InfoHub Logo

ەرتەدە قوتىر قوجا دەگەن مولدا ءدىن، شاريعات جايىن سىلقىتىپ سوعاتىن مولدا بولىپتى. جازدىڭ ءبىر كۇنىندە قوتىر قوجانى اۋىلداسى قوناققا شاقىرىپتى. ادامدار كوپ جينالعان ەكەن. مولدا ءتور الدىندا وتىرىپ الىپ، «وتىرىكتى شىنداي، شىندى قۇداي ۇرعانداي» قىلىپ اڭگىمەسىن سوعا بەرىپتى.

وتىرعان كوپتىڭ ىشىندە كورشى اۋىلدىڭ مىقى دەگەن جىگىتى دە بولاتىن. ونى «مىقى» دەيتىن سەبەبى — ول قىرعىز ەلىندە تۋىپتى. تۋعاندا كىپ كىشكەنتاي، شەگەدەي شىمىر بولعان سوڭ، كىندىگىن كەسكەن شەشەلەرى «ءوزى جىلامايتىن شەگەدەي ەكەن، اتىن مىقى قويايىق» دەپتى. سودان ونىڭ اتى مىقى اتالىپ كەتىپتى. ول وسە كەلە اكەسى سياقتى قارا سوزگە دەس بەرمەيتىن سوزشەڭ بوپتى.

الگى ءۇيدىڭ ەگەسى مىقىنىڭ قيىننان ءسوز تاباتىن شەشەندىگىن ءبىلىپ، ونى مولداعا قايراپ سالادى. ءسوز اراسىندا مىقى مولدانى بىر-ەكى رەت ءسۇرىندىرىپ تاستايدى. مىقىنىڭ سىرىن بىلەتىن قوتىر قوجا سوزدەن جەڭىلەتىنىن ءبىلىپ، ەندى ىممەن تىلدەسۋگە كوشەدى.

مولدا مىقىعا سۇق قولىن كورسەتسە، مىقى ءۇش ساۋساعىن كورسەتەدى. مولدا بەس ساۋساعىن تاربيتسا، مىقى وعان ەكى قولىن جايىپ، كوز الدىنا ۇستايدى. مولدا باسىن شايقاسا، مىقى ءتىلىن شىعارىپ، جۇدىرىعىن تۇيەدى.

وسىدان كەيىن شاماسى قوتىر قوجا جەڭىلسە كەرەك، ورنىنان تۇرىپ، ۇيدەن شىعا بەرىپتى. مولدا كەتكەن سوڭ كوپشىلىك: «كانە، نە دەدىڭدەر، ءبىز تۇسىنبەدىك قوي»، — دەسەدى. سوندا مىقى:

— مولدانىڭ ءبىر ساۋساعىن كورسەتكەنى — «ءبىر قۇدايدى بىلەسىڭ بە؟» دەگەنى ەدى. وعان ءۇش ساۋساعىمدى كورسەتتىم، ول: «ءبىر قۇداي تۇگىلى مەن مۇحاممەد پايعامباردى دا، يسا پايعامباردى دا بىلەمىن» دەگەنىم ەدى. مولدانىڭ بەس ساۋساعىن كورسەتكەنى — «بەس ۋاقتىلى ناماز وقيسىڭ با؟» دەگەنى ەدى. مەن وعان ەكى قولىمدى جايىپ، كوز الدىما ۇستادىم. ول: «مەن نامازىڭدى بىلمەيمىن، كىتاپ وقيمىن» دەگەنىم ەدى. ەڭ سوڭعى رەت مولدانىڭ باسىن شايقاعانى — «قۇدايدان بەزگەن» دەپ ماعان نارازى بولىپ، ءتىل تيگىزگەنى ەدى. مەن وعان ءتىلىمدى كورسەتىپ، جۇدىرىعىمدى تۇيگەنىم «ءتىلىڭدى تارت، بولماسا كورەسىڭ!» دەگەنىم ەدى. سول سول ەكەن، مولداەكەڭ جونەپ بەرگەن جوق پا؟ — دەپ مىقى ءسوزىن اياقتاپتى.

---