پيتەر قاعيداتى — نەگە بىلىكسىز قىزمەتكەرلەردىڭ قورشاۋىندا قالا بەرەمىز
جۇمىستا، الەۋمەتتىك قىزمەت كورسەتەتىن مەكەمەلەردە نەمەسە كادىمگى دۇكەننىڭ وزىندە بىلىكسىزدىككە تاپ بولعان كەزدەرىڭىز بولدى ما؟ جۇمىسكەر ءوزىنىڭ مىندەتىنەن دىم بىلمەي، بىلىكسىزدىگىنىڭ زاردابىن اينالاسىنداعىنىڭ ءبارى تارتىپ جۇرگەنىن كورگەن شىعارسىز. بۇنداي جاعداي ءسىزدى تاڭ-تاماشا قىلعان بولار نەمەسە ءوزىڭىز بىلىكسىزدىك قۇربانى بولعان شىعارسىز. بۇنى تۇسىندىرۋگە بولادى جانە ول «پيتەر قاعيداتىن» تۇزگەن جانە بىلىكسىزدىكپەن نەگە ءجيى ۇشىراساتىنىمىز بەن ونىڭ قالاي پايدا بولاتىنىن قاراپايىم تىلمەن ايتىپ جەتكىزەتىن كانادالىق پەداگوگ لوۋرەنس پيتەردىڭ كىتابىندا جازىلعان.
پيتەردىڭ كىتابى 1960 جىلدارى شىققانىمەن، ول قازىرگى كەزدە دە ءوزىنىڭ وزەكتىلىگىن جويعان جوق. كىتاپ ءبىز ءوزىمىزدى تانيتىن ءومىر بولمىسىنان الىنعان كوپتەگەن مىسالدار ارقىلى مىسقىلداۋ مانەرىندە جازىلعان.
پيتەر قاعيداتى الەمگە تانىمال بولدى جانە ونىڭ مايەگى مىنادا: يەرارحيا جۇيەسىندە بارلىق قىزمەتكەر ايتەۋىر ءبىر كۇنى ءوزىنىڭ بىلىكسىزدىك دەڭگەيىنە جەتەدى.
بۇل ءار قىزمەتكەر، قىزمەتىندە جوعارىلاعان سايىن وزىنە لايىقسىز جانە قيىن بولىپ، ءوزىنىڭ مىندەتىن ساپالى تۇردە اتقارا المايتىن لاۋازىمعا جاقىنداي تۇسەدى دەگەن ءسوز. ادام باس كەزىندە ءوزىن مىقتى، بولاشاعى بار مامان رەتىندە كورسەتكەن كۇننىڭ وزىندە دە، جوعارىعا قاراي باسقان ءار قادامى سايىن ونىڭ بىلىكسىزدىلىگى ارتا بەرەدى.
بۇل قاعيداتتان ماسەلە جەكە العان ادامدا ەمەس ەكەنى، ماسەلە — يەرارحيا جۇيەسىنىنىڭ وزىندە ەكەنى، بارلىق قۇرىلىمدا ءونىمدى جۇمىس جۇيەسى بۇزىلعانى جانە كادرلاردىڭ اۋىستىرىلۋى ويداعىداي جۇرمەيتىنى شىعادى. سالدارىنان اينالامىز بىر-ەكى كۇننەن سوڭ بۇزىلىپ قالاتىن ساپاسىز تاۋار ساتاتىن دۇكەندەرگە، ەش پايداسى جوق ءبىلىم بەرەتىن ينستيتۋتتارعا، ءتارتىپ پەن ءونىمدى قام-قارەكەت ورنىنا بەيبەرەكەتسىزدىك جايلاعان مەملەكەتتىك ورگاندارعا تولىپ تۇر.
