قىزىلوردالىق وقۋشى ماتەماتيكا ىلىمىنە جاڭا فورمۋلا ەنگىزدى
سىربويىلىق ورەن ماتەماتيكا ىلىمىنە جاڭا فورمۋلا ەنگىزدى. ونىڭ عىلىمي جاڭالىعى گاليلەو گاليلەيدىڭ XVII عاسىردا ەنگىزگەن سيكلويدا فورمۋلاسىنىڭ جەتىلگەن مودەلى دەۋگە بولادى، دەپ جازادى 24.kz.
نازاربايەۆ زياتكەرلىك مەكتەبىندە وقيتىن ءابىلپاسىم ءلاتىشتىڭ بۇل ەڭبەگى حالىقارالىق ينتەللەكتۋالدىق بايقاۋدا ۇزدىك دەپ تانىلدى. الەمنىڭ تۇپكىر-تۇپكىرىنەن جينالعان 400-گە جۋىق ماتەماتيكتىڭ اراسىنان دارا شىققان قىزىلوردالىق وقۋشىنىڭ جەتىستىگى عالىمداردىڭ دا تاڭدانىسىن تۋعىزىپ وتىر. مۇنداي كۇردەلى تەڭدەۋلەر ارقىلى الىنعان كەسكىندەر ساۋلەت، روبوتوتەحنيكا جانە ساندىق تەحنولوگيا سالالارىندا كەڭىنەن قولدانىلادى. سونداي-اق، قۇرىلىس نىساندارىن جوبالاۋ، مودەلدەۋ جۇمىستارى ءۇشىن دە ماڭىزى زور.
«ءوز جۇمىسىمدى فيزيكا مەن استرونوميا سالاسىندا جالعاستىرىپ جاتىرمىن. پلانەتا مەن ولاردىڭ سەرىكتەرىنىڭ قوزعالىسى تەڭدەۋ بولىپ تابىلادى. ءوزىمىزدىڭ قىزىلوردا وڭىرىنەن شىققان اسقار جۇمادىلدايەۆ سەكىلدى اكادەميك، قازاقستانعا ەڭبەگى سىڭگەن ماتەماتيك نەمەسە فيزيكا سالاسىندا ءوز ەڭبەكتەرىن جارىققا شىعاراتىن ادام بولعىم كەلەدى، - دەيدى جاس ماتەماتيك ءابىلپاسىم ءلاتىش.
You Might Also Like
