قازاقستان جانە جۇڭگو اگرارلىق-تەحنيكالىق ۋنيۆەرسيتەتتەرى ستۋدەنت الماسۋعا كەلىستى
بۇگىن قازاقستاننىڭ اگروتەحنيكالىق ۋنيۆەرسيتەتتەرىنىڭ جەتەكشىلەرى مەن اۋىل شارۋاشىلىعى ماماندارىنىڭ جۇڭگو حالىق رەسپۋبليكاسىنا ارنايى ساپارى اياسىندا جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى مەن سولتۇستىك باتىس اۋىل شارۋاشىلىق، ورمان شارۋاشىلىق عىلىم-تەحنيكا ۋنيۆەرسيتەتىنىڭ اراسىندا ءوزارا كەلىسىم تۋرالى مەموراندۋم جاساستى. بۇل تۋرالى ق ر اشم باسپا ءسوز قىزمەتى حابارلادى.
اتالعان ىنتىماقتاستىق جونىندەگى كەلىسىمگە جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى رەكتورى ن.سەرعالييەۆ پەن سولتۇستىك باتىس اۋىل شارۋاشىلىق، ورمان شارۋاشىلىق عىلىم-تەحنيكا ۋنيۆەرسيتەتىنىڭ رەكتورى سۋ چي شين قول قويدى.
مەموراندۋمنىڭ باستى ماقساتى - عىلىمي-زەرتتەۋ جانە ءبىلىم بەرۋ سالاسىنداعى تاراپتاردىڭ كەزەڭدىك جانە جۇيەلى تۇردە تاجىريبە الماسۋىنا جانە ىنتىماقتاستىققا جاردەمدەسۋ بولىپ تابىلادى.
ونىڭ اياسىندا، پروفەسسورلىق-وقىتۋشىلار قۇرامى، دوكتارانتتار، ماگيسترانتتار مەن ستۋدەنتتەردىڭ اكادەميالىق ۇتقىرلىعىن دامىتۋ جانە ىزدەنۋشىلەرگە عىلىمي، پەداگوگيكالىق جانە زەرتتەۋ تاعىلىمدامالارىنان وتۋگە جاردەمدەسۋ، الماسۋ بارىسىندا ستۋدەنتتەردىڭ وقۋ ۇردىسىندە العان كرەديتتەرىن ەكىجاقتى تانۋ، ءوزارا مۇمكىن بولاتىن ءبىلىم بەرۋ باعدارلامالارىن جانە ەكى ديپلومدى ءبىلىم بەرۋدى دامىتۋ ءۇشىن ۋنيۆەرسيتەتتەردىڭ عىلىمي جانە ءبىلىم بەرۋ مۇمكىنشىلىكتەرىن پايدالانۋ جانە ت.ب. مىندەتتەر كوزدەلۋدە.
سونداي-اق، ءبىلىم بەرۋ مەن عىلىمنىڭ وزەكتى ماسەلەلەرى بويىنشا بىرلەسكەن سيمپوزيۋمدار، حالىقارالىق عىلىمي-پراكتيكالىق كونفەرەنسيالار مەن سەمينارلار ۇيىمداستىرۋ، ورتاق عىلىمي-زەرتتەۋ باعدارلامالارى مەن جوبالاردى قولعا الۋ جوسپارلانۋدا.
كەلىسىمنىڭ باسىمدىققا يە باعىتتارىنا بىرلەسكەن عىلىمي-زەرتتەۋ ۇيىمدارىن ۇيىمداستىرۋ ارقىلى جاڭا تەحنيكا مەن تەحنولوگيالاردى يگەرىپ، يننوۆاسيالىق كاسىپورىندار جانە وقۋ مەن ادەبيەتتەرمەن الماسۋ ءۇشىن بىرلەسكەن اۆتورلىق ۇجىمدار قۇرۋ جاتادى.
ايتا كەتەيىك، «جازكەن جيەمبايەۆ اتىنداعى قازاق وسىمدىك قورعاۋ جانە كارانتين عىلىمي-زەرتتەۋ ينستيتۋتى» ج ش س باس ديرەكتورى ا.ساعيتوۆ باستاعان قازاقستاننىڭ اگروتەحنيكالىق ۋنيۆەرسيتەتتەرىنىڭ جەتەكشىلەرى مەن اۋىل شارۋاشىلىعى ماماندارىنان قۇرالعان ارنايى توپ ۇستىمىزدەگى جىلدىڭ 23 قاراشاسىنان بەرى قحر اۋماعىنداعى اۋىل شارۋاشىلىعىنىڭ ەڭ باستى وندىرىستىك كەشەندەرى مەن سالالىق وقۋ ورىندارىنىڭ جۇمىستارىمەن تانىسۋدا.
You Might Also Like
-
ريم اتالعاندا كوز الدىڭا كوليزەي، پاريج دەگەندە ەيفەل مۇناراسى ەلەستەيدى. قالالاردىڭ كورىكتى، تانىمال جەرلەرىنەن بولەك قالالاردا كوپشىلىك بىلە بەرمەيتىن قىزىقتى ارت-نىساندار، بەينەلى اۋداندار دا بار.
-
نازاربايەۆ ۋنيۆەرسيتەت جەتەكشىلىگى گونكونگ ستۋدەنتتەرىن گرانتپەن وقىتۋ مۇمكىندىگىن قاراستىرۋدا، ال 2020 جىلعا قاراي جوو-داعى شەتەلدىك ستۋدەنتتەر سانىن 20% دەيىن جەتكىزۋ جوسپارلانعان.
