وتان – انا، جەر – بەسىك
شىمىلدىق اشىلادى.
ساحناعا قازاقستان رەسپۋبليكاسىنىڭ كارتاسى، ەلتاڭباسى، تۋى مەن ءانۇرانى ىلىنەدى. جاعالاي قابىرعالارعا (مۇمكىن بول-
عانىنشا) حاندار مەن باتىرلاردىڭ، بيلەردىڭ سۋرەتتەرى ورنا-لاسقانى ءجون. ۇلى ادامداردىڭ وتان، تۋعان جەر، باتىرلىق تۋرالى ۇلاعاتتى سوزدەرى مەن حالىق ماقال-ماتەلدەرى جازىلىپ قويىلسا دا ارتىق بولماس. ساحنا قازاقستان رەسپۋبليكاسىنىڭ انۇرانىمەن اشىلادى. شىمىلدىق اشىلعان كەزدە ساحنا تورىندە بۇلدىرشىندەر ساپ تۇزەپ تۇرادى.
كىرىسپە ساباق
جۇرگىزۋشى.
ەلىم دەگەن جىرىم بار،
ەلىن سۇيگەن ۇلىم بار.
وتان ءسوزىن قازاعىم
كيەلى دەپ ىرىمدار.
ءبىرىڭ – شەكەر، ءبىرىڭ – بال،
جايناپ وسكەن قۇلىندار،
قاسيەتتى، كيەلى
وتان دەگەن ۇعىمدى ال،
تالداپ بەرەر كىمىڭ بار؟..
ءبىرىنشى ءبۇلدىرشىن.
تۋعان جەرىن اتا-اناڭ
وتانىم دەپ اتاعان.
وتان – دوسىڭ، تۋىسىڭ،
وتان – التىن بوساعاڭ.
ەكىنشى ءبۇلدىرشىن.
وتان – تۋعان ءوز ەلىڭ،
ايدىن كولىڭ، وزەنىڭ.
ميراس ەتكەن بابالار
قورعاپ ءاربىر كەزەڭىن.
ءۇشىنشى ءبۇلدىرشىن.
شەرتەر بىزگە سان اڭىز،
وتان – بايتاق دالامىز.
وتان ءسوزىن ايالاپ،
قاستەر تۇتقان بابامىز.
ءتورتىنشى ءبۇلدىرشىن.
وتان – بابام، ەرلەرىم،
وتان – اۋام، ءار دەمىم.
وتانىممەن ءبىر تۇلەپ،
اسقار شىڭعا ورلەدىم.
پىسىقتاۋ ساباعى
جۇرگىزۋشى.
سونىمەنەن، بالالار،
قاسيەتتى سانالار
اتامەكەن، قۇت مەكەن –
وتان دەگەن نە ەكەن؟..
ءبىرىنشى ءبۇلدىرشىن.
تۋىپ-وسكەن جەر ەكەن،
ورمان-توعاي، كول ەكەن.
ەكىنشى ءبۇلدىرشىن.
اسقار تاۋلى بەل ەكەن،
ەل قورعاعان ەر ەكەن.
ءۇشىنشى ءبۇلدىرشىن.
مەن، سەن جانە ول ەكەن،
قازاقستان ەلى ەكەن!
جۇرگىزۋشى.
ءيا، دۇرىس، بالالار،
قاسيەتتى سانالار –
وتان – تۋعان جەرىمىز،
ءسۇيىپ وسكەن ەلىمىز.
قاسيەتتى وتاننىڭ
ۇلانىمىز ءبارىمىز!
ساۋالناما ساباعى
جۇرگىزۋشى.
ەل تاريحىن سارالار
ۇلى مەيرام سانالار،
بۇگىن بىزدە قانداي كۇن،
كىم ايتادى، بالالار؟..
جاۋاپشى بالا.
قۋانىشتان جانعان نۇر،
بۇگىن بىزدە ۇلى توي.
ەگەمەندىك العان بۇل
تاۋەلسىزدىك كۇنى عوي.
جۇرگىزۋشى.
