ءومىرىڭىزدى مىندەتتى تۇردە قيىنداتىپ بەرەتىن 9 دەموتيۆاتور
ءوز ءومىرىڭىزدىڭ دە، اينالاڭىزداعىلاردىڭ ءومىرىنىڭ دە تۋ-تالاقايىن شىعارماۋ ءۇشىن نە ىستەمەۋ كەرەك.
1. جۇرتتىڭ مىيىن اشىتىڭىز
ءسىز ادامدى جىگەرلەندىرەتىن كىتاپتاردىڭ ءتىزىمىن جاساپ، كوپتەگەن قىزىقتى ۆەبينارلاردىڭ سىلتەمەلەرىن جيناقتاپ، الەۋمەتتىك جەلىلەردە تابىسقا جەتكەن كىسىلەرمەن دوستاسىپ الدىڭىز با؟ بۇنىڭىز بەكەر بولدى. شىنايى ادام بولسىن، ۆيرتۋالدى ادام بولسىن، ونىڭ مىيىن اشىتاتىن قىزىقتى ءىس تۇرعاندا ءوزىڭىزدى دامىتۋعا التىن ۋاقىتىڭىزدى قور قىلىپ قايتەسىز؟
بۇل جەردە سوزىڭىزگە دالەلدەمەلەردىڭ مۇلدەم كەرەگى جوق. باستىسى — قارسى ەكەنىڭىزدى بىلدىرسەڭىز بولدى. تالقى نىسانى نەعۇرلىم ماعىناسىز بولسا، سوعۇرلىم جاقسى.
سوسىن كەز كەلگەن ءوزىنىڭ ونىمدىلىگىن ارتتىرۋعا تىرىسىپ جۇرگەن ادامدى جەك كورەتىنىڭىزدى ءجيى-جيى ايتىپ تۇرىڭىز.
2. جيناپ-تازالاۋ دەگەندى ۇمىتىڭىز
ەگەر ءسىز بارلىق ەرەجەگە ساي ءۇيدى جيناپ، تازالاۋدى (ياعني بۇنى تەز ءارى پارمەندى ىستەۋدى) ۇيرەنىپ العان بولساڭىز، بۇنى ۇمىتقانىڭىز ابزال. قالايماقان، ىبىرسىپ جاتقان قوقىر-سوقىر، شۇڭعىلشادا ءۇيىلىپ جاتقان ىدىس-اياق پەن شاڭ-توزاڭ — پروكراستيناسيانى ءوربىتۋ ءۇشىن تاپتىرماس ورتا. بىزگە كەرەگى دە وسى بولىپ وتىر ەمەس پە؟
3. ءبىر ورىننان جىلجىماڭىز
تاۋدى قوپارىپ، اقىرىندا قالاۋىڭىزعا قول جەتكىزۋگە سەپ بولاتىن «العاشقى قادام» ەرەجەسىن قولدانۋدان باس تارتىڭىز. اۋىز تولتىرىپ ايتارلىقتاي ناتيجەسى بولاتىن قاراپايىم اركەتتەردى ىستەۋ — بىزگە قول بولاتىن نۇسقا ەمەس.
ءبىر ورىننان تاپجىلماڭىز، ءومىردىڭ قانداي قيىن ەكەنى، اينالاڭىزداعىلار سىزگە كومەكتەسۋگە ەشقانداي قۇلىق تانىتپايتىنى جايلى ويلانىڭىز. ناشار، ءبىر راقمەتى جوق ادامدار.
4. وي-تالقى جاساۋدان باس تارتىڭىز
دوستارمەن بىرگە وي-تالقىلار ۇيىمداستىرۋ ارقىلى پروبلەمالاردى شەشۋگە، بەلگىلى ءبىر ماقسات ءۇشىن بىرىككەن جانە دۇرىس شەشىمدەردى تابۋ ءۇشىن جولىعاتىن قاۋىمداستىققا قوسىلۋعا بولادى.
الايدا، وزىڭمەن ءوزىڭ توماعا تۇيىق بولىپ، تالقىلاۋعا قاتىسپاي، ءۇنسىز ازاپ شەككەن جاقسى. كور دە تۇر، دىتتەگەن ماقساتىڭا جەتەسىڭ — تۇك تە شىقپايدى.
5. كۇزتىبەنى لاقتىرىپ جىبەرىڭىز
ماقساتىنا اپاراتىن جولىن قاداعالاپ، تىندىرىلعان ءىسىن كورىپ شابىتتانۋ، كەتكەن قاتەلىكتەرىن تالداۋ، ەسكە سالارلار قويۋ جانە ت.ب. ءۇشىن تابىستى كىسىلەر قاعاز كۇنتىزبەلەر مەن ەلەكتروندى قوسىمشالاردى پايدالانادى.