بىر-ەكى مىسالدى قاراستىرىپ كورەيىك
كوبىمىز كوپقاباتتى ۇيلەردەگى پاتەرلەردە تۇرامىز جانە قابىرعالاردان ءبارى ەستىلىپ تۇراتىنى تاڭقالدىرماي قويمايدى. كورشىلەرىمىزدىڭ داۋىسىن قاتتى شىعارىپ تىڭدايتىن مۋزىكاسىن عانا ەمەس، جاي ايتىلىپ وتىرعان اڭگىمەلەردى، اس ۇيدەگى كومبايننىڭ دىبىسىن، سۋدىڭ اعىزىلعانىن ەستي الامىز. نەگە بۇلاي بولاتىنىن ويلانىپ كوردىڭىز بە؟ عيماراتتى جوبالاپ، تۇرعىزعاندار نە جايىندا ويلادى ەكەن؟ شاماسى، ولار ويلانىپ باس قاتىرعان جوق، ويتكەنى ولاردىڭ بىلىكسىزدىك دەڭگەيى شەگىنە جەتكەن.
ن. دەگەن اۆتوسلەساردىڭ ون ساۋساعىنان ونەر تامعان كەرەمەت شەبەر دەگەن اتى بولاتىن، ونىڭ التىن قولى كەز كەلگەن كولىكتى شاشىپ، قايتا جيناي الاتىن، قانداي اقاۋ بولسا دا جوندەيتىن. شەبەرحانانىڭ كليەنتتەرى جىرتىلىپ ايىرىلاتىن، سوندىقتان جۇمىس جاقسى ءجۇرىپ جاتقان. ءن-نىڭ تابىستارىن كورگەن باستىقتار اۋەلى ونى شەبەردىڭ كومەكشىسى ەتىپ تاعايىندادى، سوسىن باس شەبەر قىلدى. الايدا، كورگەن-بىلگەنى دەتالدار مەن كولىكتەر بولعان ن. جۇمىستا جانە ادامداردى باسقارۋعا كەلگەندە مۇلدەم بىلىكسىز بولىپ شىعىپ، اركىمنىڭ ىسىنە ارالاساتىن بولدى. قىزمەتكەرلەرىنە دۇرىس جۇمىس ىستەتپەي، ءار كولىكتى ءوز ويىنان شىققانشا جوندەۋگە، ءار دەتالدى ءوزى تەكسەرۋگە تىرىستى، ناتيجەسىندە شەبەرحانانىڭ قالىپتاسقان جۇمىس ءتارتىبى بۇزىلىپ، شەبەرلەردىڭ ىزاسىن تۋدىردى، ال كولىگىن سونشا ۇزاق كۇتۋى كەرەك بولعان كليەنتتەر نازدارىن بىلدىرە باستادى. بۇنىڭ بارىنە باس شەبەر قىزمەتىندە جۇرگەن ءن-نىڭ بىلىكسىزدىگى كىنالى.
بىلىكسىزدىكتىڭ كوپ تارالۋ سەبەپتەرى
بۇل جەردە ءبارى تۇسىنىكتى — ماسەلە ادامدى قىزمەتكە العان كەزدە قانداي قاعيداتتاردىڭ باسشىلىققا الىناتىندا. جاقسى جۇمىس ىستەيتىن ادام مانساپتىق قىزمەتتە جوعارىلايدى. ءبىراق ءار ادامدا ءوزىنىڭ بىلىكتىلىگىنىڭ شەگى بار جانە ول ادام بىلىكتىلىگى ءبىتىپ، بىلىكسىزدىگى باستالعان جەردەگى قىزمەتىندە توقتايدى.