ءتىرىلىپ اتا سالتىمىز،
شاتتانسا بەيبىت حالقىمىز،
ءوز الدىنا ەل بولىپ،
الەمگە جەتتى داڭقىمىز.
شارىقتاتىپ شات ءانىن،
تىككەن دەربەس وتاۋىن،
ايتىپ بەرەر كىم ەندى
رەسپۋبليكا اتاۋىن؟
جاۋاپشى بالا.
الەم بىلەر اتاعىن،
ايتسام ەلىم اتاۋىن،
تىككەن دەربەس وتاۋىن
قازاقستان رەسپۋبليكاسى –
تاۋەلسىز مەنىڭ وتانىم!
جۇرگىزۋشى.
مۇرا عىپ باباڭ قالدىرعان،
ايالاپ وزەن، باۋ-باعىن.
بىلەسىڭ بە، بالدىرعان،
وتانىڭنىڭ اۋماعىن؟
جاۋاپشى بالا.
اتا-بابام جايلاعان،
مىڭعىرتىپ مال ايداعان،
اتىراۋ – التاي اراسى
ەجەلدەن مەنىڭ باي دالام.
جۇرگىزۋشى.
بارەكەلدە، جارادىڭ!
ابدەن دۇرىس جاۋابىڭ.
سەزىمى – جەلكەن، جىر قايىق،
جىراۋلار ءسوزى ءبىر عايىپ.
مەرەكەدە وسىنداي
جاقسى ءبىر جىر تىڭدايىق.
ءبىرىنشى جىراۋ.
اقتارعان كەن مەن كۇرىشتى،
ەگەمەن ەلىم ىرىستى،
تاۋەلسىزدىك كۇنىندە
تويلارىڭ بولسىن ۇلىستى!
ەڭبەگىڭ بولسىن جەمىستى،
ساپارىڭ بولسىن جەڭىستى.
تابىسىڭا تاسقىندى
تاڭدانسىن الەم، جەر ءۇستى.
ەكىنشى جىراۋ.
قارا التىندى مۇنايىم،
بايلىق بولىپ لايىم،
ەل داۋلەتىن ارتتىرسىن
وڭىنان تۋىپ كۇن، ايىم!
تاستى تىلگەن كەنىشىڭ،
جەگىزسىن ريزىق-جەمىسىن.
قانات جايسىن ىنتىماق،
بەيبىتشىلىك، كەلىسىم.
گۇلدەنسىن، ەلىم تۇرلەنسىن،
تانىماستاي تۇرگە ەنسىن.
بولاشاق ۇجماق تورىنە
ەلۋ ەلمەن بىرگە ەنسىن!
جۇرگىزۋشى.
جاسا، ونەرلى ورەنىم!
ورگە ءجۇزسىن ونەرىڭ.
بىرگە جاساپ ەلىڭمەن،
بىرگە كورگىن كەمەلىن!
ال، بالالار، تۇرمايىق،
ساۋالداردى تىڭدايىق.
وتان جايلى، ەل جايلى
ءبىلىمدى ءبىز شىڭدايىق.
ۇلگىسىمەن داپ-دايىن،
ايشىقتانار ءاردايىم،
ەلدىك رامىزدەردىڭ
بىلەسىڭدەر قاندايىن؟
جاۋاپشى بالا.
اۋاسى داۋا، سۋى بال،
اققان سەلدەي جىرى بار،
قازاعىمنىڭ تاۋەلسىز
ەلتاڭباسى، تۋى بار.
جۇرگىزۋشى.
بارەكەلدە، جارادىڭ!
وتە دۇرىس جاۋابىڭ.
تاعى قانداي ءرامىز بار
باس يدىرەر جارانىڭ؟
جاۋاپشى بالا.
شىرقاپ وتەر ۇلانى،
ەلدىگىمنىڭ ۇلى ءانى –
ءۇشىنشىسى ءرامىزدىڭ –
ەلىمنىڭ ءانۇرانى.
جۇرگىزۋشى.
مەيىرىن توگىپ كوگىمدە،
شاشقان اراي نۇرىن كۇن.
