قوجاناسىر مەن مىرزا
قوجاناسىر جارلى بولعان ادام ەكەن. ءبىر كۇنى جاياۋ كىرە تاسىپ، كاسىپ قىلىپ، تاماق اسىراماق بولدى. بازارعا كەلىپ، جاياۋ كىرەشىلەردىڭ جانىندا تۇرسا، ءبىر مىرزا كەلىپ، دۇكەننەن جاڭا ساتىپ الىنعان ءبىر ساندىق كەسە، شىنىاياق، تاس-تاباق سياقتى اس ىشەتىن ىدىستاردى ۇيىنە جەتكىزىپ بەرۋدى سۇرايدى.
— ۇيىڭىزگە الىپ بارۋ اقىسىنا نە بەرەسىز؟ — دەيدى قوجاناسىر.
— الىپ بارۋ اقىڭا مەن ساعان ءۇش اۋىز بەك ماعىنالى، قاسيەتتى ءسوز ۇيرەتەمىن، — دەيدى مىرزا.
«اقشا باسقالاردان دا تابىلادى عوي! مۇنىڭ بەك قاسيەتتى، زور ماعىنالى ءسوزىن ەسىتىپ قالايىن» دەگەن ويمەن قوجاناسىر:
— جارايدى، — دەيدى.
قوجا اۋىر ساندىقتى كوتەرىپ، يەسىنە ەرىپ كەلە جاتىپ ءبىراز جەر جۇرگەن سوڭ: «كانە، مىرزا، قاسيەتتى، ماعىنالى ءسوزىڭىزدى ايتساڭىز ەكەن»، — دەيدى قوجاناسىر. جالداۋشى ايتادى:
— ءبىرىنشى ءسوز مىناۋ: ەگەردە بىرەۋ اشتىق توقتىقتان جاقسى دەسە، ەشۋاقىتتا نانباعايسىڭ!
— جاقسى، بۇل بەك ماعىنالى ءسوز ەكەن، — دەيدى قوجاناسىر.
تاعى ءبىراز جۇرگەن سوڭ:
— ەندى ەكىنشى ءسوز مىناۋ: اتتان جاياۋ ءجۇرۋ جانعا تىنىش دەسە، ەشۋاقىتتا نانباعايسىڭ، — دەيدى مىرزا.
— بۇ دا زور ماعىنالى ءسوز ەكەن، — دەيدى قوجاناسىر.
ءۇيدىڭ جانىنا كەلىپ تۇرىپ قاقپاعا كىرەردىڭ الدىندا:
— مىرزا، ەندى ءۇشىنشى ءسوزىڭدى ايتساڭ ەكەن، — دەيدى قوجاناسىر.
— ءۇشىنشى ءسوزىم: ەگەردە جاياۋ كىرەشىنىڭ سەنەن اقىلسىزدىراعى بار دەۋشى بولسا، وعان دا نانباعايسىڭ! — دەيدى مىرزا.
سوندا قوجاناسىر توبەسىندەگى ساندىقتى جەرگە تاستاپ جىبەرىپ:
— ەگەردە بىرەۋ بۇ ساندىقتىڭ ىشىندە سىنباي قالعان نارسە بار دەسە، سەن دە ەشۋاقىتتا نانباعايسىڭ! — دەپ قايتىپ جۇرە بەرگەن ەكەن.
You Might Also Like
-
ءبىر كۇنى قوجاناسىردىڭ ەگىسىنە كورشىسىنىڭ وگىزى ءتۇسىپ، اياعىمەن تاپتاپ، جەپ ءجۇر ەكەن. كوزى شالىپ قالعان قوجاناسىر وگىزدى ۇستاپ الىپ، ۇيىنە جەتەكتەپ اكەلەدى دە، «ەگىندى جەپ، تاپتاپ تاستاۋدىڭ جاز...
