InfoHub Logo

ءبىلىم بەرۋ تاريحىنداعى ەرەكشە وقۋ جىلى مارەسىنە جەتۋگە جاقىن. بۇكىل الەمدە ءبىر جارىم ميلليارد، قازاقستاندا ءۇش ميلليوننان استام وقۋشى بۇل وقۋ جىلى نەگىزىنەن قاشىقتان ءبىلىم الدى.

قازاقستاندىق مۇعالىمدەر مەن وقۋشىلار پايدالانعان نەگىزگى ونلاين وقىتۋ جۇيەسى – OnlineMektep پلاتفورماسى. پلاتفورما مەن ونىڭ مازمۇنىن ازىرلەگەن BilimLand كومپانياسى مەن «نازاربايەۆ زياتكەرلىك مەكتەپتەرى» ۇلتتىق سيفرلى مەكتەپكە اينالعان OnlineMektep جۇمىسى تۋرالى مالىمەتتەردى جاريالادى.

جوباعا قاتىسقان 500-دەن اسا «نازاربايەۆ زياتكەرلىك مەكتەپتەرىنىڭ» ۇستازدارى مەن 400-دەن اسا BilimLand مامانى قازاق جانە ورىس تىلدەرىندە بارلىق 11 سىنىپ پەن 37 ءپاندى قامتيتىن 24 240 سيفرلىق ساباق جانە 550 000 ينتەراكتيۆتى جاتتىعۋ جاساپ شىققان. ءار ساباق وقۋشىنىڭ فۋنكسيونالدىق ساۋاتتىلىعىن ارتتىرۋ ماقساتىندا جۇيەنىڭ ءار وقۋشىنىڭ جەكە ەرەكشەلىكتەرىنە بەيىمدەلۋىنە ىقپال ەتەتىن تاقىرىپتى ءتۇسىندىرۋ ءبولىمى مەن 9 دەڭگەيلى جاتتىعۋلار جيىنتىعىنان تۇرادى. وسىلايشا، پاندەميالىق شەكتەۋگە جاۋاپ رەتىندە قۇراستىرىلعان جۇيەنىڭ ارقاسىندا قازاقستاندىق جاڭارتىلعان مەكتەپ مازمۇنى ساندىق فورماتقا تولىقتاي كوشىرىلىپ، ءار وقۋشىعا جەتكىزىلدى. مامانداردىڭ پىكىرىنشە، OnlineMektep – ەڭ شالعاي اۋىل وقۋشىلارىن ەلدەگى ەڭ ۇزدىك پەداگوگيكالىق تاجىريبەمەن بايلانىستىرعان ەرەكشە جوباعا اينالدى.

Zero.kz قازاقستاندىق ينتەرنەت-ستاتيستيكا رەيتينگىنە سايكەس OnlineMektep توعىز اي بويى ەلىمىزدەگى ەڭ كوپ قارالاتىن ۆەب-رەسۋرس بولدى. وقۋ جىلىنىڭ باسىنان بەرى پلاتفورمادا كۇن سايىن 2 ميلليونعا جۋىق وقۋشى ءبىلىم الدى. ترافيكتىڭ 80 پايىزى OnlineMektep ءموبيلدى قوسىمشاسىنا تيەسىلى.

پلاتفورماعا 2 875 697 بەلسەندى وقۋشى مەن 284 033 ءمۇعالىم تىركەلگەن. وقۋ جىلىندا OnlineMektep-تە 315 ميلليون ونلاين ساباق وتكەن، 101 627 825 ءۇي جۇمىسى بەرىلىپ، تەكسەرىلدى، 2 504 166 189 تاپسىرما مەن جاتتىعۋ ورىندالدى.

پاندەميا اسىرەسە ۇستازدار قاۋىمىنا سالماق سالدى. تەحنولوگيالارمەن بايلانىستى جاڭا داعدىلاردى تەز يگەرۋگە تۋرا كەلدى. وقۋشىلار مەن اتا-انالار دا توسىن جاعدايعا شۇعىل بەيىمدەلۋگە ءماجبۇر بولدى. قىسىلتاياڭ جاعدايدا ۇستازداردى قولداپ، ولارعا ادىستەمەلىك كومەك كورسەتۋ ءۇشىن پلاتفورما نەگىزىندە مۇعالىمدەردىڭ اۋقىمدى كاسىبي قاۋىمداستىعى قۇرىلدى، ۇستازداردى قولداۋ قىزمەتىنىڭ YouTube ارناسىنا 370 مىڭنان اسا ءمۇعالىم جازىلعان.