لاۋازىمدىق مىندەتىن مۇلتىكسىز اتقارىپ، ۇلگىلى، تابىستى جۇمىس ىستەپ جۇرگەن قىزمەتكەردىڭ باستىقتاردىڭ كوزىنە ءتۇسۋى ءجيى بولىپ تۇرادى. باسشىلىق تىرىسىپ، تابىسقا جەتكەنىنە ريزا، سوندىقتان ونى ءبولىم باستىعىنىڭ ورنىنا ءبىر ساتىعا جوعارىلاتادى. ءبىراق قىزمەتكەردىڭ جاڭا مىندەتتەرى ول بۇرىن اتقارىپ كەلگەن مىندەتتەرگە مۇلدەم ۇقسامايدى — ول قاشان دا ءوزى بىرەۋگە باعىنىشتى بولىپ ءجۇردى، ەشقاشان قىزمەتكەرلەردى باسقارا العان ەمەس. وسى سەبەپتى ول جاقسى جۇمىسكەردەن تاجىريبەسىز ءارى بىلىكسىز باسشى بولىپ شىعا كەلدى دە، ونىڭ دامۋى وسى جەردە تەجەلىپ قالدى.
باسقاشا بولۋى دا مۇمكىن. ءبولىم باسشىسى — امان-سالەمى ءتۇزۋ، اشىق جانە ءىلتيپاتتى ادام — ۇجىممەن قارىم-قاتىناسى وتە جاقسى. بولىمدە ءبارى تاتۋ ءارى جۇمىس ءونىمدى بولۋىن قاداعالاپ وتىرادى. ءبىراق ونى جوعارىلاتادى، ەندى ول قاراپايىم قىزمەتكەرلەر مەن ورىنداۋشىلاردى ەمەس، بولىمدەردىڭ باسشىلارىن باسقارادى. بۇل جەردە ونىڭ ىقىلاسى مەن بارلىعىمەن ارالاسىپ جۇرەتىن ادەتى ەشكىمگە كەرەك بولماي قالدى، باسشىلار ورتاسىندا ءجۇرىپ ولاي ەتكەن بولمايدى. بۇل وسىنداي باسشىنىڭ مانسابىنداعى سوڭعى ستانسيا.
كىتابىندا پيتەر يەرارحيا مەن يەرارحيولوگيا تۋرالى كوپ ايتىپ، ءوز قاعيداسى ارقىلى الەۋمەتتىك قۇرىلىمداردىڭ، جالپى وركەنيەتىمىزدىڭ قالاي قۇرىلعانىن تۇسىندىرۋگە تىرىسادى. ول ەشكىمگە ۇقسامايتىن يەرارحيادان تىس تۇلعالاردىڭ بولاتىنىن بىلەدى، ءبىراق ءار ءتۇرلى بيلىك قۇرىلىمدارىندا ىستەيتىندەردىڭ، زاۋىتتارمەن جانە ونەركاسىپپەن، ءبىلىم بەرۋمەن، مەديسينامەن، مينيسترلىكتەرمەن بايلانىستىلاردىڭ بارلىعى – يەرارحياعا كىرەتىنىن ايتادى. ولاردىڭ مانساپتىق تۇرعىدا جوعارىلاۋى پيتەر قاعيداتىنا ساي جۇزەگە اسادى.
بۇنىمەن قاتار پيتەر يەرارحيانىڭ تاعى دا باسقا فورمۋلالارىن شىعارىپ وتىر، سولاردىڭ ءبىرى: قىزمەتكەرلەردىڭ مانساپ ساتىسىمەن جوعارىلاۋى بىرتىندەپ-بىرتىندەپ ءاربىر جۇمىس ورنىنا ءوز قىزمەتى تۇرعىسىندا بىلىكسىز ادامنىڭ كەلۋىنە اپارىپ سوعادى.
بۇنداي ءويتۇيىن تاڭداندىرىپ تاستايدى، ويتكەنى، ءورشىپ بارا جاتقان قىزمەتكەرلەردىڭ بىلىكسىزدىگىنە قاراماستان، وسىپ-وركەندەپ جاتقان كومپانيالار مەن كورپوراسيالار بار عوي.
