قولتىراۋىن مەن ءپىل ۇيلەنسە... نەمەسە ۇيلەنگەن سوڭ ۇيلەسۋ كەرەك
باياعى وتكەن زاماندا قولتىراۋىن مەن ءپىل بىر-بىرىنە عاشىق بولىپتى دەيدى. سوسىن ولار دۇنيەنى ءدۇر سىلكىندىرەتىن توي جاساپ شاڭىراق كوتەرەدى. ءوزارا ماحابباتتارىنىڭ كۇشتىلىگى سونداي — بىر-بىرىنە وزدەرى ءۇشىن ەڭ قۇندى دۇنيەلەرىن بەرۋدەن جارىسقا ءتۇسىپتى. قولتىراۋىن سۋعا سۇڭگىپ كەتەدى دە، ەڭ كەرەمەت بالىقتاردى ۇستاپ، پىلگە اكەلىپ بەرەدى. ال ءپىل بولسا، كوك مايسانىڭ ەڭ جۇمساق جەرلەرىن تاڭداپ تاۋىپ عاشىعىنا اپاراتىن كورىنەدى. ءبىراق ناتيجەدە ەكەۋىنىڭ دە كوڭىلدەرى مۇڭدى. ەت جەيتىن قولتىراۋىنعا ءپىلدىڭ سىيى، كوك جەيتىن پىلگە ونىڭ سىيلىعى ۇنامايدى. ءسويتىپ ەكەۋىنىڭ دە نيەتى ادال، پەيىلى تازا بولعانىمەن، تابيعات زاڭى تۇرعىسىنان قاتە تىرلىك جاساپ جۇرگەن ەكەن. وسىنى تۇسىنگەن ەكەۋى بۇدان بىلاي وزدەرىنە ەمەس، جارلارىنا ۇنايتىن نارسەنى سىيلاۋعا تىرىساتىن بولىپتى. ەكى عاشىق ماقسات-مۇراتتارىنا وسىلايشا بىرگە جەتىپتى.
بۇل اڭگىمە بۇگىنگى وتباسىلاردىڭ كەيبىر سىرلارىن تۇسىنۋگە كومەك بەرەدى. ادام اراسىنداعى ەرلى-زايىپتى ءپىل مەن قولتىراۋىن سياقتى سىرتقى كورىنىستەرى بولەك جاراتىلىس بولماسا دا، ولاردىڭ تابيعاتتارىندا بىر-بىرىنەن كوپتەگەن ەرەكشەلىكتەر بار. ەركەك — كۇشتى، ايەل — نازىك. ايەل — سەزىمتال، ەر ادام — سالقىن قاندى. ايەلدىڭ ءسوزى جىلدام، ەركەكتىڭ قولى جىلدام دەگەندەي. ودان بولەك ەكەۋىنىڭ ەكى ءتۇرلى ورتادا ءوسىپ، جەتىلۋىنىڭ ءوزى ارادا ءبىرتالاي ايىرماشىلىقتىڭ بولۋىن زاڭدى ەتەدى. ولاي بولسا، ولاردىڭ بىر-بىرىنە: «نەگە سەن ءدال مەندەي ەمەسسىڭ» دەپ وكپەلەۋگە قۇقىقتارى جوق. سوندىقتان اتام قازاق «ءۇي بولۋ-وڭاي، ۇيلەسۋ-قيىن» دەپ بەكەر ايتپاعان.
قىسقاسىن ايتقاندا، وتباسىن قۇرعان ەكى جارتى ءبىر ءبۇتىن بولۋى ءۇشىن بىر-بىرىمەن سول تابيعي قالپىندا ۇيلەسىپ كەتۋى كەرەك. ەكەۋى ءبىر-بىرىنىڭ تابيعاتىن، مىنەز-قۇلقىن، تەمپەرامەنتىن، جاقسى كورىپ ۇناتاتىن ىستەرىن زەرتتەپ ۇيرەنىپ العاندارى دۇرىس. ءبىراق بۇعان مىندەتتى تۇردە ەكى جاق تا اتسالىسۋى ءتيىس. سوندا وتباسى ماقسات-مۇراتىنا جەتەدى. بارشاڭىزعا وتباسىلىق باقىت تىلەيمىز.
ە. ەرتاي ۇلى («جۇبايىڭنىڭ جۇرەگىن جارالاما — جاۋلا» كىتابىنان)
You Might Also Like
-
ادام تويىمسىز، اشكوز كەلەتىندىكتەن بە، جەمقورلىق، پاراقورلىق ىندەتى كوپ ەلدەردىڭ جازىلماس جاراسى بولىپ تابىلادى. تەك ءوزىنىڭ پايداسىن، تەك ءوزىنىڭ قالتاسىن ويلاۋ، ەل پايداسى مەن زيانىنان بۇرىن ءوز پاي...
-
«وقۋسىز حالىق قانشا باي بولسا دا، ءبىراز جىلداردان كەيىن ولاردىڭ بايلىعى ءبىلىمدى حالىقتاردىڭ قولىنا كوشەدى».
