شاكىرتىمنىڭ ەرتەڭگى جەتىستىگى – مەنىڭ بۇگىنگى ءتالىمىمنىڭ ناتيجەسى!
شاكىرتىمنىڭ ەرتەڭگى جەتىستىگى – مەنىڭ بۇگىنگى ءتالىمىمنىڭ ناتيجەسى!
(نۇر-سۇلتان قالاسى №69 مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ ءمۇعالىمى جاقسىلىق جۇلدىزاي جۇمابەرگەن قىزى)
"ءبىلىم – پاراساتتى، ول – ءبىر اعىن،
شاكىرتكە توگەدى ىلعي جان شۋاعىن.
ۇستاز دەپ قوعام ءار كەز تانيتۇعىن،
قاستەرلى، قاسيەتتى – ول ءمۇعالىم"
ءيا، ارينە،ۇستاز ۇرپاق تاربيەلەپ ءوسىرۋشى، قوعام سەنگەن ادام. ۇستاز بولۋ ءارى باقىت، ءارى ابىروي. وسى قاستەرلى ماماندىقتىڭ ءقادىرىن ءبىلىپ، شاكىرتتەرىنىڭ جۇرەگىنە اسىل قاسيەتتەرىن ۇيالاتىپ، ءون بويىنا ۇستازعا ءتان سالماقتىلىق پەن مادەنيەتتىلىكتى سىيعىزا بىلگەن جانداردى حالقىمىز ءارقاشاندا ەرەكشە قۇرمەت تۇتقان.
جاھاندانۋ زامانىندا وركەنيەت كوشىنەن قالماۋ ءۇشىن ءبىلىمدى، سانالى ۇرپاق تاربيەلەۋ ماڭىزدى. ۇستاز تالىمىنەن ءنار الىپ سۋسىنداعان شاكىرتتىڭ جەتىستىككە قول جەتكىزۋى – ءبىزدىڭ قوعام ءۇشىن ەڭ باستى رۋحاني قۇندىلىققا اپاراى ءسوزسىز. بىلىممەن قارۋلانعان تۇلعا قوعامدى دامىتۋعا ءوز ۇلەسىن قوساتىنى بەلگىلى. قازىرگى زامان تالابىنا ساي ءار بالانىڭ قابىلەتىنە قاراي دارىندىلىعىن دامىتۋ، ءبىلىم بايگەسىندە، ءدۇبىرلى جارىستاردا جۇزدەن جۇيرىك، مىڭنان تۇلپار شاكىرت شىعارۋ – ۇستازداردىڭ ەرەن ەڭبەگىنىڭ جەمىسى.
جوعارى وقۋ ورنىن اكادەميك م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن "قازاق ءتىلى مەن ادەبيەتى" ءپانى ءمۇعالىمى بويىنشا تامامداپ شىقتىم. سولتۇستىكتىڭ قيىرىندا ورنالاسقان قىزىلجار قالاسى، ءسابيت پەن عابيتتاي تۇلعالار تۋعان ءوڭىر، پوەزيانىڭ پايعامبارىنا اينالعان ماعجانداي ۇلدى وسىرگەن جەر ماعان دا ۇستازدىق جولدىڭ ەسىگىن ايقارا اشتى. الدا مەنى ۇلكەن جۇمىستار مەن ارناۋلى مىندەتتەر كۇتىپ تۇردى. شاكىرتتەرىمنىڭ ەرتەڭگى جەتىستىگى مەنى قۋانتىپ، ەڭبەك جولىمدا بيىكتەردەن كورىنۋ ءۇشىن ءار ساباعىمدا ساپالى ءبىلىم بەرىپ، سانالى شاكىرت شىعارۋىم ءتيىس. ارينە، ءمۇعالىم ءۇشىن ەڭ عاجاپ نارسە ءوزى ءبىلىم بەرگەن شاكىرتتەرىنىڭ جەتىستىگىن كورىپ توبەسى كوككە جەتسە كەرەمەت ەمەس پە؟!