قالايشا بۇلاي بولادى؟ ءوزىنىڭ مانساپ ساتىسىنىڭ باس جاعىندا تۇرعان جانە ءوزىنىڭ بىلىكسىزدىك دەڭگەيىنىڭ اۋىلى ءالى الىس قىزمەتكەرلەر ءارقاشان بولادى، مىنە سولار فيرمالاردى دامىتىپ، ءونىمدى ەڭبەك ەتەدى جانە يدەيالارى كوپ.
مانساپقورلارعا ارنالعان يدەيالار
بىلىكسىزدىككە قاتىستى مىسقىلداپ، كەلەكەلەگەن ويلارىنان بولەك اۆتور قاعيدات تۋرالى العان ءبىلىمدى قالاي پايدالانۋعا بولاتىنىن ايتادى، قىزمەتتىك ساتىمەن بىر-ەكى باسقىشقا جوعارىلاۋ ءۇشىن نە ىستەۋ كەرەك ەكەنى جونىندە ءبىرتالاي ءجوندى-جوندى اقىلىن ايتادى.
مانساپقورلاردىڭ ەكى جولى بار. ءبىرىنشى جولدى اۆتور، — قىزمەتكەردى جوعارىلاتىپ وتىراتىن سارۋار-جەبەۋشىسى بولاتىن كەزدى — «قول» دەپ اتاعان. كوپ جاعدايدا «قول» — بۇل ۇيىمداعى لاۋازىمى جۇمىسكەردەن جوعارى تۇرعان جۇمىسكەردىڭ تۋىسى نەمەسە جاقسى تانىسى. ادەتتەگى جاعدايدا كومپانيالاردا «قولى» بارلاردى جانە سول «قول» ارقىلى جوعارىلاعانداردى ەشكىم جاقتىرمايدى. باسقا قىزمەتكەرلەر كورە الماي، قىزمەتكەردىڭ قاسيەتتەرىن ءجوندى-جونسىز سىناپ-مىنەپ، وعان سەبەپسىز سوقتىعا بەرەدى.
دەگەنمەن، ەگەر ادام وسى جولمەن جۇرگىسى كەلسە، سارۋار-جەبەۋشىنى تاۋىپ الۋ — ازدىق ەتەدى. وعان العا جىلجۋعا كومەكتەسىپ، قولداپ، تابىستى بولۋعا ىنتالاندىرىپ وتىرۋ قاجەت. ءوزىنىڭ بىلىكسىزدىك دەڭگەيىنە جەتىپ، قىزمەتىنە بايلانىپ قالعان قىزمەتكەرلەر جوق بولاتىن جوعارىلاتۋ جولىن ىزدەگەن ءجون. قىزمەتى جوعارى بولسا، ولاردان (بىلىكسىزدىك دەڭگەيىنە جەتىپ، بايلانىپ قالعان، ارى قاراي وسپەيتىندەردەن) قارعىپ وتە المايسىڭ، ءبىراق ولاردى «قولدىڭ» جاردەمىمەن اينالىپ وتۋگە بولادى. يكەمگە كەلگىشتىكتى دە ەستە ۇستاعان ابزال، ويتكەنى سارۋار-جەبەۋشى كەلەسى باسقىشقا شىعۋعا كومەكتەسە الادى، ءبىراق ارى قارايعى تابىس قىزمەتكەردىڭ تەك وزىنە بايلانىستى.