OnlineMektep فۋنكسيونالى كەستە قۇرۋ، مۇعالىمدەر مەن وقۋشىلار اراسىنداعى كوممۋنيكاسيا، سينحروندى (بەينەكونفەرەنسيالىق بايلانىس ارقىلى) جانە اسينحروندى (ىڭعايلى ۋاقىتتا) وقىتۋ مۇمكىندىگى، ءۇي جۇمىسى، ۇلگەرىم مونيتورينگى، ساباق، ءبولىم جانە توقسان ءۇشىن باعالاۋدى ۇيلەستىرۋ سەكىلدى نەگىزگى قىزمەتتەردى تولىق قامتىدى.

پلاتفورما فۋنكسيونالى ەلباسى اكادەمياسىنىڭ قازاقستانداعى العاشقى «Birge oqý»  ونلاين-مەكتەبىنىڭ نەگىزىن قالادى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن. نازاربايەۆتىڭ باستاماسىمەن قولعا الىنعان اۋقىمدى پيلوتتىق جوبا شالعايداعى اۋىل مەكتەپتەرىنىڭ مىڭنان استام دارىندى وقۋشىلارىن قامتىدى. ولار ەلىمىزدىڭ جەتەكشى مۇعالىمدەرىنەن تەگىن ءبىلىم الۋدا. ونلاين-مەكتەپكە وقۋشىلاردى ىرىكتەۋ اۋىل وقۋشىلارىنا ارنالعان «مىڭ بالا» ۇلتتىق وليمپياداسى ارقىلى ءوتتى.

وقۋشىلار وقۋ جىلىنىڭ باسىنان باستاپ ەلىمىزدىڭ وزىق مۇعالىمدەرىنەن تەگىن ءبىلىم الۋدا. ماتەماتيكا، قازاق، ورىس جانە اعىلشىن تىلدەرى بويىنشا ءبىلىم بەرىلەدى. جاقىن ارادا 10-11 سىنىپ وقۋشىلارىن وقىتۋ ماقساتىندا كونتەنتتى كەڭەيتۋ جوسپارلانىپ وتىر. سونداي-اق اۋىل عانا ەمەس، سونىمەن قاتار قالا مەكتەپتەرىنىڭ دە وقۋدا قيىندىقتارعا تاپ بولعان وقۋشىلارىنىڭ كوپ بولىگىن تارتۋ جوسپاردا بار. جالپى، جاڭا وقۋ جىلىنان باستاپ 10 مىڭنان استام وقۋشىنى قامتۋ جوسپارلانۋدا.

وسى جانە وزگە دە مالىمەتتەر پاندەميا جاعدايىندا وتكەن وقۋ جىلىنىڭ قورىتىندىلارىنا ارنالعان «پاندەميا ساباقتارى: ءبىلىم بەرۋدەگى سيفرلىق ترانسفورماسيانىڭ بۇگىنى مەن بولاشاعى» كونفەرەنسياسىندا جاريالاندى.

كونفەرەنسياعا قاتىسۋشىلار داعدارىس كەزىندەگى ءبىلىم ساپاسىنا كەلگەن نۇقسان ونلاين وقىتۋدىڭ ەمەس، پاندەميانىڭ اسەرى دەگەنگە كەلىستى. بۇل جاعدايدا قاشىقتان وقىتۋ مەن ونلاين پلاتفورمالار وقۋ پروسەسىن قامتاماسىز ەتۋدىڭ نەگىزگى قۇرالىنا اينالدى. پاندەميا ءبىلىم بەرۋدەگى سيفرلىق ترانسفورماسيانى جەدەلدەتىپ، سونىڭ نەگىزىندە مۇعالىمدەر باعا جەتپەس تاجىريبە جينادى، جاڭا داعدىلار قالىپتاستىرىپ، سيفرلىق بىلىكتىلىگىن ارتتىردى. ال وقۋشىلار  پلاتفورما مەن كونتەنتكە قول جەتكىزە وتىرىپ، ىلگەرى ءبىلىم الۋعا شەكسىز مۇمكىندىك الدى. OnlineMektep كونتەنتى مەن پلاتفورماسى پاندەميادان كەيىنگى كەزەڭدە دە مۇعالىمدەر مەن وقۋشىلاردىڭ سەنىمدى سيفرلىق كومەكشىسىنە، قازاقستاندىق ەلەكتروندى وقىتۋ جۇيەسىنىڭ تىرەگىنە اينالىپ وتىر.

---