InfoHub Logo

وسپانوۆا گۇلماريا تۇرىسبەك قىزى
ءال-فارابي اتىنداعى قازۇۋ-دىڭ فيلولوگيا جانە الەم تىلدەرى فاكۋلتەتىنىڭ
قازاق ءتىلى مەن ادەبيەتىنىڭ 2-كۋرس ستۋدەنتتى

كوپشىلىك قاۋىمنىڭ، اسىرەسە، جاستاردىڭ قۇندى قازىنا كىتاپقا دەگەن  سۇرانىسى كۇننەن-كۇنگە  ارتىپ كەلە جاتقانىن كورىپ ءجۇرمىز. ءتىپتى، بۇگىندە كىتاپ وقۋ سانگە اينالدى دەسەك، ارتىق ايتقانىمىز ەمەس. بۇل، ارينە، قۋانتارلىق جايت. وعان  الەۋمەتتىك جەلىلەردە  كىتاپتار جايلى قىزىقتى  جازبالار  جازاتىن پاراقشالاردىڭ كوبەيۋى، ءتۇرلى جانرداعى كىتاپتاردىڭ بىرنەشە تيراجبەن جارىققا شىعۋى، سونداي-اق، كىتاپ دۇكەندەرىنىڭ قارقىندى جۇمىسى دالەل. 

بۇل تۇرعىدا رۋحاني بايلىقتى  بارىنشا ناسيحاتتاپ، قازاق ءتىلدى كىتاپ نارىعىنىڭ قالىپتاسۋىنا ءوز ۇلەسىن  قوسىپ جۇرگەن «Qazyna» كىتاپ ءۇيىن ەرەكشە اتاپ وتكەنىمىز ءجون.

بيىلعى  جىلدىڭ ءساۋىر ايىندا ءوز جۇمىسىن باستاعان كىتاپ دۇكەنى از عانا ۋاقىت ىشىندە وقىرمان قاۋىمنىڭ ىستىق ىقىلاسىنا بولەنىپ ۇلگەردى. وسىنداي يگى باستامانىڭ نەگىزىن قالاعان - الماس شايكەن بولسا، كىتاپ قورىن توپتاستىرىپ، جيناعان - كۇلتەگىن اسپان ۇلى. «قازىنانىڭ» جالپى  40 مىڭعا جۋىق كىتاپ قورى بار. ال سانى جاعىنان 3500 كىتاپتى قۇرايدى.

وزگە كىتاپ دۇكەندەرى سياقتى كىتاپتى ساتىپ قانا قويماي،  تىڭ جوبالار مەن ىزگى ءىس-شارالاردى  ۇدايى ۇيىمداستىرۋى- «قازىنانىڭ» باستى  ەرەكشەلىگى.

كىتاپ ءۇيىنىڭ ايرىقشا جوبالارىنىڭ ءبىرى- بەلگىلى اقىن-جازۋشىلار، قوعام، مادەنيەت قايراتكەرلەرىمەن جۇزدەسۋ وتكىزەتىن «Qazynaly gonaq» جوباسىنىڭ  كىتاپقا دەگەن قىزىعۋشىلىقتى ودان ءارى ارتتىرا تۇسۋدە ماڭىزى زور. سەبەبى، وزدەرى ۇلگى تۇتاتىن تۇلعالاردىڭ  رۋحانيات، سونىڭ ىشىندە كىتاپ وقۋ جايلى تاعىلىمدى  كەڭەستەرى وقىرماندارعا وي سالماي قويمايدى. بۇل جوبانىڭ العاشقى قوناعى- بەلگىلى ساياساتكەر، قوعام قايرەتكەرى دوس كوشىممەن وتكەن كەزدەسۋدە  ۇلت تاعدىرىنا قاتىستى  وزەكتى ماسەلەلەر ءسوز بولدى. 

ودان سوڭ، ەتنوگراف، جازۋشى، قازاق ءداستۇرىنىڭ ناسيحاتشىسى زەينەپ احمەتوۆامەن بولعان سۇبەلى سۇحباتتا «كۇرەتامىر» كىتابىنىڭ  نەگىزىندە ءسالت-داستۇر، ۇلتتىق تاربيەنىڭ قىر-سىرى جايىندا اسەرلى اڭگىمە ءوربىدى. كەيىنگى كەزدەسۋلەر كۇلزيا ناابي، كامشات بەكجىگىتوۆا سىندى كاسىبي كوۋچ، پسيحولوگتارمەن وزىندىك دامۋ، وزگەرىس تاقىپتارىنىڭ اياسىندا بولدى. ال حالقىمىزدىڭ  كورنەكتى  اقىنى، ۇلت جاناشىرى مۇحتار شاحانوۆ، قازاقستاننىڭ حالىق ءارتىسى، اكتەر تۇڭعىشباي جامانقۇلوۆ، سونىمەن بىرگە، ەرەجەسىز جەكپە-جەكتەن الەمنىڭ ءۇش دۇركىن چەمپيونى، قوعامدىق اعارتۋشى  ارداق نازاروۆ، دۋبلياج اكتەرى ازامات قاناپيالارمەن بولعان جۇزدەسۋلەر كىتاپسۇيەرلەرگە ەستە قالارلىقتاي اسەر قالدىردى.

سونىمەن قاتار،  كىتاپ دۇكەنى وسى ۋاقىتقا دەيىن  ەكى مارتە «Qazynaparty»- قالا جاستارىمەن بىرگە ءان ايتىپ، كۇي شەرتىپ، جۇرتشىلىقتىڭ كوڭىلىن كوتەرەتىن رۋحاني كەش ۇيىمداستىردى. كومەككە  مۇقتاج جاندارعا  قول ۇشىن سوزۋدى ماقسات ەتكەن  «قازىنامەن قايىرىمدىلىق» اتتى  يگىلىكتى  شاراسى  تاعى بار. 

جۋىردا عانا، ياعني، قىركۇيەكتىڭ  29-ى كۇنى «وقى» وقىرماندار كلۋبى ءوز جۇمىسىن باستادى. بۇدان بىلاي تۇراقتى وقىرماندار باس قوسىپ، «قازىنا» كىتاپ ۇيىندە ءتۇرلى قازاقشا  كىتاپتاردى  بىرگە تالدايتىن بولادى. بۇل دا ءوز كەزەگىندە كىتاپ وقۋ مادەنيەتىنىڭ جوعارىلاۋىنا سەپتىگىن تيگىزەرى ءسوزسىز. 

وسىلايشا،  ۇلتتىق  قۇندىلىقتارىمىزدى دارىپتەپ، كىتاپ ءيميدجىن كوتەرۋگە، سول ارقىلى ءتىلىمىزدىڭ مارتەبەسىن بيىكتەتۋگە بارىنشا اتسالىسىپ جۇرگەن  «Qazyna»  بۇگىندە كىتاپسۇيەر قاۋىمنىڭ سۇيىكتى مەكەنىنە اينالدى. رۋحاني كەمەلدىككە ۇمتىلعان ءاربىر قازاق ءۇشىن بۇل  كىتاپ ءۇيى- تاپتىرماس مۇمكىندىك.

---