ەكىنشى جول — اۆتور «شىنتاق» دەپ اتاعان ىجداھاتتىلىق جولى. بۇل جاعدايدا قىزمەتكەر قاتتى تىرىسۋى، كەشكە جۇمىستا كوبىرەك وتىرۋى، تاڭەرتەڭ جۇمىسقا ەرتە بارۋى، ءوزىنىڭ كاسىبي ءىلىم-بىلىمىنىڭ دەڭگەيىن ۇنەمى ارتتىرىپ وتىرۋى ءتيىس. بىلىكتىلىك ارتتىرۋ كۋرستارىنا، سەمينارلار مەن ترەنينگتەرگە بارۋى، جۇمىسقا دەگەن ىنتا-ىقىلاسىن ءبىلدىرىپ، كوپتەگەن ءوتىمدى يدەيالارىمەن كوزگە ءتۇسۋى ءتيىس. بۇنىڭ ءبارى، ارينە، جاقسى جانە باسشىلىق پەن ءبىرقاتار ارىپتەستەرىن ءتانتى قىلىپ، ءسۇيىنتۋى بەك مۇمكىن، الايدا، بۇنداي قىلىقتى جەك كورىپ، ادامنىڭ بۇلاي تىرىسىپ-تىراشتانعانىن سۋقانى سۇيمەيتىندەر دە تابىلادى. «شىنتاق» ءادىسى «قول» سياقتى مانساپ ساتىسىنىڭ باسقىشتارىن وپ-وڭاي ەڭسەرە المايدى. تەك «قول» عانا ءوزىنىڭ بىلىكسىزدىگى كەسىرىنەن ارى قاراي جىلجي المايتىن قىزمەتىندە بايلانىپ-ماتالعان جۇمىسكەرلەردەن قۇرالعان پيتەر كەپتەلەگىن ەڭسەرە الادى.
پيتەر قاعيداسىمەن كەلىسپەي، كەز كەلگەن ەرەجەدەن ەرەكشە جاعداي بولاتىنىنداي، بۇندا قاعيدادان تىس، باعىنبايتىن كەزدەر بولاتىنىن دالەلدەۋگە تىرىسقاندارعا اۆتور ونىڭ ءبارى جالعان ەرەكشەلىكتەر ەكەنىن تۇسىندىرگەن. ءيا، تابىستى جۇمىسكەرلەردى دە، سالاق، بويكۇيەز جۇمىسكەرلەردى دە جۇمىستان شىعارىپ جاتادى، الايدا پيتەر قاعيداتى بىزگە مىنانى ايتادى: يەرارحيانى ساقتاۋ ءۇشىن وتە بىلىكتى قىزمەتكەرلەردەن دە، اسا بىلىكسىز قىزمەتكەرلەردەن دە ارىلۋ كەرەك. اقىلدى جانە بولاشاعى بار كىسىلەر تاۋەكەل ەتىپ، جاڭاشىل قام-قارەكەتتى جاقسى كورەدى، ونداي نارسە جىلدار بويى ءبارى ءبىر سارىنمەن كەلە جاتقان ۇلكەن ۇيىمداردىڭ ەرەجەلەرى مەن نورمالارىنا تومپاق كەلەدى. قىزمەتكەردىڭ تىڭعىلىقتىق، مۇقياتتىلىق، ۇقىپتىلىق سياقتى قاسيەتتەرىن ونىڭ كاسىبي قاسيەتتەرىنەن ارتىق كورەتىن كەزدەر بولادى عوي. بۇل پيتەر ينۆەرسياسى دەلىنىپ جۇرگەن نارسە.
پيتەر بىلىكتى ادامعا ورىندى بوساتۋ ءۇشىن عانا قىزمەتىنە بايلانىپ-ماتالىپ قالعان قىزمەتكەردى جوعارىلاتاتىن وتىرىك جوعارىلاتۋ سياقتى ەرەجەدەن جالعان ەرەكشە جاعدايدى دا سيپاتتايدى. وسىلايشا كومپانيادا دىم بىتىرمەيتىن بىرنەشە ديرەكتوردىڭ ورىنباسارى بولۋى مۇمكىن.