جەلبىرەگەن تورىمدە
ءتۇسى قانداي تۋىمنىڭ؟
جاۋاپشى بالا.
تىلەگىمىز كوكتەن كەپ،
قايتا تۋعان كوكتەم بوپ،
ەلىمىزدىڭ تۋى دا
اسپان تۇستەس كوكپەڭبەك.
جۇرگىزۋشى.
باسىندا ەل كوشىنىڭ
اشقان ەلدىك ەسىگىن،
كىم ايتادى، قانەكي،
ەلباسىنىڭ ەسىمىن؟
جاۋاپشى بالا.
ىزگىلىكتىڭ جولباسى،
جاقسىلاردىڭ جولداسى،
نۇرسۇلتانداي اتامىز
پرەزيدەنت – ەلباسى!
جۇرگىزۋشى.
بارەكەلدە، جارادىڭ،
قانداي ناقتى جاۋابىڭ!
ازامات بول ءدال سونداي،
تاۋداي تاسىپ تالابىڭ.
جۇرگىزۋشى.
ساربازداردىڭ كوسەمى –
باتىر دەگەن ۇلى ەسىم.
ەل قورعاعان كەشەگى
ەرلەردەن كىمدى بىلەسىڭ؟
ءبىرىنشى بالا.
كەگىن الىپ جوڭعاردان،
كوپتىڭ ءىسىن وڭعارعان،
ابىلايداي حانداردان
كەيىنگە ۇلگى – جول قالعان.
ەكىنشى بالا.
قابانبايداي ەر بابام،
ەرلىك ءىسى زور بابام،
بەل شەشپەستەن قىرىق جىل
ەلىن جاۋدان قورعاعان.
ءۇشىنشى بالا.
بىرلىگى ءۇشىن جەرىمنىڭ
قول باستاعان ەرىم بۇل –
شاپىراشتى ناۋرىزباي
نار باتىرى ەلىمنىڭ.
ءتورتىنشى بالا.
تايلاق پەنەن باياندار،
سۇرانشى، ساۋرىق، ساياندار،
جەرىن جاۋعا بەرمەگەن
ەرلىگى كوپكە اياندار.
جۇرگىزۋشى.
بارەكەلدە، ورەندەر!
«ورگە جۇزەر ونەرلى ەل».
شىعا بەرسىن شىڭدارعا
ۇلاندارىم كەمەڭگەر.
قورىتىندىلاۋ ساباعى
جۇرگىزۋشى.
دەي المايمىن – جايسىڭدار،
جۇلدىزسىڭدار، ايسىڭدار.
قانە، وتان تۋرالى
تاقپاق ايتار قايسىڭ بار؟
ءبىرىنشى ءبۇلدىرشىن.
قازاقستان – ءور ەلىم،
مەن ونەرلى ورەنىڭ.
جاتقا دا ايتىپ بەرەمىن
اباي اتا ولەڭىن.
ەكىنشى ءبۇلدىرشىن.
جامبىل اتا جىرىن دا،
شىرقاپ وي مەن قىرىمدا،
قاستەرلەيمىن ەلىمنىڭ
ەلتاڭباسىن، تۋىن دا!
ءۇشىنشى ءبۇلدىرشىن.
كيەلى ءانۇرانىن
تىڭداپ ەرتە تۇرامىن.
وتان – انا، جەر – بەسىك.
ءبىز كىشكەنتاي ۇلانىڭ!
جۇرگىزۋشى.
بارەكەلدە، بالالار!
ريزا اتا-انالار.
بارلەرىڭە قويىلار
كىلەڭ بەستىك باعا بار!
You Might Also Like
-
بۇل ءبىر مامىراجاي ورمان ەدى. جان-جانۋارلار مەن قۇس بىتكەن كۇندەلىكتى ءوز تىرشىلىكتەرىمەن اينالىسىپ، بەيبىت ءومىر سۇرەتىن. تاڭ الدىندا بۇلبۇلدار سايراپ، ورمانداعى تىرشىلىك اتاۋلىنى ءتاتتى ۇيقىدان وياتاد...
