InfoHub Logo

ءقازىر بىلۋگە قاجەت جاڭا اقپاراتتىڭ كولەمى جىلىنا 30 پايىزعا ءوسىپ وتىرادى. بۇل تۋرالى بۇگىن رەسپۋبليكالىق جاستار فورۋمى اياسىندا جاستارمەن كەزدەسكەن ق ر پرەمەر-مينيسترىنىڭ ورىنباسارى يمانعالي تاسماعامبەتوۆ ايتتى.

ۇكىمەت باسشىسىنىڭ ورىنباسارى جاستارعا تابىسقا جەتۋ ءۇشىن تالاپتى بولۋ از، ءبىلىمدى بولۋ كەرەكتىگىن باسا ايتتى.

«بۇگىنگى ءىلىم-بىلىم  بۇل كەشەگى وقۋدان الدەقايدا بولەك دۇنيە. ءبىر مەكتەپ، ءبىر ۋنيۆەرسيتەتتىڭ شەڭبەرىندە ەمەس، اعىمى قاتتى اقپاراتتى زاماننىڭ ءار كۇنىندە قاجەت ۇلى قۇدىرەت. مىسالى، ءقازىر بىلۋگە قاجەت جاڭا اقپاراتتىڭ كولەمى جىلىنا 30 پايىزعا ءوسىپ وتىرادى. ياعني، ءسىز ۋنيۆەرسيتەتتى بىتىرەمىن دەگەنشە، اقپاراتتىق كەڭىستىك تولىعىمەن جاڭالانىپ كەتەدى. ناتيجەسىندە تەحنولوگيا سالاسىنداعى كۇن سايىن ەمەس، ساعات سايىن بولاتىن وزگەرىستەردەن ءبىر ءسات كەش قالۋ - ىزبە-ىز وكشەلەپ كەلە جاتقان باسەكەلەستىككە ورىن بەرىپ، ارتقا شەگىنۋ دەگەن ءسوز»، - دەدى تاسماعامبەتوۆ.

وسى رەتتە ۆيسە-پرەمەر ءبىلىم-عىلىم سالاسى مەملەكەت نازارىنان ەش ۋاقىتتا تىس قالماعانىن اتاپ ءوتتى. ونىڭ دالەلى رەتىندە ەلورداداعى «نازاربايەۆ» ۋنيۆەرسيتەتىن اتاپ، ءبىلىم ورداسىن ەڭ ماڭىزدى ۇلتتىق جوبالاردىڭ ءبىرى ەكەندىگىن ايتتى.

«ءقازىردىڭ وزىندە ونىڭ وقۋ ءىسىن ۇيىمداستىرۋعا الەمنىڭ ەڭ ۇزدىك ۋنيۆەرسيتەتتەرى ات سالىسىپ، حالىقارالىق تالاپقا ساي جاڭا ءبىلىم جۇيەسىن قالىپتاستىرىپ وتىر. بولاشاقتا ەلىمىزدىڭ بارلىق جوعارى وقۋ ورىندارى وسى وزىق جۇيەگە وتەتىن بولادى»، - دەدى پرەمەر-مينيستردىڭ ورىنباسارى.

---