InfoHub Logo

بۇگىن جاستاردى جۇمىسپەن قامتۋ ماسەلەلەرىنە ارنالعان جينالىس بارىسىندا اتىراۋ وبلىسىنىڭ اكىمى نۇرلان نوعايەۆ ءبىلىم گرانتتارىن ءبولۋ ءتارتىبىن جۇيەلەندىرۋدى جانە «جاسىل ەل» ستۋدەنتتەر جاساعىنىڭ سانىن ارتتىرۋدى تاپسىردى.

«2017 جىلى «جاسىل ەل» ەڭبەك ۇجىمىنىڭ سانى ارتادى. ەگەر بىلتىرعى جىلى ءار اۋداندا 50 ادامنان بولسا، بيىل ولاردىڭ سانى 60-تان 75-كە دەيىن ارتادى. ودان بولەك، جۇمىسشىلاردىڭ ەڭبەك اقىسى كوبەيەتىن بولادى. 2015-2016 جىلدارى جالاقى 47 729 تەڭگە بولسا، 2017 جىلى 59 000 تەڭگەنى قۇرايدى»، - دەپ مالىمدەدى جاستار ساياساتى ماسەلەسى بويىنشا باسقارما باسشىسى جاسلان بيسەمبايەۆ.

وبلىس اكىمى نۇرلان نوعايەۆتىڭ جينالىسىنا قاتىسۋشىلاردىڭ ءبىرى قويعان «جاسىل ەل» قىزمەتىندەگى ستۋدەنتتەر سانىن نەگە ارتتىرماسقا دەگەن سۇراققا، بيسەمبايەۆ باعدارلاماعا رەسپۋبليكالىق بيۋدجەتتەن دەمەۋشىلىك تانىتىلۋدا دەپ جاۋاپ بەردى.

«بۇل ماسەلەنى شەشەمىز، ۇسىنىستى دايىنداڭىزدار، جەرگىلىكتى بيۋدجەت ستۋدەنتتەرگە ارنالعان قوسىمشا جۇمىس ورىندارىن قۇرۋ ءۇشىن قارجى بولەدى. وبلىستاعى مەكتەپتەردىڭ جوعارى سىنىپتارىندا 26 مىڭ بالا، جوو-دا  10 مىڭ ستۋدەنت پەن كوللەدجدەردە 18 مىڭ ءبىلىم الۋشى بار. ءبىز ولاردىڭ كوپ بولىگىن قامتاماسىز ەتۋىمىز كەرەك، جاز ايلارىندا جۇمىس تاۋىپ بەرۋىمىز قاجەت. ءبىز مەملەكەتتىك باعدارلاما بويىنشا كوپتەگەن نىساندار سالىپ جاتىرمىز، نەلىكتەن اقشا تاپقىسى كەلەتىن ستۋدەنتتەردى قۇرىلىسقا جۇمىلدىرماسقا؟»، - دەدى اكىم.

نۇرلان نوعايەۆ ءبىلىم گرانتتارىن بولۋگە قاتىستى ءبىلىم باسقارماسىنىڭ باسشىلىعىنا سىن ايتتى.

«نەگە قازاق تىلىندە باستاۋىش سىنىپتارعا ءبىلىم بەرەتىن ماماندىقتى يگەرىپ شىققان ماماندار جۇمىسسىز وتىر؟ سەبەبى، مەملەكەتتىڭ ءبىلىم گرانتىن يەلەنىپ، ماماندىقتى يگەرىپ شىققاننان سوڭ ولار شىنايى ومىرمەن كەزدەستى. ءبىزدىڭ وبلىس ورىس تىلىندە باستاۋىش سىنىپتارعا ءبىلىم بەرەتىن ماماندارعا تاپشى بولىپ وتىرعاندا، كەيبىر اۋدانداردا قازاق تىلىندە باستاۋىش سىنىپتارعا ءبىلىم بەرەتىن ءمۇعالىمنىڭ ورنىنا 30 ادامعا دەيىن ۇمىتتەنۋدە. ءپان مۇعالىمدەرى جەتىسپەيدى. ءبىلىم گرانتتارىن ناقتى ءبولىپ، ۇگىت-ناسيحات جۇمىستارىن ءوز ءومىرىن پەداگوگيكاعا ارناعىسى كەلگەن ادامداردىڭ اراسىندا جۇرگىزۋ قاجەت. ءبىزدىڭ قولىمىزدا قاجەتتى ماماندىقتاردى زەرتتەۋگە ارنالعان بارلىق مۇمكىندىك بار: ءبىلىم گرانتتارى، جاس ماماندارعا ارنالعان باعدارلامالار، وسى ارقىلى مۇعالىمدەردىڭ جەتىسپەۋشىلىك ماسەلەسىن ءبىرجولا شەشۋ قاجەت. ساراپتاما جاساپ، قاجەتتى ماماندىقتارعا گرانت بولۋگە قول جەتكىزىڭىزدەر»، - دەپ تاپسىردى ن.نوعايەۆ. 

---