مەنىڭ گۋبەرناتوردا جۇمىسىم جوق
(II نۇسقا)
سىرىم باتىر رۋسسيا مەن قازاق شەكاراسىنا، قازاق جەرىنە قالا سالۋىنا قارسى بولادى، قالىڭ قول جيناپ: «ەلەك سۋىنىڭ جاعاسىنا ەلەك قالاسىن سالدىرمايمىن»، — دەپ، سالىنعان ۇيلەردى ورتەپ جىبەرەدى. سوندىقتان ەلەك قالاسىن قازاقتار «كۇيىك قالا» دەپ، اتاپ كەتكەن.
تەكەنىڭ اۋزىنان مۇنايلى /قازىرگى پودستەپنوي/ سالدىرمايمىن دەپ شاۋىپ الىپتى. وسىنداي ىستەرىنەن كەيىن ورىنبوردىڭ گۋبەرناتورى سىرىمدى شاقىرىپتى. سىرىم باتىر:
— مەنىڭ گۋبەرناتوردا جۇمىسىم جوق، ونىڭ جۇمىسى بولسا، ءوزى كەلسىن، — دەپ، جاۋاپ قايىرىپتى.
گۋبەرناتور سىرىمعا:
— مەنىڭ سىزدە جۇمىسىم جوق، ءسىزدى پاتشا شاقىرادى، ءسىزدى كورەمىن، — دەپتى. سىرىم:
— مەن بارا المايمىن. لاۋعا ءمىنىپ كورگەنىم جوق، ورىسشا ءتىل بىلمەيمىن. كەرەك بولسا وزىمە تەڭ كىسى جىبەرەيىن، — دەپ مالايسارىنى جىبەرىپتى.
پاتشا مالايسارىعا سىي-قۇرمەت كورسەتىپتى. جاقسى، كەڭ سارايلارىن، سالتاناتتارىن ارالاتىپ ءجۇرىپ، ءبىر بولمەدەگى ءبىر سۋرەتتى كورسەتىپ «مىناۋ نە» دەگەندە، مالايسارى كىدىرىپ قالادى. باسقا بولمەدەگىلەردىڭ ءبارىن مۇدىرمەي تانىعان ەكەن. مالايسارى ءمۇدىرىپ قالعاندا، پاتشا: «سىرىم كىم بالاسى؟» — دەپتى. مالايسارى: «دات بالاسى»، — دەپتى. سوندا پاتشا ەزۋ تارتىپ «ادامنان تۋسا، ادام بالاسى بولسا بولار» دەگەن ەكەن. مالايسارى تاني الماي قالعان سۋرەتى قۇمىرسقانىڭ ۇلكەيتىپ سالعان سۋرەتى ەكەن. پاتشانىڭ «سىرىم كىم بالاسى؟» دەگەن سەبەبى — ونى ورىستاردىڭ ءبىرقاتارى ادامنىڭ بالاسى ەمەس، قۇدايدىڭ بالاسى دەيدى ەكەن. «ادامنىڭ بالاسى بولسا، بولار» دەگەنى، «قۇدايدىڭ بالاسى بولماسا، ونى بىردەمە ەتەرمىز، تۇبىنە جەتەرمىز» دەگەنى ەكەن پاتشانىڭ.
وقۋعا كەڭەس بەرەمىز:
جىلقىنىڭ تورىسى كوپ پە، توبەلى كوپ پە؟ (ءى نۇسقا)
سىرىمنىڭ نۇرالى حاندى شابۋى (ءىى نۇسقا)
بايماعامبەت سۇلتان مەن سىرىم باتىر
You Might Also Like
