InfoHub Logo

ساتتار مەن توقتار - اسكەردە بىرگە بولعان جىگىتتەر. ساتتار ۇيلەندى. ۇيلەنگەنىنە دە اسا كوپ ۋاقىت بولا قويماعان ەدى، ءبىر كۇنى ساتتاردىڭ ۇيىنە جانىندا ءابۋ دەگەن جولداسى بار توقتاردىڭ كىرىپ كەلگەنى. اسكەردە بىرگە بولعان ەكى جىگىت لەزدە قۇشاقتارى ايقاسىپ، ءبىرىن-بىرى ارقادان قاعىستى دا قالدى. توقتار جانىنداعى ءابۋدى ساتتارعا تانىستىردى. ساتتار ونىمەن دە ەمەن-جارقىن امانداسىپ، تانىسىپ قويدى. ەندى ساتتار ءوزىنىڭ كەلىنشەگىنە توقتاردىڭ كىم ەكەندىگىن، ءوزىنىڭ ومىرىندە قانداي ورنى بار ەكەندىگىن ايتىپ جاتتى. قوناق جىگىتتەردىڭ كەلۋىمەن بىرگە ءۇيدىڭ ىشىنە
ءبىر كوڭىلدى دابىر ورنادى.

ساتتاردىڭ كەلىنشەگى پىسىق-اق جان ەدى. كۇيەۋىنىڭ جولداستارى كەلىپ قالعاسىن، ءبىر بولمەگە جىلدامداتىپ داستارقانىن دايىنداي قويدى، اس تا ازىرلەنىپ كەلدى، داستارقاننىڭ شەتىنەن ساماۋرىن دا ورىن الدى. سول-اق ەكەن، اڭگىمە قىزىپ سالا بەرسىن. اڭگىمە اۋەلى ەكى ادامنىڭ اراسىندا - اسكەردە بىرگە بولعان ساتتار مەن توقتاردىڭ اراسىندا باستالدى دا، سالدەن كەيىن ولاردىڭ اڭگىمەسىنە ساتتاردىڭ كەلىنشەگى دە ەمەن-جارقىن پەيىلمەن ارالاسىپ كەتتى. ال ءابۋ كوبىنە تىڭداۋشى بولىپ، جىگىتتەردىڭ اڭگىمەسىنە وقتا-تەكتە ءبىر اتسالىسىپ وتىردى. وسىلاي باستالىپ كەتكەن اڭگىمە وتقا تامىزىق تاستاعانداي لاۋلاي تۇسپەسە، ءبىر باسەڭدەگەن جوق. ءبىرازدان سوڭ شاي دا ءوز مارەسىنە جەتە باستادى. اڭگىمەنىڭ تىزگىنى وسى كەزدە بارىپ قانا ءسال-پال تارتىلا باستاعان ەدى. ەندى ساتتاردىڭ كەلىنشەگى ءۇي يەسىنە ءتان قوناقجايلىلىق پەيىلمەن:

- جىگىتتەر، شاي الساڭدارشى. قانە، تاعى دا شاي ىشىڭدەر. توقتار، كەسەڭدى بەر، شاي قۇيايىن، - دەدى.

بۇل كەزدە توقتار كەسەسىن توڭكەرگەن ەدى.

- وي، جوق، ءبىراز ءىشتىم شايدى. اڭگىمەمەن وتىرىپ شايدى دا ءبىراز الدىرىپ تاستاپپىز عوي، - دەدى اشىق-جارقىن مىنەزدى توقتار.

ساتتاردىڭ كەلىنشەگى ەندى ابۋگە بۇرىلدى:

- ءابۋ، قانە، اكەل كەسەڭدى، شاي قۇيايىن.

ءبىراق ءابۋدىڭ الدىندا كەسە جوق ەدى. سويتسە، ابۋگە مۇلدە شاي دا قۇيىلماعان ەكەن. مۇنى كورىپ داستارقان باسىنداعىلار "اۋ، اڭگىمەمەن وتىرىپ ابۋگە مۇلدە شاي دا قۇيماپپىز عوي" دەپ دۋىلداسىپ كۇلىپ جىبەردى.

- قاپ، - دەيدى توقتار. - جولداسىمنىڭ كەسەسى جوعىن مەنىڭ دە بايقاماعانىم-اي. ءوزىڭ نەگە ايتپادىڭ شاي قۇي دەپ.

سويتسە، ءابۋ:

- وي، جوق، ءوزىم شاي ىشپەيتىن ەدىم، - دەگەنى.

بۇل سوزگە ءۇي ىشىندەگىلەر تاعى دا دۋىلداسىپ كۇلدى.

"اڭگىمە بۇزاۋ ەمىزەر، بۇزاۋ تاياق جەگىزەر". بۇل جەردە تاياق جەي قويعان ەشكىم جوق، ارينە. سوندا دا ۇيگە باس سۇققان ەكى قوناق جىگىتتىڭ ءبىرىنىڭ سونشاما ءبىر ساماۋرىن شايدان ءبىر كەسە دە شاي ىشپەگەن كۇيى اتتانىپ كەتكەنى قىزىق بولدى.

---