InfoHub Logo

ءالىباي دەگەن كىسى قوياندى جارمەڭكەسىنە كەلە جاتادى. مىنگەنى كۇزەۋلى بايتال ەكەن. ونىڭ ارتىنان ەكى جىگىت قۋىپ جەتىپ، كەكەتىڭكىرەپ سالەم بەرەدى. ءالىباي سالەمىن الىپ:

— جىگىتتەر، جولدارىڭ بولسىن! — دەيدى. مىنگەندەرى سەمىز ات، كەربەز كيىنگەن ەسەر جىگىتتەر ازىلدەپ:

— اقساقال، جول بولماق سىزدەن بولسىن. ءبارىمىزدىڭ بارار بەتىمىز ءبىر ەكەن. ءبىز مىنا بازارعا بارا جاتىرمىز. اركىم بارىن بازارعا سالادى عوي، العاشقى ساۋدا راقىم دەگەن، بايتالىڭىزدىڭ قۇيرىعىنىڭ قاداعىنا نە سۇرايسىز؟ — دەيدى.

ءالىباي ەكى جىگىتتىڭ وڭىنە كوز قيىعىن تاستاپ تانيدى، بىرەۋى جابىلبايدىڭ بالاسى اقان، ەكىنشىسى بەلگىلى ويىنشى ءزارۋباي ەكەن. بۇل ەكەۋىنىڭ دە مۇرىندارى قوڭقايعان، يىلگەن دوعاداي جوتالى ەكەن.

— جىگىتتەر، بازارلاس بولايىق دەگەندەرىڭ دۇرىس-اق. اركىم ءوز دۇنيەسىن بازارلايدى عوي. مەنىڭ بايتالىمنىڭ قۇيرىعىنا ۇستاپ ۋىس تولمايدى، ولشەپ تارازى قۋانبايدى. ساۋدا بولعان سوڭ ءونىمدى دۇنيەگە بولسىن. ەكەۋىڭنىڭ مۇرىندارىڭنىڭ قاداعىنا نە سۇرايسىڭدار؟ — دەيدى. ءالىباي وسىنى ايتقاندا-اق اناۋ ەكەۋى ءبىر قىرسىققا كەزدەسكەنىن سەزىپ، اتتارىن تەبىنىپ وزا جونەلەدى. ءالىباي دا ولاردىڭ ارتىنان قالماي جورتىپ وتىرادى. اقان مەن ءزارۋباي ەكەۋى قوي بازارىنا كەلەدى. كوپ كەشىكپەي ءالىباي دا جەتەدى.

— كانى، جىگىتتەر، العاشقى ساۋدا راقىم دەپ وزدەرىڭ ايتقانداي، مەنىڭ قولىم جەڭىل، مۇرىندارىڭنىڭ قۇنىن كەمىتپەيمىن، — دەگەندە، ەكى جىگىت اتتارىن سابالاپ تۇرا قاشادى. ءالىباي تاعى ارتتارىنان قالمايدى. ولار جىلقى بازارىنا كەلەدى، ءالىباي تاعى قۋا كەلەدى. ەكى جىگىت بازارعا سىيماي، مىڭعىش بالاسى ءسادۋدىڭ تىككەن ۇيىنە كەلىپ تىعىلادى. بۇلاردىڭ ىزىنە تۇسكەن ءالىباي دا ىلە قۋىپ كەلەدى.

ءالىباي كىرىپ كەلگەندە، اقان مەن ءزارۋباي قىسىلىپ قوزعالاقتاي باستايدى. ءالىباي ونان سايىن تۇيىلە:

— كانى، جىگىتتەر، مەنى زارىقتىرماڭدار، العاشقى ساۋدا راقىم دەپ وزدەرىڭ ايتتىڭدار. مىنا ءسادۋ مىرزانىڭ الدىندا كەلىسەلىك، مۇرىندارىڭنىڭ ناقتىلى ساتىلار باعاسىن ايتىڭدار. اكەمىز قازانعاپتىڭ توقال ايەلىنەن تۋىپ، جوتالى شوقىسى بار ادىرلى قونىس تيمەي قىرقا جوتانىڭ ءزارى ءوتىپ ەدى، ءتاڭىرى كەزدەستىرگەن شىعار. كەلىسەيىك. شىركىن اقاننىڭ مۇرنىن قويانسوققاننىڭ جەل جاعىنان ورناتىپ، ءزارۋجاننىڭ مۇرنىنىق جاعىنان ورناتىپ، اناۋ مۇرىن جاقتان تازىنى ۇستاپ، تۇلكى مىنا سەڭگىردەن شىعا كەلگەندە ايت دەپ قوسىپ جىبەرسەم، — دەپ تاياۋ وتىرعان ءزارۋبايدىڭ قولاعاشتاي مۇرنىنان شاپ بەرىپ ۇستاي الىپتى. ەل قىران كۇلكى، اقان مەن ءزارۋباي كۇلەرىن دە، جىلارىن دا بىلمەي:

— الەكە، ايىپ بىزدە، اڭداماي سويلەگەن اۋىرماي ولەدى دەگەن. ايىبىمىز، — دەپ ەكەۋى بەس سومنان ون سوم بەرىپ — ەندى وسى ءسوز وسى جەردە قالسىن، ەشكىمگە ايتا كورمەڭىز، — دەپ جالىنىپتى.

— ايتپايمىن، ايتىپ نە قىلايىن. ءبىراق ەكەۋىڭنىڭ مىنا مۇرنىڭ امان بولسا، مەنىڭ سوزىمە توقتاۋ بولار ما ەكەن، — دەپ ءالىباي ءجۇرىپ كەتىپتى. سول كۇننىڭ ەرتەڭىندە-اق مۇرىن ساۋداسى قوياندى جارمەڭكەسىنە تاراپ ۇلگەرىپتى.

---