وقو ۇستازدارى فرانسيادان تاجىريبە الماسۋى مۇمكىن
كەشە وقو اكىمى جانسەيىت تۇيمەبايەۆ فرانسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن باستاپ كەلگەن ءبىر توپ دەلەگاتتارمەن كەزدەستى، دەپ حابارلايدى وقو اكىمىنىڭ باسپا ءسوز قىزمەتى.
ءوڭىر باسشىسى شەتەلدىك قوناقتارعا وڭتۇستىك قازاقستان وبلىسىنىڭ ينۆەستيسيالىق مۇمكىندىكتەرى مەن اۋىل شارۋاشىلىق سالاسىنداعى جەتىستىكتەرىن جانە تۋريزم باعىتىنداعى جۇمىستاردى مالىمدەدى.
وڭتۇستىك قازاقستان وبلىسى قازاقستانداعى حالقى كوپ شوعىرلانعان ايماق ەكەنىن ايتقان ول كەلەر جىلى شىمكەنت قالاسىنىڭ حالقى 1 ميلليونعا جەتەتىنىن مالىمدەدى. سونىمەن قاتار، وبلىستا ءىرى ۋران ءوندىرۋشى كاسىپورىندار مەن مۇناي وڭدەۋ زاۋىتى بار ەكەنىن جانە وبلىس كوكونىس پەن جەمىس كلاستەرىنىڭ ورتالىعى بولىپ تابىلاتىنىن جەتكىزدى. تاشكەنتپەن شەكارالاس جاتقان اۋدانداردا قاۋىن-قاربىز ءوسىرىلىپ، شەتەلگە، ونىڭ ىشىندە، گەرمانياعا ەكسپورتتالىپ وتىرعانىن ايتتى.
سونداي-اق، يندۋستريا سالاسىن دامىتۋدا وبلىس رەسپۋبليكادا كوش باستايتىنىن xابارلاعان اكىم وڭىردە بۇگىندە 7 يندۋستريالدى جانە 1 ارنايى ەكونوميكالىق ايماقتىڭ جۇمىس ىستەپ تۇرعانىن اتاپ ءوتىپ، وندا جەڭىل جانە اۋىر ونەركاسىپ ورىندارى مەن توقىما فابريكالارى ءساتتى جۇمىس ىستەپ جاتقانىن مالىمدەدى.
ءوز كەزەگىندە ەلشى قازاقستان مەن فرانسيا اراسىنداعى قارىم-قاتىناس جىل سايىن دامىپ كەلەتىنىن ايتىپ، تۋريزم، يندۋستريا جانە ءبىلىم باعىتتارىندا ارىپتەستىك ورناتۋعا دايىن ەكەنىن جەتكىزدى. سونداي-اق، مارتەبەلى مەيمان وڭتۇستىك قازاقستاندا بىرلەسكەن جوبالاردى جۇزەگە اسىرۋ ءۇشىن تىعىز بايلانىس ورناتۋ ماقساتىندا فرانسياداعى ءتۇرلى سالا ماماندارىنىڭ وكىلدەرىمەن ارنايى كەلگەنىن جەتكىزدى.
كەزدەسۋ بارىسىندا فرانسيس ەتەن قازاقستان فرانسيامەن قارىم-قاتىناستى ودان ءارى نىعايتۋ ماقساتىندا بارلىق جاعدايدى جاساپ وتىرعانىن، ياعني بۇعان دەيىن ۆيزا ۇزاقتىعى 15 كۇن بولسا، كەلەر جىلدىڭ 1 قاڭتارىنان باستاپ 30 كۇنگە ۇزارتىلاتىنىن مالىمدەدى. سونىمەن قاتار، ول فرانسياعا قىسقا ۋاقىتقا كەلۋشى قازاقستاندىقتار ءۇشىن ۆيزاسىز مۇمكىندىكتەر قاراستىرىلىپ جاتقانىن جەتكىزدى.
جيىن سوڭىندا ءوڭىر باسشىسى قازاقستان مەن فرانسيا كۇندەرىنە بايلانىستى سول ەلدىڭ ونەرپازدارى مەن كاسىپكەرلەرىن وڭتۇستىك قازاقستان وبلىسىندا كورگىسى كەلەتىنىن جانە وسى كۇندەر اياسىندا فرانسۋزدىق تاۋاروندىرۋشىلەردىڭ كورمەسىن ۇيىمداستىرۋدى ۇسىندى. سونداي-اق، اكىم مەكتەپ پەن جوعارى وقۋ ورىندارىنىڭ مۇعالىمدەرىن اتالعان ەلگە تاجىريبە الماسۋعا جىبەرۋ جايىن قاراستىراتىنىن ايتتى.
جۇمىس ساپارى ەكى كۇنگە جالعاساتىن فرانسيالىق دەلەگاتتارعا وبلىستىڭ ينۆەستيسيالىق مۇمكىندىكتەرى تانىستىرىلىپ، ءبىرقاتار تۋريستتىك جانە تاريحي ورىندارعا ينفوتۋر ۇيىمداستىرىلادى دەپ جوسپارلانۋدا.
You Might Also Like
-
قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە قازاقستاننىڭ ەڭبەك ەرى، حالىق جازۋشىسى، مەملەكەت جانە قوعام قايراتكەرى ءابىش كەكىلبايەۆ اتىنداعى ءدارىسحانا اشىلدى، دەپ ۋنيۆەرسيتەتتىڭ ءباسپاسو...
-
وڭتۇستىك قازاقستان مەملەكەتتىك ۋنيۆەرسيتەتىندە «وندىرىستىك تەحنولوگيالار جانە ينجينيرينگ» اتتى ءىىى حالىقارالىق كونفەرەنسيا وتۋدە، دەپ حابارلايدى وبلىس اكىمدىگىنىڭ باسپا ءسوز قىزمەتى.
