قازۇۋ-دا ءىى حالىقارالىق فارابي فورۋم ءوتتى
ءساۋىر ايىنىڭ 4-5 كۇندەرى ارالىعىندا الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە فارابي ورتالىعىنىڭ 30-جىلدىعىنا وراي ۇيىمداستىرىلعان «ءتىل فيلوسوفياسى جانە ءابۋ ناسىر ءال-فارابي فيلوسوفياسىنىڭ ءتىلى» اتتى ءىى حالىقارالىق فارابي فورۋمى وتكىزىلدى. حالىقارالىق فارابي فورۋمى – ادامزاتتىڭ ۇلى ويشىلى ءال-فارابي مۇراسىن كەڭىنەن زەرتتەۋ مەن تاراتۋعا ىقپال ەتەتىن ايتۋلى شارا. فورۋمنىڭ نەگىزگى ماقساتى – فارابيتانىشۋلاردىڭ باسىن قوسىپ، جۇرگىزىلگەن زەرتتەۋلەردى سارالاۋ جانە ءال-فارابيدىڭ كەڭ مۇراسى ارقىلى قازىرگى قوعامنىڭ وركەندەۋىنىڭ رۋحاني، تاريحي جانە فيلوسوفيالىق نەگىزدەرىن تەرەڭىنەن ءتۇسىنۋ. فورۋم جۇمىسىن ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى-رەكتورى تۇيمەبايەۆ جانسەيىت قانسەيىت ۇلى قۇتتىقتاۋ سوزىمەن اشتى. فورۋمنىڭ اشىلۋ سالتاناتىندا سيريانىڭ قازاقستانداعى قۇرمەتتى كونسۋلى سامير دەرەح، ل.ن. گۋميليەۆ اتىنداعى ەۋرازيالىق ۇلتتىق ۋنيۆەرسيتەتىنىڭ پروفەسسورى، فارابيتانۋشى تولەۋبايەۆا سامال اباي قىزى (استانا)، نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ رەكتورى ال-دجيندي مۋحامماد اش-شاححات (مىسىر)، يران يسلام رەسپۋبليكاسىنىڭ الماتى قالاسىنداعى باس كونسۋلى موحسين فاگاني، وزبەكستاننىڭ الماتى قالاسىنداعى باس كونسۋلى فاتحۋللايەۆ ابرور جانە ت.ب. قۇرمەتتى قوناقتار وزدەرىنىڭ قۇتتىقتاۋ لەبىزدەرىن ءبىلدىردى. فورۋم جۇمىسىنا قازاقستانداعى شەتەلدىك كونسۋلدار، شەت مەملەكەتتەردەگى فارابي ورتالىقتارىنىڭ عىلىمي قىزمەتكەرلەرى، فارابيتانۋشىلار، وزبەكستان، تۇركيا جانە ت.ب. مەملەكەتتەردەن جاس عالىمدار ات سالىستى. فورۋمعا قاتىسۋشىلار عىلىم مەن ءبىلىمنىڭ ينتەگراسياسى، قازىرگى قوعامنىڭ رۋحاني-ادامگەرشىلىك جانە زياتكەرلىك مادەنيەتىن جەتىلدىرۋ جايلى كەڭ اۋقىمدى وزەكتى ماسەلەلەردى تالقىعا سالدى.
ەكى كۇنگە سوزىلعان حالىقارالىق ءىس-شارا اياسىندا پىكىرتالاس الاڭدارى مەن دوڭگەلەك ۇستەل جۇمىستارى ۇيىمداستىلىرىپ، فيلوسوفيالىق ەسسە جانە «قازاق فيلوسوفياسىنىڭ وزەكتىلىگى» اتتى بەينەروليكتەر بايقاۋى وتكىزىلدى.
ءال-فارابي اتىنداعى قازۇۋ
فيلوسوفيا جانە ساياساتتانۋ فاكۋلتەتى
مادەنيەتتانۋ ماماندىعىنىڭ 2 كۋرس ماگيسترانتى ساتىبالدينا ارۋجان
عىلىمي جەتەكشى
فيلوسوفيا عىلىمدارىنىڭ كانديداتى، قاۋىمداستىرىلعان پروفەسسور مەيربايەۆ ب.ب.
You Might Also Like
-
الاشتان شىققان تۇڭعىش ەلشى — كورنەكتى الاش قايراتكەرى، عالىم ءنازىر تورەقۇل ۇلى. (1892-1937جج).
