپ اس ءمازىرىن قالىپتاستىرۋ تاسىلدەرىن جاڭارتۋ جۇمىستارىن دا باستاپ كەتتىك»، - دەپ ءتۇيدى ءسوزىن ۆەدومستۆو باسشىسى.
You Might Also Like
-
تىرلىكتە كۇندە توي ەمەس، توي بولسا كوڭىل سەرپىلەر. كۇندەردىڭ وتكەن كوبى ەلەس، باس قوسقان شاقتا جەلپىنەر.
-
بۇل كۇنى تويىڭ بوپ جاتىر، ەي، اسىل دوسىم ەلدەگى. مەنى دە ورتاق دەپ بىلگىن، شاتتىققا وسى سەندەگى. «تىلەگىم ايتار – بولعاي دا كەلىننىڭ قۇتتى اياعى»، - دەپ جاتقان ۇلى ت...
