شارىن شاتقالى
شارىن شاتقالى… الىپ اڭعارلار. قىزعىلت قامالدار. مىستان سايلار. جالماۋىز كەمپىر وزەگى… وسى ءبىر ايرىقشا ورىن تۋرالى ايتىلاتىن اڭىز كوپ. اقيقاتىن ەشكىم ارشىپ الا الماسى تاعى بەلگىلى. ويتكەنى شارىن كانونى مىنا جەر بەتىنە پەندە بالاسىنىڭ تابانى تيمەي تۇرىپ، ميلليون جىلدار بۇرىن پايدا بولعان. ويتكەنى كەر دالانىڭ توسىنەن ادام بالاسى مىڭ جىلداپ كەرتىسە دە، ءدال وسىنداي عاجاپقا تولى الەمدى جاساۋلارى مۇمكىن ەمەس، وعان تەك بولەكشە كۇش، ميلليونداعان جىل ۋاقىت قاجەت. شارىنعا بارىپ، ءوز كوزىمەن كورگەن جان ونىڭ كەرەمەتىن انىق تۇسىنەدى، ەرتەگىلەر ەلىندە، ياكي ءبىر ەرتە زاماندا قيراعان الىپ قاعاناتتىڭ ورنىندا تۇرعانداي كۇي كەشەتىنى راس. نەگە دەيسىز عوي…
جەتى ءيىرىمدى سۋى بار ايگىلى جەتىسۋدىڭ ورتا بولىگىندە مىڭجىلدىقتار جۇمباعىن ىشىنە بۇگىپ داڭقى الىستى شارلاعان شارىن جاتىر. الماتىدان 200 شاقىرىمدىق جەردە، نارىنقول مەن كەگەننىڭ ەتەگىن باسىپ، شىعىسقا بەت تۇزەگەن كەرۋەن جولداردان ءسال قيىس شەتتە ورنالاسقان بۇل وزگەشە ورنەكتى مەكەن تۋرالى ادام بالاسىنىڭ بىلگەنىنە كوپ بولا قويعان جوق. جوق، قاتەلەسىپ تۇرمىز، وزگەلەر بۇل سۇلۋ مەكەندى كورمەگەنىمەن، ءبىزدىڭ بابالارىمىز سان الاپات عاسىرلاردان بەرى وسى تاۋلاردىڭ قويناۋىندا ءومىر ءسۇرىپ، تىلسىمى كوپ مەكەنگە تاڭىرقاۋمەن كەلەدى. اۋەل دەسەڭىز، سوناۋ قولا داۋىرىنەن بۇرىن-اق وسىنداعى قۇزداردىڭ باسىنا، تاستاردىڭ، ۋاقىت ءمۇجىپ بىتىرگەن، توتىقتىرعان قىزعىلت كەرىش توپىراقتاردىڭ بەتىنە – ەجەلگى ادامدار، بالكىم، پروتوتۇركىلەر، باعزى كوشپەندىلەر شىعار، ءتۇرلى-تۇستى سۋرەتتەر سىزعانىن كورەر بولساڭىز، ويىڭىزدىڭ ون ساققا كەتەرى ءسوزسىز. ءباھادۇر بابالارىمىز نە جازدى ەكەن؟ نە سىزدى ەكەن؟ قىزىقساڭىز، سولاي تارتىڭىز!
"تۇران" ۋنيۆەرسيتەتىنىڭ 3 كۋرس ستۋدەنتى ەلريزا باۋىرجان قىزى
You Might Also Like
-
جۋرناليست بولۋ– ماقساتكەر، تالاپشىل ءارى ءبىر ۋاقىتتا تەز ءتىل تابىسقىش، ىقىلاستى، باۋىرمال بولۋ دەگەن ءسوز. قوعامداعى قۇبىلىستاردى زەرتتەپ-زەردەلەۋ جولىندا ءوزىڭنىڭ كۇشىڭ مەن ۋاقىتىڭدى ايامايتىن د...
-
ءبىز ءبىر تۇتاس قازاق ەلى بولعاندىقتان ءتىلىمىز، ءدىنىمىز ورتاق حالىقپىز. تاعى ءبىزدى ورتاقتاستىرىپ تۇرعان رامىزدەرىمىز، ءتۇر كەلبەتىمىز، ءسالت-داستۇرىمىز جانە تاريحىمىز. بۇل ماسەلەنىڭ ءبىر جاعى. ال بىزدە ...
