«ولگەن» قازان
ءبىر كۇنى قوجاناسىردىڭ ۇيىنە قوناق كەلىپ قالادى. قوجاناسىردىڭ ۇيىندە كىشكەنە عانا قازان بار ەكەن. بۇل كىشكەنە قازانعا پىسىرگەن اس قوناقتارىنا جەتپەيتىن بولادى. سوندىقتانقوجاناسىر كورشىلەس وتىرعان بايدىڭ ۇلكەن قازانىن سۇرايدى. باي قازانىن بەرگىسى كەلمەي، قيپاقتايدى. قوجاناسىر ولەردەگى ءسوزىن ايتىپ، قازاندى زورعا سۇراپ الادى. تاماقتارىن ءىشىپ، قوناعىن جونەلتىپ بولعان سوڭ، قوجاناسىر بايدىڭ قازانىن الىپ بارادى.
باي تۇرىپ:
— ۋا، قوجا، قازانىمدى سىندىرعان جوقپىسىڭ؟ — دەپ سۇرايدى.
— جوق، تاقسىر، قازانىڭىز سىنعان جوق، قايتا بالالادى! — دەيدى قوجا.
— نە ايتىپ تۇرسىڭ؟ قازان بالالاي ما ەكەن؟ — دەيدى باي.
— سەنبەسەڭىز، كەلىپ كورىڭىز! مىنە، قازانىڭىزدىڭ بالاسى، — دەپ قوجاناسىر بايدىڭ قازانىنىڭ ىشىنەن ءبىر كىشكەنە قازاندى الىپ كورسەتتى.
بۇل قوجاناسىردىڭ: «باي نە ايتار ەكەن؟» — دەپ ادەيى اكەلگەن ءوز قازانى ەدى. ءبىراق «كىشكەنە قازانىمدى وزىمە قايتارىپ بەرەر» دەپ ويلاعان ەدى ول. قولىنا تۇسكەن ولجادان باي تەگىن ايرىلار ما؟
— ۋا، قوجا، راقمەت، ساۋ بول! كەرەك بولسا، قازاندى تاعى دا الىپ تۇرۋىڭا بولادى، — دەيدى باي كوڭىلدەنىپ. ءبىر قازانى ەكەۋ بولعان سوڭ كوڭىلدەنبەي ءقايتسىن؟! قوجا قازانسىز قالادى. ءبىراق امال نە؟ اكەلگەن ءوزى. قازانىن تاستايدى دا، قوجاناسىر ۇيىنە قايتادى. «بۇل باي يتكە ءبىر نارسە ىستەيىن»، — دەپ ويلايدى قوجاناسىر ۇيدەن شىعا بەرە جاتىپ.
ءبىراز ۋاقىت وتكەن سوڭ قوجاناسىر الگى بايدىڭ قازانىن تاعىدا سۇراي كەلەدى.
— الىڭىز، الىڭىز، قوجەكە! — دەيدى قازانى قازان تاۋىپ، دانىگىپ قالعان باي. «بۇل جولى دا قوجاناسىر قازانىمنىڭ ىشىنە ءبىر نارسە سالىپ اكەلەر»، — دەپ ويلايدى ارانى اشىلعان باي.
قوجا بايدىڭ قازانىن قايتارماي قويادى. ءبىر كۇن وتەدى، ەكى كۇن وتەدى، ءۇشىنشى كۇنى باي قازانىن ءوزى ىزدەپ كەلەدى.
— بايەكە، ايىپقا بۇيىرا كورمەڭىز! قازانىڭىز ەكى كۇن اۋىرىپ، بۇگىن ءولدى. ءقازىر ءوزىم بارىپ سىزگە ەسكەرتىپ، كوڭىل ايتقالى وتىر ەدىم، — دەيدى قوجاناسىر قىنجىلىپ. باي اشۋلانىپ، بۇلقان-تالقان بولادى.
— اقىماق! نە ايتىپ وتىرسىڭ؟ قازان ولە مە ەكەن؟ تەز تاۋىپ بەر! — دەپ اقىرادى.
— بايەكە، سوكپەڭىز! تۋا بىلگەن قازان ولە دە بىلەدى. مەن اقىماق ەمەس، سەن ءوزىڭ اقىماقسىڭ! — دەيدى. باي سوزدەن جىعىلىپ، ۇيىنە قايتىپ كەتىپتى.
You Might Also Like
-
قوجاناسىر شاشتارازعا ساقال-مۇرتىن الدىرۋعا بارادى. شاشتارازدىڭ ۇستاراسى وتپەي، باس تەرىسىنىڭ قۇيقالارىن قىرقىپ، كەسىپ العان جەرىنە اق ماقتانى جالبىراتىپ قويا بەرىپتى. قوجاناسىر ناسىباي شاقشاسىنىڭ اي...
