InfoHub Logo

(ۇستازدار كۇنىمەن وقۋشىنىڭ قۇتتىقتاۋى)

قۇرمەتتى ۇستازدار مەن وقۋشىلار! جىل سايىن جىل قۇسىنداي بولىپ اينالىپ سوعار ۇستازدار مەرەكەسى تاعى دا ەسىك قاعىپ تۇر. ۇستاز ماماندىعى قاي قوعامدا دا، قاي زاماندا دا ءقادىرلى دە قۇرمەتتى بولا ءبىلدى. ويتكەنى ۇستازدىق - تەك بۇگىننىڭ عانا ەمەس، كەلەشەكتىڭ، بولاشاقتىڭ جەمىسىن ماپەلەۋشى ۇلاعاتتى ءىس. كۇنى كەشە عانا مەكتەپ ەسىگىنەن تارىداي بوپ كىرىپ، اقىل دارياسى تولىسىپ تاۋداي بوپ شىعار ءاربىر شاكىرت - وسى ءبىر كيەلى ماماندىقتىڭ الدىندا ماڭگى قارىزدار. سەبەبى "ەسىمدە الىپپەنى جاتتاتقىزىپ، ەڭ العاش قولعا قالام ۇستاتقانىڭ" دەپ بەلگىلى ءان جولدارىندا ايتىلعانداي، ءبىلىم كەمەسى مەكتەپ تابالدىرىعىنان اتتاعاندا، كۇلىمسىرەي قارسى الىپ، قولىڭنان جەتەلەپ پارتاڭا اكەپ وتىرعىزاتىن العاشقى ۇستازىڭنان باستاپ، ءاربىر عىلىم سىرىنىڭ نەگىزدەرىن جالىقپاي ۇيرەتەر جوعارى سىنىپ ۇستازدارىنىڭ بارلىعى دا شاكىرت جۇرەگىنە ءوز ءىزىن قالدىرىپ ۇلگەرەدى.

كەڭ بايتاق رەسپۋبليكامىزدىڭ كۇللى ۇستازدارى مەرەكەلەپ جاتقان وسىناۋ ۇستازداردىڭ كاسىبي مەرەكەسى - مۇعالىمدەر كۇنى مەرەكەسى دە ءبىزدىڭ التىن ۇيامىز بوپ سانالار مەكتەبىمىزدە اتالىپ ءوتىلىپ وتىر. ءدال وسى كۇنى مەكتەپ ۇجىمى عانا ەمەس، بارشا وقۋشى قاۋىمى دا وسىناۋ مەرەكەگە ىقىلاستانا دەن قويۋدا. بالكىم، ءدال وسى كۇنى مەكتەپ قابىرعاسىندا بىلىممەن قارۋلانىپ، ىزەتتى تاربيە كورىپ جۇرگەن ءبىز عانا ەمەس، كەشە نەمەسە ودان ارعى جىلداردا دا وسى مەكتەپتى ءتامامداپ، بۇل كۇندە ءار شالعايدا وزىنە جۇكتەلگەن ءومىر جۇگىن ارقالاپ جۇرگەن تۇلەكتەر دە ءوز ۇستازدارىن ەسكە العان شىعار. بۇگىنگى مەكتەپ ومىرىنە ەتەنە ارالاسىپ جۇرگەن بىزدەر دە سول تۇلەكتەرىمىز سەكىلدى ۇستازدارىمىزدى ەرەكشە قۇرمەتتەيمىز. ويتكەنى، قۇرمەتتى ۇستازدار، ءبىلىم نارىمەن سۋسىنداتىپ، جىلى سوزدەرىڭىزبەن دەمەپ، بولاشاق دەپ اتالاتىن اسپاني الەمگە جەتەلەپ اپارار - تەك سىزدەرسىزدەر. مۇمكىن سىزدەردىڭ ۇلىلىقتارىڭىز دا وسىندا جاتقان شىعار. سىزدەر ءبىزدىڭ جاساعان ءاربىر ۇلگىلى ىستەرىمىزبەن ماقتانساڭىزدار، ءبىز دە ءوز ۇستازدارىمىزدىڭ ۇستازدىق قاسيەتتەرىمەن ماقتانا الامىز. شاكىرت جۇرەگىنە تەك قانا ىزگىلىك نۇرىن سەۋىپ، ەرتەڭگى بولاشاعىمىزعا دەگەن قاجەتتى تىلدەرمەن انا تىلىمىزدەن كەم سۋسىنداتپاي جۇرگەن، تەحنيكا، اسپان الەمى، تابيعاتتىڭ وزىمەن ەتەنە سىرلاستىرىپ، قۇپياسى مول قىزىقتى پاندەردى جالىقپاي ۇيرەتىپ جۇرگەن ۇستازدارىمىزبەن قالايشا ماقتانباسپىز. ماقتانارمىز دا، قۇرمەتتەرمىز دە ولاردى.

بالا شاقتان ماپەلەپ،
بولاشاققا جەتەلەپ،
ۇستازداردىڭ ارقاسى
باسساق قادام توتەلەپ.

وڭ-سولىڭدى تانىتقان،
شەرتىپ شەجىرە تاريحتان.
ۇعىندىرسا ۇستازىم،
تىڭداۋدان مەن جالىقپان.

وتسە وزىڭدە كوكتەمىم،
ءبىلىم ءنارىن توككەنىڭ.
ىستىقسىڭ سەن بارشاعا،
التىن ۇيام - مەكتەبىم.

ۇستازدارىم، اسىلىم،
مەرەيلەرى تاسىعىن.
بەرە بىلگەن شاكىرتكە
ءبىلىمنىڭ بار اسىلىن.

قوسىلىپ تىلەك تىلەككە،
كوبەيسىن، كەلسىن بەرەكە.
قۇتتى بولسىن، ۇستازىم،
كاسىبي وسى مەرەكە!

قۇرمەتتى ۇستازدار! سىزدەردى وسىناۋ كاسىبي مەرەكەلەرىڭىزبەن شىن جۇرەكتەن قۇتتىقتايمىز. سىزدەردىڭ وتباسىلارىڭىزدىڭ بەرەكەلى، ۇجىمدارىڭىزدىڭ مەرەكەلى، كوڭىلدەرىڭىزدىڭ شۋاقتى، دەنساۋلىقتارىڭىزدىڭ قۋاتتى، ىستەرىڭىزدىڭ التىن، جۇزدەرىڭىزدىڭ جارقىن بولۋىنا، جۇرەكتەرىڭىزگە نۇر، قادامدارىڭىزعا گۇل بىتۋىنە شىن جۇرەكتەن تىلەكتەسپىز. ءار ۋاقىتتا شاكىرت قۇرمەتىنە بولەنە بەرىڭىزدەر. مەرەكە تاعى دا قۇتتى بولسىن، قىمباتتى ۇستازدار!

---