InfoHub Logo

بۇگىن، 18 قاڭتاردا وتكەن جاستار ماسەلەلەرى تۋراسىنداعى جينالىستا ولجاس سۇلتانوۆ اتىراۋ وبلىسىنىڭ اكىمى نۇرلان نوعايەۆقا جوباسىن كورسەتتى.

"اتىراۋ قالاسىنا جاستارعا ارنالعان زاماناۋي ساياباق كەرەك دەپ ويلايمىن. سول سەبەپتى "بانان باعى" جوبامدى ۇسىنامىن. قالانىڭ ەۋروپا بولىگىندە دوسمۇحامەدوۆ ۋنيۆەرسيتەتىنىڭ ارتىندا ءپىشىنى بانانعا ۇقسايتىن جەر اۋماعى بوس جاتىر. جايىقتىڭ جاعاسىندا ورنالاسقان سول جەرگە جاستارعا ارنالعان زاماناۋي ب ا ق تۇرعىزۋدى ۇسىنامىن"، - دەدى ولجاس سۇلتانوۆ.

جوبا اۆتورىنىڭ ايتۋىنشا، ب ا ق ىشىندە مۇز ايدىنى، اتتراكسيوندار، سپورت كەشەنى، بالالارعا ارنالعان ويىن الاڭى، امفيتەاتر، ۆەلوسيپەدشىلەرگە، سكەيتبوردشىلارعا ارنالعان سپورت الاڭقايى، جايىق بويىمەن سەرۋەن قۇرۋعا مۇمكىندىك بەرەتىن قايىقتار مەن كاتاماراندار بولادى.

"بۇل يدەيا ماعان قالانى دامىتۋ تۋرالى بولعان پىكىر الماسۋلاردىڭ بىرىندە كەلدى. جاستارعا مۇنداي ب ا ق اۋاداي قاجەت دەپ ويلايمىن. بۇل ولاردىڭ ۋاقىتىن ءتيىمدى وتكىزىپ، وعاش ادەتتەردەن اۋلاق بولۋىنا سەبەپ بولادى"، - دەيدى جاس زاڭگەر.

اتىراۋ وبلىسىنىڭ اكىمى نۇرلان نوعايەۆ اتىراۋ قالاسى اكىمىنىڭ ورىنباسارى مەيىرىم قالاۋيعا جوبانى مۇقيات زەرتتەپ، ۇسىنىس ەنگىزۋدى تاپسىردى. ايماق باسشىسى، سونىمەن قاتار، جاستاردىڭ ۋاقىتىن ءتيىمدى پايدالانىپ، وز-وزدەرىن دامىتۋى ءۇشىن بار جاعدايدىڭ جاسالىپ جاتقانىن تىلگە تيەك ەتتى.

"جاستاردىڭ ۋاقىتىنىڭ ءتيىمدى، ءارى ساپالى ءوتۋى ءۇشىن بيىل "جاسىل ەل" اكسياسى بويىنشا اشىلاتىن جۇمىس ورىندارىنىڭ سانىن جەرگىلىكتى بيۋدجەت ەسەبىنەن كەمىندە 3 ەسەگە دەيىن ارتتىرۋىمىز كەرەك. بۇل جاستاردىڭ جازعى دەمالىس ۋاقىتىندا بوس جۇرمەي، اقشا تاۋىپ، تاجىريبە جيناۋىنا ۇلكەن كومەك بولادى. دەمالىس ورىندارىنىڭ كوپ بولۋى ولاردىڭ مادەنيەتى جوعارى، ءبىلىمدى مامان بولىپ ءوسىپ شىعۋىنا سەپتىگىن تيگىزەدى"، - دەدى نۇرلان نوعايەۆ.

ايتا كەتەيىك، اتىراۋ قالاسىندا 10 ساياباق جۇمىس ىستەپ تۇر. ولاردىڭ جالپى اۋدانى - 20 گەكتار. بۇلاردىڭ قاتارىنا جاقىن ارالىقتا جالپى اۋدانى 21 گەكتار بولاتىن 3 ساياباق قوسىلماق.

---