InfoHub Logo

وڭتۇستىك قازاقستان مەملەكەتتىك ۋنيۆەرسيتەتىندە «وندىرىستىك تەحنولوگيالار جانە ينجينيرينگ» اتتى ءىىى حالىقارالىق كونفەرەنسيا وتۋدە، دەپ حابارلايدى وبلىس اكىمدىگىنىڭ باسپا ءسوز قىزمەتى.

ايماقتاردىڭ الەۋمەتتىك-ەكونوميكالىق دامۋ پەرسپەكتيۆاسى مەن عىلىمي-تەحنيكالىق قىزمەتتەردىڭ ناتيجەلەرىن كوممەرسيالاۋ ماسەلەلەرى قارالعان كونفەرەنسياعا وبلىس اكىمى جانسەيىت تۇيمەبايەۆ، ق ر ءبىلىم جانە عىلىم مينيسترلىگى مەن ق ر پارلامەنتىنىڭ وكىلدەرى، يتاليا، گەرمانيا، يندونەزيا، امەريكا قۇراما شتاتتارى، سلوۆاكيانىڭ شەتەل ديپلوماتيالىق قىزمەت - ەلشىلىكتەرى مەن كونسۋلدىقتارىنىڭ وكىلدەرى قاتىستى.

تەحنيكا عىلىمدارىنىڭ دوكتورى، پروفەسسور، قازاقستان رەسپۋبليكاسىنىڭ ەڭبەك سىڭىرگەن قايراتكەرى، ق ر ۇلتتىق عىلىم اكادەمياسىنىڭ، ق ر ۇلتتىق ينجەنەرلىك اكادەمياسىنىڭ جانە تابيعات پايدالانۋ مەن حالىقارالىق ەكولوگيا اكادەميالارىنىڭ اكادەميگى، مەملەكەتتىك سىيلىعىنىڭ لاۋرەاتى بيشىمبايەۆ ۋاليحان قوزىكە ۇلىنىڭ 70 جىلدىعىنا ارنالىپ وتىرعان كونفەرەنسيا جۇمىسىنا 46 ەلدەن 120-دان استام بەلگىلى عالىمدار قاتىسۋدا.

حالىقارالىق كونفەرەنسيادا بايانداما جاساعان وبلىس اكىمى ەڭبەكتىڭ ەڭ ۇلكەنى - ءبىلىم ەكەنىن اتاپ ءوتىپ، جاھاندانۋ پروسەسى بارىسىندا ءبىز ءبىلىم  ساپاسىنا ەرەكشە كوڭىل ءبولۋىمىز قاجەتتىگىن نازارعا الدى.

«سوڭعى جىلدارى رەسپۋبليكامىزدا عىلىمنىڭ بارلىق سالالارى ۇلكەن ءىرى جەتىستىكتەرگە قول جەتكىزدى. وسى جەتىستىكتەرگە ۇلەس قوسىپ وتىرعان مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى  ۇجىمىنىڭ ورنى بولەك. ەلىمىزدىڭ عىلىمي سالاسىندا ۋنيۆەرسيتەت،  كوپتەگەن جىلدار بويى جوعارعى دارەجەگە يە بولىپ كەلەدى، كوپتەگەن جەتىستىكتەر مەن ماراپاتتارى بۇعان كۋا. بۇل، عىلىمي مەكتەپتەردىڭ ارى قاراي دامۋىنىڭ كەپىلى. بۇگىنگى وتكىزگەلى وتىرعان كونفەرەنسيا وسى عىلىمي مەكتەپتىڭ نەگىزىن قالاۋشى تەحنيكا عىلىمدارىنىڭ دوكتورى، پروفەسسور ءۋاليحان قوزىكەۇلىنا ارنالۋدا»،-دەدى اكىم.

ءسوز سوڭىندا ج.تۇيمەبايەۆ «وندىرىستىك تەحنولوگيالار جانە ينجينيرينگ» اتتى ءۇشىنشى حالىقارالىق كونفەرەنسيانىڭ جۇمىسىنا ساتتىلىك تىلەي وتىرىپ، ۋنيۆەرسيتەتتىڭ بارشا پروفەسسور-وقىتۋشىلار قۇرامىنا الداعى ەڭبەكتەرىنە شىعارماشىلىق شابىت، دەندەرىنە ساۋلىق، وتباسىلارىنا اماندىق تىلەدى.

كونفەرەنسيانىڭ سەكسيا جۇمىستارى حيميالىق تەحنولوگيالار، مۇنايحيميا، بيو - جانە نانو تەحنولوگيالار، قۇرىلىس، تاماق ونەركاسىبى مەن اگروونەركاسىپ كەشەنى، ەكولوگيا جانە تابيعاتتى ءتيىمدى پايدالانۋ، «استانا ەكسپو-2017» حالىقارالىق ارنايى كورمە فورماتىنداعى جاڭارتىلعان ەنەرگەتيكا، ەنەرگيانى ساقتاۋ جانە ات-تەحنولوگيالاردى دامىتۋدىڭ پەرسپەكتيۆتى باعىتتارى بويىنشا جۇرگىزىلۋدە.

---