ولاردىڭ ىستەگەنىن قايتالاماڭىز. ءسىزدىڭ ومىرىڭىزدە ماڭگىلىك تۇنجىراعان دۇيسەنبى بولسىن.
6. تەلەديداردى كوبىرەك كورىڭىز
ويانا سالىپ تەلەديداردى قوسىڭىز، شەتسىز-شەكسىز تەلەشوۋلارى بولىپ جاتاتىن درايۆتىك ارنالار بولگانى دۇرىس. ەڭ جاقسىسى، بۇل «دۇنيەگە اشىلعان كوزدەر» كوپ بولسىن — ءار بولمەدە بىر-بىردەن، ال اسۇيدە مىندەتتى تۇردە بولسىن.
«قالاۋلىم» مەن «پەندەمىز عويدىڭ» بىردە-بىر شىعارىلىمىن كورمەي قالماڭىز، سەريالداردىڭ كەيىپكەرلەرىمەن، اسىرەسە سەريالارىنىڭ سانى جۇزدەن اسىپ كەتسە، مۇقيات تانىسىپ الاڭىز.
ايتپاقشى، تەلەديداردى تۇندە دە وشىرمەي-اق قويۋعا بولادى: تانىمال سەريالدىڭ قۇلاققا جاعىمدى بىلدىرى-باتپاعى مازاسىز ۇيقى ءۇشىن قۇتتى فون بولىپ تۇرادى.
7. ناتيجەگە كوڭىل ءبولىڭىز
ەگەر ءسىز ايتەۋىر بۇل جان تۇڭىلتەر ومىردە بىردەڭەگە قول جەتكىزۋدى ۇيعارساڭىز، دۇرىس ارەكەت ەتىڭىز. ىس-ارەكەتكە ەمەس، ناتيجەگە ءساپ سالىڭىز. ارداقتى ارمانىڭىز ورىندالسا، بىلاي بولار ەدى دەپ ويلاڭىز (جالپى ولاي ەتكەندە بىلاي بولار ەدى دەگەندى كوبىرەك قولدانىڭىز).
بۇدان باسقاسى — جوسپاردى پىسىقتاۋ، ستراتەگيانى قۇرۋ، العاشقى قادامدار، قاتەلىكتەردى ساراپتاۋ مەن ىس-ارەكەتتى ناقتىلاۋ، تيىمدىلىكتى ارتتىرۋ جانە سول سياقتىلاردىڭ — مۇلدەم ماڭىزى جوق. بۇل جاقسى ىنتالاندىرادى.
8. جيىرەك اقتالىڭىز
وزىڭىزگە نەشە ءتۇرلى سىلتاۋ تاۋىپ اقتالا بەرۋ — وتە قىزىقتى ءىس. تىعىز شارۋالاردى ەرتەڭگە (شەبەرلىگىڭىز ابدەن شىڭدالعان كەزدە ءتىپتى بىرسۇگىنگە) قالدىرۋ ءۇشىن ءسىز كۇن سايىن جاڭا ءبىر جەلەۋ تابا الاسىز.
تالاپتى دا ىنتالى ادامدار، ادەتتە، اقتالۋشىلىقتى جامان ادەت دەپ بىلەدى جانە ءوز باقىتىن تۇسىنبەي، ول ادەتتەن ارىلعىسى كەلەدى.
9. جاقسى ادەتتەردەن باس تارتىڭىز
ادەتتەر تەك قانا جامان، زياندى بولۋى ءتيىس. بۇكىل ءبىر جۇيەنى قۇرا وتىرىپ، ءوزىن دامىتىپ-جەتىلدىرەتىندەر الدەبىرەۋ سپورتزالدا تەرلەپ-تەپشىپ جاتتىعىپ جاتقان كەزدە ديۆاندا جاتقانننىڭ قانداي راحات ەكەنىن بىلمەيدى. فاستفۋد قانداي ءدامدى، قانداي جۇعىمدى ەدى، شىركىن، جالقاۋلىق قانداي جانعا جاعىمدى ەدى…
جامان ادەتتەر سىزدەرگە وزدەرى كەلىپ جابىسا قالادى، ول ءۇشىن ەشتەڭەگە تىرىسۋدىڭ قاجەتى جوق. ولاردىڭ عاجاپتىعى دا وسىدا.
You Might Also Like
-
زاموسكۆورەچە. شاتىرىندا كۇركەسى بار اعاش ءۇي. كوگىلدىر بوياۋمەن ادەمى سىرلانعان، تەرەزەلەرى جارقىراپ تۇر. الدىندا ۇيمەلەگەن توبىر، قازىنانىڭ ۇلكەن ماشيناسى. اشىق ەسىكتەن جوعارىعا شىعار باسپالداققا ت...