بىلىكسىزدىك دەڭگەيىنە جەتۋ بەلگىلەرى
اۆتور بەلگىلەر جيىنتىعىن «سوڭعى ايالداما سيندرومى» دەپ بىرىكتىردى. بىلىكتىلىك دەڭگەيىنىڭ شەگىنە جاقىنداعان كىسىنىڭ پروبلەمالارىنىڭ ۇستىنە پروبلەمارى جينالا بەرەدى. ولار جۇمىس ساپاسىنان عانا ەمەس، قىزمەتكەردىڭ دەنساۋلىعىنان دا، پسيحولوگيالىق كۇيىنەن دە كورىنىس تاۋىپ جاتادى. ادامنىڭ وزىنە زياندى اۋەس نارسەلەرى (تەمەكى، اراق ت.ب.)، مازاسىز ۇيقىسى، گاستريتتەر پايدا بولادى، جالپى — حال-احۋالى ناشارلايدى. بۇل رەتتە دارىگەرلەرگە ناقتى قانداي اۋرۋ ەكەنىن انىقتاۋ قيىنداپ، ادامنىڭ قاجىعانىنا جابا سالادى.
ادامعا ەشقانداي دەمالىس، ەشقانداي دارى-دارمەك كومەكتەسپەيدى، ويتكەنى دەنساۋلىقتىڭ ناشارلاۋىنىڭ سەبەبى — ادام ءوزىنىڭ جۇمىسىنىڭ ەش پايداسى جوقتىعىن، ءوزىنىڭ بىلىكسىزدىگىن سەزگەندىگىندە. سوندىقتان ادام جانىن تىنىشتاندىرۋ ءۇشىن الكوگولگە، تەمەكىگە جانە تاعى باسقا قۇمارلىققا سالىنادى.
سيندرومنىڭ باسقا دا سىرتقى بەلگىلەرى بار:
— ستولىنداعى مۇلتىكسىز ءتارتىپ-تازالىققا اۋەستىك نەمەسە ونىڭ باسقا جاعى — جۇمىس قىزۋ ءجۇرىپ جاتقانداي كورىنەتىن قۇجاتتاردىڭ تىم كوپ بولۋى؛
— قۇجاتتاردى قايتا-قايتا رەتتەپ قويا بەرۋگە تىرىسۋشىلىق؛
— سىزبالارعا، گرافيكتەرگە جانە دياگراممالارعا دەگەن اسقان قۇشتارلىق.
پسيحولوگيالىق تۇرعىدا سيندروم ءبارى جاقسى بولعان وتكەن شاقتى ايتا بەرۋ، مۇڭايا بەرۋ، تارتىنشاقتىق. باستىقتىڭ ءجۇرىس-تۇرىسى ءبىرتۇرلى، قالاي بولارىن ءبىلىپ بولمايتىنداي بولىپ وزگەرۋى، مىندەت-تاپسىرمالاردى ناقتى-ناقتى ءبولىپ بەرە المايدى، شەشىم شىعارا المايدى، تۇككە تاتىمايتىن نارسەلەرگە تىم كوپ ۋاقىتى مەن نازارىن سالادى.
سيندروممەن قالاي كۇرەسۋ كەرەك؟
بۇنداي جاعدايدا ادامعا ىشكى بالانس پەن گارمونيانى قايتارۋدىڭ ماڭىزى زور، سوندىقتان ءوزىنىڭ مۇمكىندىكتەرىن پايدالانىپ، بويىنا سەنىمدىلىك ۇيالاتۋ ءۇشىن اۋەستەنەتىن بىردەڭە، حوببي، مىسالى، سپورت، تاۋىپ بەرۋ قاجەت.
سوڭعى ايالداما سيندرومىن بولدىرماۋ تاسىلدەرى
اينالاڭىزداعى ادامداردىڭ ءجۇرىس-تۇرىسىن ساراپتاعانشا، ءوزىڭىزدىڭ جاي-كۇيىڭىز بەن ادەتتەرىڭىزدى باقىلاۋ كەرەك. پايدا بولعان اپاتيا، جۇمىس بارىسىنداعى ماسەلەلەرگە قىزىعۋشىلىقتىڭ جوقتىعى — سيندرومنىڭ العاشقى نىشاندارى.
