InfoHub Logo

ءبىر كۇنى قوجا تەمىردىڭ سارايىنا كەلەدى. پاتشا قوجانى جامان اتقا مىنگىزىپ الىپ، اڭعا ەرتە جۇرەدى. بۇلار اڭدا جۇرگەن دە، قاتتى جاۋىن جاۋىپ، تەمىر مەن نوكەرلەرى اتتارىن بوربايلاپ، ءۇي قايداسىڭ دەپ تارتىپ تۇرادى دا، قوجا ولارعا ىلەسە الماي، جاۋىننىڭ استىندا جالعىز قالا بەرەدى. باسقا ىستەر امالى بولماعان قوجا، تىرداي جالاڭاش شەشىنىپ، بار كيىمىن استىنا باسىپ الادى. جاۋىن باسىلعان سوڭ كيىمىن قايتادان كيىپ، ءۇستى-باسى قۇپ-قۇرعاق بولىپ ۇيگە كەلەدى. مۇنى كورگەن پاتشا، اڭ-تاڭ بولىپ قوجادان ءمانىسىن سۇرايدى.

سوندا قوجا:

— استىندا سايگۇلىك اتى بار ادام، جاۋىننىڭ استىندا قالا ما ەكەن؟ جاۋىن سەبەلەي باستاعاندا-اق، تاقىمىمدى ءبىر قىسىپ قالىپ ەدىم، قۇستاي ۇشىپ، جاۋىن-جاۋىننىڭ اراسىمەن كوزدى اشىپ-جۇمعانشا ۇيگە الىپ كەلدى، — دەيدى.

پاتشا ءامىر ەتىپ، قوجا ءمىنىپ كەلگەن اتتى ءوزىنىڭ ات قوراسىنا قويدىرادى.

بىردە تاعى دا اڭعا شىعادى. بۇل جولى پاتشا الگى اتقا ءوزى مىنەدى. تاعى دا نوسەر جاۋىپ، اڭشىلار ۇيگە بەت العاندا، قوجا مەن نوكەرلەر وزىپ كەتەدى دە، پاتشا شابان اتپەن ۇيگە جەتكەنشە مالمانداي بولادى. پاتشا ەرتەڭىندە قوجانى شاقىرىپ الىپ:

— وتىرىك ايتقانداي نە كۇن تۋدى باسىڭا؟ ساعان سەنەم دەپ سۋعا مالشىندىم، — دەپ جازعىرسا كەرەك.

سوندا قوجا:

— «حاندا قىرىق كىسىنىڭ اقىلى بولادى» دەگەن قايدا؟ مەن قۇساپ كيىمىڭدى شەشىپ، استىڭا باسىپ الىپ، جاۋىن باسىلعان سوڭ كيسەڭ، ءۇستى-باسىڭ سۋ بولماي، قۇپ-قۇرعاق كەلەر ەدىڭ، — دەپتى.

---