InfoHub Logo

نۇرلان نوعايەۆ كاسىپكەرلەردى ادالدىققا شاقىردى. بۇل تۋرالى اتىراۋ ءوڭىرىنىڭ باسشىسى بۇگىن، 20 جەلتوقساندا وتكەن جۇمىس وتىرىسى بارىسىندا ايتتى. كەڭەس بارىسىندا وبلىستىڭ ەكولوگيالىق جاعدايى، سونىڭ ىشىندە قاراۋسىز قالعان مۇناي ۇڭعىمالارى ماسەلەسى ءسوز بولدى، — دەپ اتىراۋ وبلىسى اكىمىنىڭ باسپا ءسوز قىزمەتى حابارلايدى.

“ايماقتا جەر قويناۋىن پايدالانىپ وتىرعان كاسىپكەر ءوز ىسىنە ادال بولۋى كەرەك. ەڭ باستىسى حالىققا پايداسىن تيگىزۋ باعىتىندا جۇمىس ىستەۋى قاجەت”، - دەدى ايماق باسشىسى.

ايتا كەتەلىك، بۇعان دەيىن  اتىراۋ وبلىسىنداعى “كۇمىسبەك” كەن ورنىنداعى ەكى ۇڭعىمادان مۇناي توگىلىپ، تابيعاتقا زيان كەلىپ جاتقانى ايتىلعان ەدى. كەن ورنىن قىتايلىق ۇلەسى بار “كولجان ويل” كومپانياسى پايدالانىپ كەلگەن. الايدا جىل باسىندا فيرمامەن كەلىسىمشارت مەرزىمى اياقتالىپ، كومپانيا ۇڭعىمالارىن قاراۋسىز تاستاپ كەتكەن.

“كۇمىسبەكتەگى” قاراۋسىز قالعان ۇڭعىمالاردى ءوز اقشامىزعا بىتەۋگە ءماجبۇر بولدىق. ال بۇعان جاۋاپتى تۇلعالار بايلانىسقا شىقپاي وتىر.  بۇل، تۇپتەپ كەلگەندە، ولاردىڭ حالىق الدىنداعى جاۋاپكەرشىلىگىنىڭ جوقتىعى. سەبەبى، بۇل – حالىقتىڭ جەرى”، - دەدى نۇرلان نوعايەۆ.

ايماق باسشىسى  قاراماعىنداعىلارعا ۇڭعىما اينالاسىن تازارتىپ، توپىراق قاباتىن قالىپقا كەلتىرۋ جۇمىستارىمەن اينالىسۋدى تاپسىردى.

ايتا كەتەلىك، 2002-2009 جىلدار ارالىعىندا اتىراۋ وبلىسى اكىمدىگى ءوز كۇشىمەن قاراۋسىز قالعان 48 گيدروگەولوگيالىق ۇڭعىمانى بىتەگەن. قازىرگى قاراۋسىز قالعان ءقاۋىپتى مۇناي ۇڭعىمالارىن انىقتاپ، سولاردى تىعىنداۋ باعىتىندا جۇمىس ءجۇرىپ جاتىر.  

 

---