InfoHub Logo

تايجان بىردە اتباسار جارمەڭكەسىنە بارادى. ەرتكەنى — ەلدىڭ بەتكە ۇستار اقىندارى، تەرمەشى جىگىتتەرى بولسا كەرەك. ءوزى سىرنايمەن بەلبەۋلەتىپ ءان سالىپ، جينالعانداردىڭ نازارىنا ىلىگەدى. وسى جارمەڭكەدە سىرنايدى قۇيقىلجىتا تارتىپ، اتىن بيلەتەتىن جۇڭگو جىگىتى ەلگە ونەر كورسەتىپ جۇرەدى. تايجاندى قىزىقتىرعانى ونىڭ سىرنايىنىڭ جاڭا، ءارى ۇندىلەۋ ەكەندىگى بولادى. تايجان ونىڭ قاسىنا كەلىپ:

— مەن سەنىڭ اتىڭدى بيلەتە السام، نە بەرەر ەدىڭ؟ — دەيدى.

— جوق، بيلەتە المايسىڭ. ول تەك ءوزىم سىرناي تارتقاندا عانا بيلەيدى، — دەيدى جىگىت.

— ەندەشە، ءباس تىگەيىك. ەگەر بيلەتىپ بەرسەم، وندا سىرنايىڭدى ماعان سىيعا تارتاسىڭ، — دەيدى.

— جارايدى، ايتقانىڭ بولسىن.

تايجان ءوزىنىڭ سىرنايىمەن نەبىر اۋەنگە سالادى. ءبىراق ات بيلەي قويمايدى. سوسىن، بولماعان سوڭ جىگىتتىڭ سىرنايىن سۇراپ الىپ، ناعاشىسى ۇكىلى ىبىرايدىڭ «گاككۋىن» تامىلجىتا تارتادى. سول-اق ەكەن، ات بيلەي جونەلەدى. تىگىلگەن ءباس ءوز الدىنا، ەگەر داۋ تۋعىزعىسى كەلسە، تايجاننىڭ العاشقى ساتتە-اق ۇتىلعانىن، ءارى ات بيلەتكەن سىرناي وزىنىكى ەكەنىن تىلگە تيەك ەتەر ەدى عوي. ءبىراق جۇڭگو جىگىتى تايجاننىڭ اسقان ونەرىنە ءدان ريزا بولىپ، جاڭا سىرنايىن سىيعا تارتادى. سىيلىق سىرناي اقىنعا كوپ جىل اينىماس سەرىك بولىپ، شابىتىنا شابىت قوسقان ەكەن.

---