InfoHub Logo

الماتى مەلەكەتتىك قۋىرشاق تەاترى اعىمداعى جىلدىڭ اقپان ايىنىڭ 15ء-ى كۇنى قازاقستاندىق بوكسشى، سيدنەي وليمپياداسىنىڭ جەڭىمپازى بەكزات ساتتارحانوۆتىڭ باتىل رۋحىنا ارنالعان «چەمپيون» قويىلىمىنىڭ پرەمەراسىن تەاتر سۇيەر قاۋىمنىڭ نازارىنا ۇسىنادى. ارمانعا دەگەن ادالدىق، ماقساتقا جەتۋ جولىنداعى قاجىرلى ەڭبەك، ەلى مەن جەرىنە دەگەن سۇيىسپەنشىلىكتى ناسيحاتتايتىن قويىلىم جاس جەتكىنشەكتەردى قايسارلىققا، وجەتتىلىككە، باتىلدىققا، شىدامدىلىققا تاربيەلەيدى.

قۋىرشاق تەاترى ساحناسىندا تۇڭعىش رەت ۇسىنىلاتىن قويىلىمنىڭ ەرەكشەلىگى – بولمىسى بولەك بوكس شەبەرى، ۇلت ماقتانىشى، نەبارى 20 جىلدىق عۇمىرىندا 143 جەكپە-جەك وتكىزگەن ءبىرتۋار بوكسشىنىڭ اسقاق رۋحىن قۋىرشاق وبرازىندا كورسەتۋ.

كينەماتوگرافيا ەلەمەنتتەرىن ۇتىمدى پايدالانا وتىرىپ، ءار داۋىردەگى قازاق حالقىنىڭ جەڭىسى مەن جەڭىلىسىن ءتۇرلى سيمۆوليكالىق وبرازدار ارقىلى تاريحي فاكتىلەرمەن بايلانىستىرا قابىستىرىلعان قويىلىم بەكزات ساتتارحانوۆتىڭ كۇرەسى ارقىلى كۇللى ۇلت تاريحىن باياندايدى.

جاسوسپىرىمدەر اۋديتورياسىنا ارنالىپ دايىندالعان دراما جانرىنداعى قويىلىمنىڭ رەجيسسەرى – قازاقستاننىڭ ەڭبەك سىڭىرگەن قايراتكەرى، تەاتر ارداگەرى ءورازالى اقجارقىن-سارسەنبەك، اۆتورى – حالىقارالىق «الاش» ادەبي سىيلىعىنىڭ جۇلدەگەرى، دراماتۋرگ الىبەك بايبول، سۋرەتشىسى – يۋليا چەرنوۆا، انۋار بۇركىتبايەۆ، مۋزىكامەن كوركەمدەۋشى – باقبەرگەن بايشىعاش، حورەوگرافى – اننا سوي.

ەشقاشان ۇمىتىلمايتىن باتىر بەينە بەكزات ساتتارحانوۆتىڭ ءومىرى مەن سپورتتاعى جارقىن جولىنا ارنالعان قويىلىم بارشا قازاق ەلىنە ۇلتتىق رۋح، بيىك پاتريوتتىق سەزىم، جالىندى جىگەر سىيلاپ قانا قويماي، الماتى مەملەكەتتىك قۋىرشاق تەاترى رەپەرتۋارىندا ويىپ ورىن الاتىن تاعىلىمدى دا ماعىناسى تەرەڭ تۋىندى بولماق.

سونداي-اق، كىشكەنتاي بۇلدىرشىندەردى ادامي اسىل قاسيەتتەرگە تاربيەلەپ، ىزگىلىككە ۇندەيتىن تەاتر ۇجىمى اقپان ايىندا الەمگە ايگىلى «ەتىك كيگەن مىسىق» ەرتەگىسىنىڭ دە پرەمەراسىن ۇسىنباق.

تەاتردا جۇزدەسەيىك!