InfoHub Logo

ادامزات بالاسى مارسقا قونىستانۋعا دايىن بولعان كەزدە (ەرتە مە، كەش پە بۇل ورىندالاتىنعا ۇقسايدى) ولارعا قوسىمشا كومەك قاجەت بولادى. توتەنشە جۇكتەمە مەن ايرىقشا قيىن جاعدايلاردا جۇمىس ىستەۋ مۇمكىندىگى بار ەنسيكلوپەديالىق ءبىلىمدى ناعىز مامانداردىڭ كومەگى كەرەك. ولارعا Justin ءتارىزدى درويدتار قاجەت بولادى. گەرمانيا اۆياسيا جانە كوسموناۆتيكا ورتالىعىندا جاسالعان ءدال وسىنداي گۋمانويدتى بوتتار بولاشاق قونىس اۋدارۋشىلار ءۇشىن مارستاعى العاشقى تۇرعىن ءۇيدى سالۋعا جاۋاپتى بولادى.

نەمىس ينجەنەرلەرى ونداعان جىلدان استام ۋاقىتتان بەرى Justin روبوتىنىڭ مۇمكىندىكتەرىن جاقسارتۋ بويىنشا جۇمىستارىن جالعاستىرىپ كەلەدى. ول ەڭ العاش 2006 جىلى ەلەكترونيكا جانە روبوت تەحنيكالارىنىڭ ءىرى جارمەڭكەلەرىنىڭ بىرىندە تانىستىرىلدى. «تەمىر دوستىڭ» ءتۇرلى قۇرالدارمەن جۇمىس ىستەۋگە، فوتوسۋرەتكە تۇسىرۋگە جانە بولىسۋگە، ۇشىپ بارا جاتقان وبەكتىلەردى ۇستاپ الۋعا جانە ءتۇرلى قيىندىقتاعى كەدەرگىلەردى اينالىپ وتۋگە مۇمكىندىگى بار. ال ەندى روبوتقا جاساندى ينتەللەكت جۇيەسىن دارىتقان زاماناۋي جاڭارتۋلاردىڭ ارقاسىندا، Justinء-نىڭ باسقا وپەراتورعا سۇيەنبەي، وزدىگىنەن «ويلانۋعا» مۇمكىندىگى بار.

الدىن-الا باعدارلامالاۋدى جانە ءاربىر قوزعالىسى ءۇشىن ءىس جۇزىندە قاجەتتى نۇسقاۋلىقتارمەن قامتاماسىز ەتۋدى قاجەت ەتەتىن كوپتەگەن باسقا روبوتتارعا قاراعاندا، بۇل روبوتتىڭ بارلىق تاپسىرمالاردى – ءتىپتى باستاپقىدا باعدارلامالانباعان تاپسىرمالاردى دا تولىقتاي اۆتونومدى رەجيمدە ورىنداۋعا مۇمكىندىگى بار.

اجىراتىپ تانۋ تەحنولوگياسى، سونىمەن قاتار كومپيۋتەرلىك كورۋ جۇيەسى «دجاستينگە» ءوزىنىڭ اينالاسىن تانىپ بىلۋگە جانە تازالاۋ مەن ءتۇرلى مەحانيزمدەرگە تەحنيكالىق قىزمەت كورسەتۋ، جابدىقتى تەكسەرۋ جانە زاتتاردى تاسىمالداۋ ءتارىزدى تاپسىرمالاردى ورىنداي الۋعا مۇمكىندىك بەرەدى. ءوزىنىڭ سوڭعى تەستتەرىنىڭ بىرىندە Justin بىرنەشە مينۋت ىشىندە ىستەن شىققان كۇن تاقتاسىن جوندەي الدى. ءبىر قىزىعى، روبوتقا سول ساتتە حالىقارالىق عارىش ستانسياسىنىڭ بورتىندا بولعان عارىشكەرلەردىڭ ءبىرى قاشىقتان باسشىلىق جاساپ وتىرعان.

روبوتتىڭ بيىكتىگى 1،92 مەتر، ال سالماعى – 200 كيلوگراممداي. ءار قولىمەن Justin 14 كيلوگرامم جۇكتى كوتەرۋگە مۇمكىندىگى بار. ءاربىر قولىندا تورت-تورتتەن ورنالاسقان ساۋساقتارىنىڭ ارقاسىندا ول ءتۇرلى قۇرال-جابدىقتاردى پايدالانا الادى. كورۋ جۇيەسى رەتىندە روبوت وزىنە قورشاعان اينالانىڭ ءۇش ولشەمدى مودەلىن جاساۋعا مۇمكىندىك بەرەتىن اجىراتىمدىلىعى جوعارى كامەرا مەن سەنسورلار جيىنتىعىن قولدانادى. روبوت ءتۇرلى كومپيۋتەرلىك جابدىقتارمەن جىلدام سينحروندالۋعا، سونىمەن قاتار كۇن ەنەرگياسىنىڭ كوزىنە قوسىلۋ ارقىلى وزدىگىنەن ءوز باتارەيكالارىن قۋاتتاپ الۋعا بەيىم. بارلىق قاجەتتى حاتتامالار روبوتتىڭ جەرگىلىكتى جادىندا ساقتالادى. باسقاشا ايتقاندا، ول تىپتەن كوممۋنيكاسيالىق بايلانىستى جوعالتقان جاعدايدا دا تاپسىرمالاردى ورىنداي الادى. سونداي-اق روبوتتىڭ تاعى ءبىر تالانتى، ونىڭ ءشاي مەن كوفە ازىرلەي الاتىندىعى بولىپ تابىلادى.

---