InfoHub Logo

بۇگىن كۇن ەرەكشە جايدارى. «الاتاۋ» ۇلتتىق ەتنوگرافيالىق ءانسامبىلى ورىنداعان تۇركەشتىڭ «كوڭىل اشارى» قازاقتىڭ كەڭ اتىرابىن ەلەستەتەدى. دومبىرا دابىسى بىردە زاڭعار بيىككە شارىقتاپ، بىردە كوكتە ەركىن قالىقتاي تۇسكەن. ۇلتتىق ونەردى سۇيەتىن، ونەرلىگە باس يەتىن حالىق تۇگەل وسىندا. قالامىزداعى مەتروپوليتەننىڭ «المالى» بەكەتىندە بۇگىن كەزەكتى شارا – قولونەر شەبەرلەرىنىڭ كورمەسى ءوتتى. ت.جۇرگەنوۆ اتىنداعى ۇلتتىق ونەر اكادەمياسى ۇيىمداستىرعان شىعارماشىلىق كورمە ونەر سۇيەر قاۋىم مەن قالا تۇرعىندارىنا ۇسىنىلدى.

مەرەكەلىك شارا ەلباسىنىڭ  «بولاشاققا باعدار: رۋحاني جاڭعىرۋ» جانە قازاقستاننىڭ ءتورتىنشى وندىرىستىك ريەۆوليۋسيا داۋىرىندەگى وركەندەۋىنە  باعىتتالعان. بۇل تۋرالى ونەر اكادەمياسىنىڭ تاربيە ءىسى جونىندەگى پرورەكتورى ەرگوبەك شىڭعىس قۇلبەك ۇلى:
– ەلباسىمىز اتالعان تاقىرىپتى قوزعاي وتىرىپ، ەڭ نەگىزگى ەرەكشەلىك رەتىندە ۇلتتىق ونەردى دامىتۋعا باسا نازار اۋدارعان بولاتىن. شىعارماشىلىق كورمە ەلباسى جولداۋىن قاراپايىم ەمەس، بارشا ادامزاتتى بىرىكتىرەتىن ورتاق، ءارى قۋاتتى «ونەر تىلىمەن» جەتكىزبەك. الەمدىك وركەنيەتتە حالىقتىڭ وزىندىك ىقپالىن قالىپتاستىراتىن – مادەنيەتى مەن ونەرى. ال قوعامدى ەتيكالىق، ەستەتيكالىق تۇرعىدا بايىتۋ – ۇلتتىق ونەر اكادەمياسىنىڭ باستى ماقساتى. بۇل ميسسيانى اكادەميا ۇجىمى، تالانتتى ستۋدەنتتەرى ءوز دەڭگەيىندە اتقارىپ كەلەدى. الداعى ۋاقىتتا وسى سىندى قويىلىمداردى ۆەرنيساج، يتاليا، فرانسيادا قويۋ كوزدەلۋدە، – دەدى.

 

اينالانى قورشاعان قولونەر تۋىندىلارى كوپشىلىكتىڭ كوزايىمىنا اينالىپ، ەرەكشە اسەر قالدىردى. اسىرەسە، ب.ءبايدىلدانىڭ «باتىر باۋىرجان» موزايكاسى، ب.دوسجانوۆتىڭ الليۋمينييدەن جاسالعان «كەرۋەنى» جانە ۇزاقباي اسىلاننىڭ «باقسى» ءمۇسىنى حالىق نازارىن اۋداردى. قولونەر شەبەرلەرىنىڭ قولىنان شىققان تاڭعاجايىپ تۋىندىلار ۇلتتىق قۇندىلىقتى، ءسالت-داستۇرىمىزدى دارىپتەپ تۇر. ەكىنشى بولىمدە اكادەميا تۇلەكتەرىنەن قۇرالعان «الاتاۋ» ەتنوگرافيالىق ءانسامبىلى نۇرعيسا تىلەندييەۆتىڭ «اتا تولعاۋى» مەن ءابدىمومىن جەلدىبايەۆتىڭ «ەركە سىلقىم»-ىن ناقىشىنا كەلتىرە ورىنداعاندا، جينالعان جۇرت سىلتىدەي تىندى.

