InfoHub Logo

قازاق ءبىلىمىنىڭ قارا شاڭىراعى سانالاتىن ءال-فارابي اتىنداعى قازاق ۇلتتىق ۋنيۆەرسيتەتى كوپتەگەن يگى باستامالار مەن جوبالاردىڭ ۇيىمداستىرۋشىسى. ۋنيۆەرسيتەت بولاشاق ۇرپاققا ساپالى ءبىلىم بەرۋمەن قاتار، قازىرگى ستۋدەنتتىڭ بولاشاق باسەكەگە قابىلەتتى مامان، دۇنيەتانىمى كەڭ، جان-جاقتى دامىعان، ۇلتجاندى، سانالى ازامات  رەتىندە قالىپتاسۋى ءۇشىن ءتۇرلى جوبالاردى ىسكە قوسۋدا. وعان ءوزىمىز ءبىلىم الىپ، قىزمەت ەتەتىن «پەداگوگيكا جانە ءبىلىم بەرۋ مەنەدجمەنتى» كافەدراسىنىڭ قابىرعاسىندا جۇزەگە اسىرىلىپ جاتقان جوبالار دالەل بولا الادى.

«قازۇۋ ستۋدەنتتەرى وقۋعا ءتيىس 100 كىتاپ»، «اينالاڭدى نۇرلاندىر!»، «سالاۋاتتى ءومىر سالتى»، «جاسىل قالاشىق» سياقتى  جوبالار جاستاردى ادامگەرشىلىك پەن ەستەتيكالىق مادەنيەتكە تاربيەلەپ، تۇلعالىق دامۋى ءۇشىن جاعداي جاساسا، عىلىمي جانە يننوۆاسيالىق جوبالار ستۋدەنت-جاستاردىڭ  ءداستۇرلى تانىم ەرەكشەلىگىنە ۇقسامايتىن جاڭا جۇيەنى ويلاپ تابۋ، ءبىلىم مەن ماتەريالدىق مۇمكىندىكتەردى پايدالانا وتىرىپ كونەنى وڭدەۋ، بار نارسەنى جاقسارتىپ، كەم نارسەنى تولىقتىرۋ، جاڭا زات، جاڭا ءادىس، جاڭا جول، جاڭا ورتا جاڭالىعىمەن ءومىردى جاڭارتۋ قابىلەتتەرىن دامىتۋدا زور ۇلەسىن تيگىزۋدە.

سونىمەن قاتار، قازىرگى تاڭدا ءبىلىم ورداسى «جەمقورلىقسىز ۋنيۆەرسيتەت» جوباسىن بەلسەندى تۇردە قولعا الۋدا. جوبانىڭ ماقساتى: ءال-فارابي اتىنداعى قازۇۋ-دە جەمقورلىققا قارسى الەۋمەتتىك ورتا قالىپتاستىرۋ ارقىلى كەز كەلگەن جەمقورلىق قۇبىلىستارىنىڭ الدىن الۋ بولىپ تابىلادى. وسى ماقساتتى جۇزەگە اسىرۋدا ءتيىمدى شەشىمدەردى قابىلداۋ ءۇشىن الەۋمەتتىك زەرتتەۋلەر جانە الەۋمەتتىك ينجينيرينگ قىزمەتتەرىن ورىنداۋ ورتالىعى رەكتوردىڭ تۇراقتى ساۋالناما بلوگى ارقىلى ستۋدەنتتەر، وقىتۋشىلار جانە جالپى ارىپتەستەر اراسىندا ءوزارا كەرى بايلانىس ورناتادى. كەرى بايلانىس:

·  وقىتۋشى ستۋدەنت كوزىمەن

·  وقىتۋشى ارىپتەستەر كوزىمەن

·  تازا سەسسيا

·  ستۋدەنتتەردىڭ ءال –اۋقاتى

·  ءبىلىم بەرۋ جۇيەسىنىڭ ساپاسى سىندى تاقىرىپتارداعى ساۋالنامالار ارقىلى جۇرگىزىلەدى.

اتالعان جوبا نەگىزىندە ۋنيۆەرسيتەتتە ناتيجەگە باعىتتالعان باسقارۋ جۇيەسى جولعا قويىلعان. ناتيجەگە باعىتتالعان باسقارۋ دەگەنىمىز - الەمدىك باسەكەگە قابىلەتتىلىك كورسەتكىشىن ارتتىرۋدى كوزدەيتىن ناقتى ينديكاتيۆتىك جوسپارلاۋ جانە جەتىستىكتەردى قاداعالاۋ ۇدەرىسى. وسى جۇيە نەگىزىندە ءبىلىم ورداسى وقىتۋشىلار مەن قىزمەتكەرلەر جۇمىسىن رەيتينگتىك باعالاۋعا كوشتى. 

وسىلايشا، ءوز كەزەگىندە قازۇۋ-نەن باستاۋ العان بۇل باعىتتاردىڭ ىرگەتاسى ەلىمىزدەگى وزگە دە ۋنيۆەرسيتەتتەر اراسىندا تابىستى تاجىريبەسىگە اينالىپ، ۋنيۆەرسيتەتىمىز ۇستاناتىن تۇراقتى سالاۋاتتى جانە شىعارماشىلىق الەۋمەتتىك ورتانى قالىپتاستىرۋعا باعىتتالعان جۇيە الەمدىك دەڭگەيدەگى سۇرانىسقا يە بىرەگەي بەت بەينە قالىپتاستىرۋدىڭ باستاۋى بولادى دەگەن سەنىمدەمىز.

---