قازاق قوعامى نەگە سارى باسىلىمعا قۇمار؟
ەڭ اۋەلى سالقىنقاندى حالىقتىڭ ساناسىن ءسوز ەتپەستەن بۇرىن، “سارى باسىلىم” ۇعىمىنا توقتالايىق. سارى باسىلىم - سەنساسيالىق، شۋلى، بەلگىلى ءبىر وزەكتىلىگى بولماسا دا حالىق اراسىندا كەڭىنەن تالقىلاناتىن ءباسپاسوزدىڭ ءبىر ءبولىمى. بۇگىندە قازاق قوعامىندا اتالعان باسىلىمعا سۇرانىس تىپتەن جوعارى. حالىقتىڭ “ساپاعا” قاراعاندا “سارى” باسىلىمعا بەت بۇرۋىنىڭ وزىندىك سەبەپتەرى دە جوق ەمەس. جاڭا تەحنولوگيالار زامانىندا ەڭبەكتەگەن بالادان ەڭكەيگەن قارتقا دەيىن الەۋمەتتىك جەلىگە تاۋەلدى ەكەندىگى جاسىرىن ەمەس. وقىرماننىڭ جاسىنان كارىسىنە دەيىن كۇندە جۇلدىزداردىڭ پاراقشاسىن اقتارىپ، وزگەنىڭ جەكە ومىرىنەن حاباردار بولعاندى ۇناتادى. سوڭعى تالقىعا ىلىككەن تاقىرىپتاردىڭ ءبىرى - ۇلى دالا بالاسى تورەعاليدىڭ قارىنداسىنىڭ تويى. قوس عاشىققا باقىت تىلەگەن وقىرماندارعا قاراعاندا، “قالىڭ مالى قانشا بولىپتى؟” ، “جاساۋىندا تەك برەند زاتتار ەكەن” دەگەن سەكىلدى سۇراقتار ەل قىزىعۋشىلىعىن تۋدىردى. ەڭ وكىنىشتىسى، بۇگىنگى قوعامعا ەل ىشىندەگى ەلەۋلى وقيعاعا قاراعاندا وسى سىندى ارزان اقپاراتتار الدەقايدا ءوتىمدى. سونىڭ ارقاسىندا ماردىمسىز دۇنيەلەر باسپا ءسوز بەتتەرىن قىزىل جالىنداي جالماپ جاتىر. قالىڭ بۇقارانىڭ سەنساسيالى وسەك-ايانعا قۇمارتۋى ساپالى باسىلىمنىڭ ءوزىن-وزى اقتاماۋىنا اكەلۋدە.
ودان بولەك، ءبىزدىڭ قوعامدا ساياسي ءبىلىمنىڭ تومەندىگى دە ساپاسىز اقپاراتقا تاۋەلدىلىكتىڭ بىردەن ءبىر سەبەبى بولىپ وتىر. دەموكراتيالى قوعامدا حالىق ءۇنىن “تىڭدايتىن” ەمەس، “تونايتىن” بيلىكتىڭ ۇستەمدىگى بايقالادى. سالدارىنان كوپشىلىك قوعامداعى قوردالانعان ماسەلەنى قوزعاۋدان اياق تارتىپ، ماعىناسىز ماسەلەنى مىسە تۇتادى.
قوعامنىڭ داۋرىقپا اڭگىمەگە ءۇيىر بولۋى شىندىقتى شىرقىراتا جازاتىن باسىلىمداردىڭ سانىن ازايتىپ، رەيتينگ ءۇشىن جۇمىس جاسايتىن رەداكسيا قاتارىن كوبەيتىپ وتىر. وسەك-ايانعا قۇمارتقان وقىرماننىڭ ارقاسىندا “قيالي، ارانشىل، سۋايت” جۋرناليستەر دە كۇن ساناپ ارتۋدا.
دەمەك، ب ا ق بەتتەرىندەگى ماردىمسىز اقپاراتتىڭ ءداۋىرى جاقىن ارادا اياقتالماسى بەلگىلى. قوعام ساناسىنىڭ سوقىرلىعىنان با، الدە، بيلىكتىڭ جىبەرگەن قاتەلىگىنەن بە “سارى باسىلىمنىڭ” عۇمىرى ۇزارىپ، بەتتەرى ءالى دە قالىڭداي تۇسپەك. الايدا، تەك ءبىر نارسەنى ەستەن شىعارمايىق. اڭگىمە بۇزاۋ ەمىزەر، بۇزاۋ تاياق جەگىزەر. بوس اڭگىمەگە ۋاقىت قۇرتىپ، بولاشاقتىڭ ەنشىسىنەن تاياق جەمەسەك بولعانى.
You Might Also Like
-
بازارباي جاسمين، ءال-فارابي اتىنداعى قازاق ۇلتتىق ۋنيۆەرسيتەتى، «ءدىنتانۋ جانە مادەنيەتتانۋ» كافەدراسى، مادەني انتروپولوگيا ماماندىعىنىڭ 2-كۋرس ماگيسترانتى
-
2022 جىلعى الەم چەمپيوناتى وعان دەيىن وتكىزىلگەندەردىڭ بارىنەن ەرەكشەلەنەدى. بىرىنشىدەن، جارىس العاش رەت جازدا ەمەس، كۇزدە-قىستا وتەدى، ەكىنشىدەن، بارلىق ستاديوندار، سپورتشىلاردىڭ تۇراتىن جەرلەرى ج...
