InfoHub Logo

قوجانىڭ ءبىر كورشىسى ءبىر شارۋا جايىندا قوجامەن اقىلداسۋعا كەلەدى. اڭگىمەسىن ايتىپ بولعان سوڭ الگى كىسى:

— قۇدايشىلىعىڭدى ايتشى، قالاي دەيسىڭ، مەنىكى دۇرىس ەمەس پە؟ — دەيدى.

— البەتتە، سەنىكى دۇرىس، باۋىرىم، — دەيدى قوجا.

كەلەسى كۇنى وسى كورشىمەن ءبىر نارسە جونىندە داۋلاسىپ جۇرگەن ادام دا قوجاعا كەلەدى. ول ءوزىن اقتاي سويلەپ، ءىستىڭ ءمان-جايىن قوجاعا وزىنشە تۇسىندىرەدى. ءسوز سوڭىندا:

— ال، قوجەكە، بۇعان نە ايتاسىڭ؟ مەنىكى دۇرىس ەمەس پە؟ — دەپ سۇرايدى. قوجا بۇعان دا:

— البەتتە، البەتتە، سەنىكى دۇرىس، — دەيدى.

ەكى داۋگەردىڭ دە ءسوزىن تىڭداپ وتىرعان قوجانىڭ ايەلى، ەكى ءسوزدى دە ماقۇلداعانى ءۇشىن كۇيەۋىن ءبىر ۇيالتپاق بولىپ:

— اپەندە-اۋ، ساعان نە بولعان؟ كەشە قورقىت كورشى كەلىپ، داۋىن ايتىپ ەدى، ونىكىن «دۇرىس» دەدىڭ، بۇگىن ونىڭ داۋلاسىپ جۇرگەن ادامى سانجار كورشى كەلىپ ەدى، وعان دا «سەنىكى دۇرىس» دەدىڭ. مۇنىڭ قالاي؟ سەن قازىسىڭ، مەن قازىنىڭ ايەلىمىن، و زاماندا، بۇ زامان داۋكەر مەن جاۋاپكەر ەكەۋىنىڭ ءسوزى بىردەن دۇرىس بولا ما ەكەن؟ — دەيدى.

سوندا قوجا بايسالدى پىشىنمەن:

— قاتىن، سەنىكى دە دۇرىس، — دەپتى.

---