InfoHub Logo

ءبىر جولعى ەلشىلىك ساپاردا جوڭعار حانى قالدان بوشاقتۋ قازاق ەلشىلەرىنە:

— ءيا، قازاقتار، نەمەنەگە كەلدىڭدەر، ايتاتىندارىڭدى ايتىڭدار دا، ەلدەرىڭە قايتىڭدار، — دەپتى.

سوندا بوساعا جاقتا جايعاسقان، جەتەلى جەتكىنشەك قازىبەك لىپ ەتە كوتەرىلىپ كەپ، قونتايشىعا شوقتاي جانعان كوزدەرىمەن تەسىلە قاراپ تۇرىپ:

— ءبىز قازاق دەگەن مال باققان ەلمىز، ءبىراق ەشكىمگە سوقتىقپاي، جاي جاتقان ەلمىز. ەلىمىزدەن قۇت-بەرەكە قاشپاسىن دەپ، جەرىمىزدىڭ شەتىن جاۋ باسپاسىن دەپ، نايزاعا ۇكى تاققان ەلمىز، ەشبىر دۇشپان باسىنباعان ەلمىز، باسىمىزدىڭ ءسوزدى اسىرماعان ەلمىز. دوسىمىزدىساقتاي بىلگەن ەلمىز، ءدام-تۇزدى اياقتاي بىلگەن ەلمىز، اسقاقتاعان حان بولسا، حان ورداسىن تاپتاي بىلگەن ەلمىز. اتادان ۇل تۋسا، قۇل بولامىن دەپ تۋمايدى، انادان قىز تۋسا، كۇڭ بولامىن دەپ تۋمايدى. ۇل مەن قىزدى قاماتىپ وتىرا المايتىن ەلمىز. سەن قالماق تا، ءبىز قازاق، قارپىسقالى كەلگەنبىز. قازاق، قالماق بالاسى، تابىسقالى كەلگەنبىز. تانىمايتىن جات ەلگە تانىسقالى كەلگەنبىز. تانىسۋعا كونبەسەڭ، شابىسقالى كەلگەنبىز. سەن قابىلان دا، ءبىز ارىستان، الىسقالى كەلگەنبىز. جاڭا ۇيرەتكەن جاس تۇلپار جارىسقالى كەلگەنبىز. تۇتقىر سارى جەلىمبىز، جابىسقالى كەلگەنبىز. سەن تەمىر دە، ءبىز — كومىر، ەرىتكەلى كەلگەنبىز. ەكى ەلىكتىڭ لاعىن تەلىتكەلى كەلگەنبىز، ەگەسەتىن ەر شىقسا يىلتكەلى كەلگەنبىز. بەرسەڭ جوندەپ ءبىتىمىڭدى ايت، نە تۇرىساتىن جەرىڭدى ايت، - دەپ، كەلبەتتى كەلگەن جاس بالا سۇڭقارداي ساڭقىلداعان داۋسىمەن تۇيدەكتى، جالىندى سوزدەردى مەرۋەرتتەي ءتىزىپ، بۇرشاقتاي جاۋدىرىپتى.

— بالام، اتىڭ كىم؟ — دەيدى سوندا قالدان بوشاقتۋ.

— اتىم — قازىبەك، اكەم — كەلدىبەك بي. ۇلتىم — قازاق، رۋىم — قاراكەسەك، — دەپ جاۋاپ بەرىپتى.

— ەندەشە، داۋسىڭ قازدىڭ داۋسىنداي قاڭقىلداپ شىعادى ەكەن، ەسىمىڭ قاز داۋىستى قازىبەك بوپ قايتا جاڭعىرسىڭ — دەپ، ونىڭ قاناتى بار تۇلپار، وركەشى بار نار، زاڭعارى بار تاۋ ەكەندىگىن قابىلان ءتۇستى قونتايشى ءتۇسىنىپ، ءتۇسى جىلىپ، شىبىقتاي ءيىلىپتى.

سونىمەن ەكى جاق بىتىمشىلىك، بەيبىتشىلىككە ۋاعدالاسادى.

ۋىزداي جاس قاز داۋىستى قازىبەكتىڭ تاپقىرلىعى مەن العىرلىعى، زەردەلىلىگى مەن سانالىلىعى، باتىرلىعى مەن باتىلدىعى ارقاسىندا قازاق ەلشىلەرىنىڭ جورىتقاندا جولى بولىپ، ايى وڭىناڭ تۋىپ، اتامەكەنىنە قاناتتانىپ قايتادى.

---