كەلەسى قىزمەتىڭىز سىزگە قيىن سوعىپ، ول جەردە بىلىكتىلىك دەڭگەيىنىڭ شەگىنە جەتەمىن دەپ ويلاساڭىز، پيتەر بىلىكسىز قىزمەتكەر كەيىپىنە ەنۋگە كەڭەس بەرەدى. ءبىراق، جۇمىستان شىعارىپ جىبەرمەۋى ءۇشىن، بۇنى مۇقيات ءارى ايلاكەرلىكپەن ىستەۋ قاجەت. بۇل جەردە وزگەشە كيىممەن ءجۇرۋ، قوعامدىق جۇمىستان بويدى اۋلاق سالۋ، كەڭسە زاتتارى مەن ۇساق-تۇيەكتەردى ۇنەمدەۋ سەكىلدى ءبىراز ەركىنسىپ، ارقانى كەڭگە سالۋشىلىقتىڭ سەبى تيەدى. بۇلار باسشىلىقتىڭ كوڭىلىنەن شىقپاي قالىپ، قىزمەتىڭىزدىڭ جوعارىلاۋى ۇدەرىسىن باياۋلاتا الادى. بىلىكسىزدىكتى سيمۋلياسيالاۋ قىزمەتكەردىڭ دەنساۋلىعىن امان الىپ قالۋعا قاۋقارلى ەكەنىنە سەنىمدى. باستىسى — بىلىكتىلىگىڭىز اياقتالاتىن شەكتى ءبىلىپ، ودان ارى وتپەۋگە تىرىسۋ. جوعارىلاۋ — قاشان بولسىن جاقسى بولعانىمەن، ونىڭ سالدارى سونشالىقتى وڭدى بولماۋى مۇمكىن. سول ءۇشىن، جوعارىلاۋ سوڭعى ايالداما سيندرومىنا سوقتىرۋى مۇمكىن ەكەندىگىن بىلگەن ادام ونىڭ قاۋپىنەن قۇتىلا الادى.
لوۋرەنس پيتەردىڭ كىتابى ويعا شومىپ، ءوزىڭنىڭ جۇمىسىڭ مەن ءجۇرىس-تۇرىسىڭدى سارالاپ شىققىزادى. اركىم ءوز سالاسىنىڭ ۇزدىگى بولۋعا تىرىساتىن، ءبارى مانساپقا جەتۋگە اسىعاتىن قازىرگى زاماندا، پيتەردىڭ پىكىرىنشە، ءبىز ءار ءتۇرلى دەڭگەيدەگى بىلىكسىزدىككە تاپ بولىپ وتىرامىز. وسىنشا پەسسيميستىك كوڭىل كۇيگە قاراماستان، اۆتور پايىمداۋعا ارنالعان كوپتەگەن تاقىرىپتاردى، ءوزىمىزدىڭ بىلىكتىلىك دەڭگەيىمىزدى زەردەلەپ، ونىڭ اياسىنان شىعۋ ءۇشىن ومىرىمىزدە قولدانا الاتىن كەڭەستەردى جانە باعىتتاردى بەرىپ وتىر.
You Might Also Like
-
ءمۇعالىم-نوۆاتور ۆ. ف. شاتالوۆ 70-جىلدارى مەكتەپ جانە جوعارى وقۋ ورىندارى مۇعالىمدەرى اراسىندا «شاتالوۆ ءادىسى» دەپ اتالىپ كەتكەن ءوزىنىڭ بايىپتى وقىتۋ جۇيەسىن جاساپ شىعاردى. ۆ.ف. شاتالوۆت...
-
تاس كەرەڭ تىنىشتىقتا ۇيقىعا مەزگەگەن ارال، قۇددى ءبىر سەرەيىپ قالعانداي، تەڭىز دە ۇيقىعا مۇلگىگەن، — ءتۇر-تۇرپاتى عاجايىپ وسىناۋ ءزىل قارا تاستى الدەكىم ءوزىنىڭ قارۋلى قولىمەن تەڭىزدىڭ كوكىرەگىنە...