ءبىلىمىمدى شىڭداپ، ارمانىمدى الدىعا ءۇمىت ەتىپ وقۋشىلارىما قازاق ءتىلىنىڭ قۇدىرەتتىلىگىن، ادەبيەتىمىزدىڭ قىمباتتىلىعىن بويىنا دارىتۋ نەگىزگى ماقساتقا اينالدى.ابايدىڭ اسىل سوزدەرىن، ماعجاننىڭ جالىندى ۇراندارىن، ءمۇقاعاليدىڭ التىنداي اسىل ولەڭدەرىن شاكىرتتەرىمنىڭ جۇرەكتەرىنە ۇيالاتىپ، بولاشاقتا ەلىمىزدىڭ ەلەۋلى، حالقىمىزدىڭ قالاۋلى ۇرپاقتارىنا اينالدىرۋ ماعان ارتىلعان مىندەت دەپ بىلەمىن. قازاق ءتىلىنىڭ قاستەرلىلىگى سونشا ونىڭ تىم شىڭ بيىكتە تۇرعانىن وقۋشىعا جەتكىزىپ، شاكىرتتەرىم ارقىلى ءۇمىتىمنىڭ اقتالعانىن دالەلدەۋ. بولاشاق ەلىن سۇيەر، جەرىن سۇيەر، انا ءتىلىن قاستەرلەيتىن، ۇلى تۇلعالارىمىزدى قادىرلەيتىن ءتىل جاناشىرلارى مەنەن ءتالىم الىپ شىققان شاكىرتتەر بولاتىنىنا سەنەمىن جانە وسى ماقساتقا جەتۋ ءۇشىن شاكىرتتەرىمدى ساپالى ءبىلىم نارىمەن سۋسىنداتامىن.
«ىسىڭىزگە، ەڭبەگىڭىزگە، وقۋىڭىزعا ناعىز ادامگەرشىلىكپەن كىرىسسەڭىز، ءسوز جوق، جەڭىسكە جەتەسىز» دەيدى عوي عالىم قانىش ساتبايەۆ. ويتكەنى ەڭ الدىمەن ءوز پانىڭە دەگەن زور سۇيىسپەنشىلىك بولعانى ابزال. وسىناۋ سۇيىسپەنشىلىك وقۋشى بويىنداعى بىلىمگە، پانگە دەگەن العاشقى قۇشتارلىعىن وياتادى. ال وسى شاكىرت بويىندا ويانعان ءبىلىم قۇشتارلىعى ەندى تۇتانعان شىراق سەكىلدى. ەڭ قيىنى – وسىناۋ شىراقتى ءسوندىرىپ الماۋ. ول ءۇشىن تالماي ەڭبەكتەنۋ مەن ىزدەنۋ قاجەت. سوندا عانا ول ءبىلىم شىراعى لاۋلاعان جالىنعا اينالادى.
بەينەتى قاتتى، زەينەتى ءتاتتى ماماندىقتى تاڭداپ ەڭسەلى ءبىلىم ورداسىندا قىزمەت كورسەتۋ - مەنىڭ بورىشىم! كۇن سايىن مەكتەپ قابىرعاسىنا كىرگەن ساتتەن الدىمنان «جۇلدىزاي جۇمابەرگەن قىزى» دەپ جۇگىرىپ شىعاتىن بالاپاندارىم مەنى ەشقاشان بۇل جولدا جالىقتىرمايدى. اللادان بەرىلگەن ءۇش ماماندىقتىڭ ءبىرى - ۇستازدىق جول! ال، ەندەشە، بىزگە ارتىلار ءۇمىت تە، جۇكتەلەر مىندەت تە ءالى الدا! ۇستازدىق جول مەن تاڭداعان جول!
You Might Also Like
-
جازۋشى توماس كورلي بەس جىل بويى ءوز كۇشىمەن داۋلەتكە جەتكەن 177 ميلليونەردىڭ ادەتتەرىن زەرتتەدى. ول ولاردىڭ كۇندەلىكتى ارەكەتتەرى بىر-بىرىنە ۇقسايتىنىن بايقادى جانە ءدال سول ارەكەتتەر ولاردىڭ تا...
-
قورقىتتىڭ جەلماياسى استىندا، قارا قوبىزى قولىندا ۇنەمى ەل ارالاپ، اداسقانعا ءجون سىلتەپ، اڭىرعانعا اقىل بەرىپ، ساۋەگەيلىك قۇرادى ەكەن. توڭىرەگىندەگى كوزى كورىپ، كوڭىلى تۇسكەندى قوبىزىنا كۇي ەتىپ قوسى...
