InfoHub Logo

قورقىت جيىرما جاسقا تولعاندا اق ساقالى بەلىنە تۇسكەن، اق تاياعى كوك تىرەگەن اۋليە كەلىپ، تاعى دا تۇسىندە ايان بەرەدى: «ۋا، قورقىت، بۇل جارىق دۇنيەدە ساعان قىرىق جىل عۇمىر ماڭدايىڭا جازىلعان، ودان ارتىق جۇرمەيسىڭ!» دەيدى. ويانا كەلسە ءتۇسى ەكەن، اۋليەنىڭ ايتقان ءسوزى وڭىندەگىدەي قۇلاعىندا قالىپ قويادى.

وسىدان كەيىن-اق قورقىت قاتتى تىكسىنىپ، ولمەۋدىڭ امالىن ىزدەپ، جەلماياسىنا ءمىنىپ، دۇنيەنى كەزىپ كەتەدى.

كۇندەردىڭ ءبىر كۇنىندە قورقىت دالا كەزىپ كەلە جاتسا ءۇپىر-شۇپىر بولىپ جەر قازىپ جاتقان ءبىر توپ ادامعا ۇشىراسادى. «اۋ، بۇل قازىپ جاتقاندارىڭ نە؟» — دەپ ءجون سۇراسا، الگىلەر: «قورقىت اۋليەنىڭ كورىن قازىپ جاتىرمىز!» دەپ جاۋاپ بەرەدى. مۇنى ەستىگەن قورقىت جەلماياسىن بۇرىپ، كەلەسى ءبىر قيىرعا بەت تۇزەيدى. ءبىراق شارشاپ-شالدىعىپ، ەندى بۇيدا تارتىپ تىنىعام دەگەندە الدىنان تاعى دا كور قازۋشىلار ۇشىراسادى. ءجون سۇراسا كەلسە، ولار دا قورقىتتىڭ ءقابىرىن قازۋشىلار بولىپ شىعادى. وسىلايشا، قورقىت ولىمنەن قاشىپ، دۇنيەنىڭ ءتورت بۇرىشىن شارلاعانىمەن، الدىنان وزىنە ارناپ كور قازۋشىلار كەزدەسە بەرەدى. «قايدا بارساڭ — قورقىتتىڭ كورى!» دەگەن ەسكى ءسوز وسىدان قالىپتى دەيدى.

سودان ابدەن تارىعىپ، تيتىقتاعان قورقىت جەر ورتاسىنا جەتسەم، جانىم قالار دەپ، ءوزىنىڭ تۋعان جەرى سىردىڭ جاعاسىنا جەتەدى. سول جەردە جەلماياسىن سويىپ، ونىڭ تەرىسىمەن قاڭسىعان قارا قوبىزىن قاپتايدى. سونان سوڭ سۋدىڭ بەتىنەن كور قازىلماس دەپ، جەلمايانىڭ جابۋىن سىردىڭ سۋىنا جايادى دا، سونىڭ ۇستىنە جايعاسادى. سول جەردە وسىنداي حالىنە قامىعا وتىرىپ، قارا قوبىزىن مۇڭدى سارىنعا سالعان ەكەن. وسى سارىننىڭ ءبىر قايىرىمى ۇرپاقتاردىڭ ەسىندە ساقتالعان عوي.

قورقىت سىر سۋىنىڭ ۇستىندە ءجۇز جىل بويى ءومىر ءسۇرىپتى دەيدى. بۇل ۋاقىت ىشىندە قوبىزىن توقتاۋسىز سارناتىپ، اجالدى ماڭايىنا جولاتپاپتى دەيدى. قورقىت قوبىز تارتقاندا جەل تىنىپ، سۋ اعىسىن توقتاتىپ، جان-جانۋار ۇيىپ تىڭدايتىن بولسا كەرەك.

---