InfoHub Logo

ءبىلىم سالاسى: كوممۋنيكاسيا
ۇيىمداستىرىلعان وقۋ قىزمەتى: سويلەۋدى دامىتۋ
تاقىرىبى: مەنىڭ ويىنشىقتارىم
ماقساتى: بالالاردى ويىنشىقتاردىڭ تۇرىمەن، تۇسىمەن تانىستىرۋ، تاقپاقتار ايتقىزۋ، سوزدىك قورىن مولايتۋ، ءتىل بايلىعىن دامىتۋ، قابىلداۋ ەستە ساقتاۋ قابىلەتىن جەتىلدىرۋ. ويىنشىقتاردى مەيىرىمدىلىكپەن جانە ۇقىپتى قاراۋعا، تازا ۇستاۋعا تاربيەلەۋ.
كورنەكىلىك: ءارتۇرلى ويىنشىقتار.
بيلينگۆالدى قۇراعىش: ويىنشىق – يگرۋشكا

ساباقتىڭ بارىسى:
- سالەمەتسىزدەر مە بالالار. قايىرلى تاڭ. بۇگىنگى كۇنىمىز كوڭىلدى، شۋاقتى، cءاتتى ءوتسىن.
شاتتىق شەڭبەر:
كىشىگە دە ءسىز
ۇلكەنگە دە ءسىز
بارشاڭىزدى قۇرمەتتەپ
باس يەمىز ءبىز
ويىنشىقپەنەن دەنەمىز
شىنىعامىز، وسەمىز
جىلدان - جىلعا
ءبىر جىلعا
ۇلكەن بولىپ وسەمىز
- بالالار ايتىڭىزدارشى ءقازىر جىلدىڭ قاي مەزگىلى؟
- قىس مەزگىلى.
- قىس مەزگىلى نەشە ايدان تۇرادى؟
- ءۇش ايدان تۇرادى.
- اتتارىن اتايىقشى.
- جەلتوقسان، قاڭتار، اقپان.
- قىس مەزگىلىنىڭ ەرەكشەلىكتەرى قانداي؟ اۋا - رايى قانداي بولادى؟
- قىس مەزگىلىندە كۇن سۋىق، اياز، بوران، كوك تايعاق بولادى، اراسىندا قار جاۋادى.
- وتە جاقسى بالالار.
- ال ەندى بالالار بوس ۋاقىتتارىڭىزدا نە ىستەيسىڭدەر ۇيدە، بالاباقشادا؟
- وينايمىز.
- نەمەن وينايسىڭدار؟
- ويىنشىقتارمەن.
- يا، دۇرىس.
- بالالار قاراڭدارشى قانداي ادەمى، اسەم ويىنشىقتار. ءبىز بۇگىن وسى ويىنشىقتار تۋرالى اڭگىمەلەيمىز.
- مىنا كەرەمەت ويىنشىقتار بارلىعى بالالار ءۇشىن جاسالعان. ولار كوپتەگەن ۇلكەندەردىڭ ەڭبەگىنىڭ ارقاسىندا جاسالادى. ويىنشىقتاردى پلاستماسسادان، رەزيننەن، ماتادان، اعاشتان، تەمىردەن جاسايدى. ويىنشىقتار جۇمساق، قاتتى، بىلقىلداق بولادى.
ويىنشىقتاردى ۇقىپتى، تازا ۇستاۋ كەرەك. ولاردى جۇلىپ، بولشەكتەپ، سىندىرۋعا بولمايدى. ويناپ بولعاسىن جيناپ قويۋ كەرەك، كىرلەسە جۋۋ كەرەك.
(بەينە كورىنىستە ويىنشىقتاردى تاماشالايدى)
ال ەندى بالالار سۇيىكتى ويىنشىعىمىزدى قولىمىزعا الىپ، تاقپاق ايتايىق.
بالالاردىڭ تاقپاقتارى:
مانسۋر
ويىنشىقتارىم كوپ مەنىڭ
ءبارىن جاقسى كورەمىن
كەشكە دەيىن جالىقپاي
بىرگە ويناپ جۇرەمىن
ايدانا
ويىنشىعىم قونجىعىم
اناسىن دا بىلمەيدى
قارباڭداعان ايۋدى
تۇسىندەدە كورمەيدى
ىڭكار
ويىنشىعىم قۋىرشاق
نە بەرسەم دە جەمەيدى
ەركەلىگى سونشاما
كوتەرمەسەم جۇرمەيدى
ايبەك قىزى ايارۋ
ويىنشىعىم كوجەگىم
قورىقپايدى، قاشپايدى
ءتاتتى ءسابىز ۇسىنسام
ۇستاي الماي تاستايدى
ابىل ايارۋ
دوبىم، دوبىم دومالاق
شارشامايسىڭ دومالاپ
ۇستەل ءۇستىن ءبۇلدىردىڭ
تارەلكەنى سىندىردىڭ
شاپاعات
ۇلكەن بولىپ وسكەندە
ماشينا الام مەندە
ءبىراق ول ءۇشىن الدە دە
وقۋ كەرەك ارينە.

سەرگىتۋ ءساتى:
ۇزىن قۇلاق سۇر قويان
ەستىپ قالىپ سىبدىردى
ويلى – قىرلى جەرلەرمەن
ىتقىپ – ىتقىپ جۇگىردى
قاراپ ەدى ارتىنا
قيىعىن ساپ كوزىنىڭ
كەلە جاتقان تومپاڭداپ
كوجەگى ەكەن ءوزىنىڭ

ويىن: «ارتىق زاتتى تاپ»؛ «جارتىسىن تاپ»
- وتە جاقسى بالالار. بۇگىنگى وقۋ - قىزمەتىمىزگە بارىڭىزدە جاقسى قاتىستىڭدار، جارايسىڭدار!
- ەندى ءبارىمىز بىرگە ولەڭ ايتايىقشى!

ءان. «ويىنشىقتار»
بىزدەردە بار قۋىرشاق
بۇزاۋ، قوزى، قۇلىنشاق
ويىنشىقتار تىڭدايدى
ءامىر بەرىپ بۇيىرساق
قۋىرشاقتار ۇيىقتايدى
ايتقانىڭنان شىقپايدى
ال قوزى مەن قۇلىنشاق
ۇيىقتا دەسەڭ ۇقپايدى
تىڭدامايدى ۇرىسسا
وسىلارى دۇرىس پا؟
تەنتەكتىگىن تىيماسا
تۇرعىزامىن بۇرىشقا
- بۇگىنگى ۇيىمداستىرعان وقۋ - قىزمەتىمىز اياقتالدى. ساۋ بولىڭىزدار!

ماڭعىستاۋ وبلىسى، ءتۇپقاراعان اۋدانى،
باۋتين اۋىلى، «اقبوتا» بالاباقشاسىنىڭ تاربيەشىسى:
بەكجانوۆا مايرا

مەنىڭ ويىنشىقتارىم. جۇكتەۋ