«شوڭ» سەرىكتىگى تۋرالى كوپكە ىستەگەن باياندامانىڭ باسى:

مىناۋ جول، شوڭ بالاسى، ادامدىققا!
سىزدەردى باستامايدى جاماندىققا.
كەل، كىرىس، كوتەرۋگە مۇنى تىرىس،
پايدا جوق، قۇرىپ قالعىر ناداندىقتا!

كەل، كىرىس، كوتەرۋگە مۇنى تىرىس،
جۇرت ۇلگى الاتىنداي بولسىن ءبىر ءىس!
ءارى ارۋاق، ءارى قۇداي ىرزا ەمەس،
ءوزىڭدى ءوزىڭ جارساڭ، تاۋىپ كىر ءىس...


بۇل باياندامانىڭ ارتى مىناداي سوزبەن تىنادى:

جانە دە پايدا بولسىن ۇلتىمىزعا،
ورنەك، ۇلگى بولايىق جۇرتىمىزعا.
جيىلىپ ۇيدەن ۇيگە مال سويعىزىپ،
نە پايدا قۇر تىعۋدان ۇرتىمىزعا؟

كىشى ءىنى، ۇلكەن اعا، وسى ءسوزىم
ابايلاپ، اقىل سالىپ، ويلاشى ءوزىڭ.
تارتسام مەن جارتى تيىن تاماعىما،
ىرزامىن ءولدا-بىلدا جوعالت كوزىم!

قۇدايدان سۇراعانىم بىرلىكتەرىڭ،
بىرلىكسىز تۇزەتىلمەس تىرلىكتەرىڭ.
وللاھي، ونەر ەمەس، انىق ءولىم
كۇجىرەيگەن بىر-بىرىڭە ىرىلىكتەرىڭ.

كەلىسپەس اراڭىزعا سالقىن قاباق،
سالقىن بولساڭ، اركىمگە بولدىڭ تاماق!
جەل بەرگەنگە جەلىككەن جەل بۋازعا،
قانجىعالى بيەكە ۇلكەن ساباق.

مىنە ءبىز ءبىر توبەگە «شوڭ» دەپ شىقتىق،
ادام بولۋ پلاندى قولداپ شىقتىق.
«ە، ءتاڭىرىم، ءىسىمىزدى جوندەي كور!» دەپ،
شىن كوڭىل كوزىمىزدەن جاستى سىقتىق.

قول قويدىڭ وسىنى ايتىپ شوڭنىڭ جاسى،
ورالسىن قايىرىمەن ءىستىڭ باسى؛
ەرىكپەدىك، نەمەسە جەلىكپەدىك:
ويلادىق از دا بولسا، جۇرت پايداسىن.

---