شىعارماشىلىق كورمەدە ستۋدەنتتەرمەن قاتار، ق ر كەسكىندەمە جانە ءمۇسىن ونەرىنىڭ مايتالماندارى ب.دوسجانوۆ، ج.قايرامبايەۆ، ق.وسپانوۆ، م.جۇنىسبايەۆ، ب.تۇرعىنباي، ب.ءبايدىلدا، س.تاينوۆ، ا.ابجانوۆا سىندى ونەر قايراتكەرلەرىنىڭ جۇمىستارى قويىلعان. توردە تۇرعان «ەلباسى» پورترەتى باس قالامىز استانانىڭ 20 جىلدىق مەرەيتويىنا وراي سۋرەتشى داۋرەنبەك بەكنازاروۆتىڭ تارتۋى. وسى رەتتە شەبەردى سوزگە تارتقان ەدىك:
– كارتينا «رۋحاني جاڭعىرۋ» باعدارلاماسىنا وراي سالىنعان. سونداي-اق، بيىل استاناعا 20 جىل تولماقشى. 4 اي ۋاقىتتى قامتىعان كارتيناداعى باس كەيىپكەر – ەلباسى. ال ارتىنداعى جاستار – بولاشاققا نىق قادام جاسايتىن ەل ەرتەڭى. استانانىڭ اسەم عيماراتتارى دا جاسامپاز مەملەكەت ەكەندىگىمىزدىڭ بەلگىسى ىسپەتتى.

شارانى وتكىزۋگە الماتى مەتروپوليتەنى جانە قالالىق مادەنيەت باسقارماسى ۇلەس قوسقان. ۇلى ونەردى دارىپتەپ، جاڭعىرتۋدى داستۇرگە اينالدىرعان الماتى مەتروپوليتەنىنىڭ باسپا ءسوز حاتشىسى يگور ساحار:
– جىلدا مەترو بەكەتتەرىندە 30-عا جۋىق ءتۇرلى كورنەكتى شارالار وتكىزىلىپ تۇرادى. ماسەلەن، بايقوڭىر بەكەتىندە كىتاپ كورمەسىنىڭ فەستيۆالىن وتكىزۋ قولعا الىندى. ال بۇگىن ءبىز المالى بەكەتىندە ت.جۇرگەنوۆ اتىنداعى ۇلتتىق ونەر اكادەمياسىنىڭ تۇلەكتەرىمەن بىرلەسە ۇلتتىق ونەرگە باعىتتالعان قولونەر كورمەسىن ۇيىمداستىرىپ وتىرمىز. وسى تەكتەس ءىس-شارالار جاستاردى پاتريوتتىق سەزىمگە ۇندەپ، ونەرگە دەگەن سۇيىسپەنشىلىكتى ارتتىرادى، – دەدى.
 

سءوز سوڭىندا. كورمەدەن كورگەنىمىز كوپ، تۇيگەنىمىز مول بولدى. شىعارماشىلىققا قۇشتار، شىن تالانتتى جاستاردىڭ كوبەيگەندىگى قۋانتتى. جوعارى دارەجەدە ۇيىمداستىرىلعان قولونەر كورمەسىنەن قوناقتار دا، كوپشىلىك تە تاڭدانىسپەن قايتتى. الداعى ۋاقىتتا ۇلتتىق ونەردى، ءداستۇرىمىزدى ۇلىقتايتىن ءىس-شارالار لەگىنىڭ تولاستاماسىنا كامىل سەنەمىز.

                               

اراي جۇماتاي،
ءال-فارابي اتىنداعى قازۇۋ،
جۋرناليستيكا فاكۋلتەتى، ءىى كۋرس

---