سۇيدىرگەن سەنى ماعان قىلي كوزىڭ،
تومارداي كەدىر-بۇدىر توپاس ءسوزىڭ.
قۇبىجىق قورسىلداعان مىنەزدەرىڭ،
ارمان جوق پيدا بولسام ساعان ءوزىم.
سىمباتتى سۇلۋ تاماشام،
شاشىڭنان جۇلىپ ساباسام!

سۇيدىرگەن سەنى ماعان ەشكى باسىڭ
قول جۋماي وبىرلانىپ جەگەن اسىڭ.
قويا ما سۇيدىرمەسكە ىقتيارعا،
ۇيپالاق يت جۇنىندەي جەلكە شاشىڭ.
سىمباتى سۇلۋ تاماشام،
قۇسقىم كەلەر قاراسام.

سۇيدىرگەن سەنى ماعان شوشاق مۇرنىڭ
كىشى-گىرىم ءبىر ۇيگە وشاق مۇرنىڭ.
جىبەرىپ اندا-ساندا تارتىپ الىپ،
جىلتىلداتىپ تۇراتىن قوس ات مۇرنىڭ.
ويقى-شويقى بەتتەرىڭ،
كومىردەن اپپاق ەتتەرىڭ.

سۇيدىرگەن سەنى ماعان كوكشىل ءتىسىڭ
«ادىرا قالعىر، ويباي» دەپ قىلعان ءىسىڭ.
سالدى بالاق قارعامسىڭ سالپىلداعان،
بىتكەن جوق بۇل الەمگە سەندەي ءپىشىن،

بىلجىراعان ءجۇرىسىڭ،
جوعال ارمەن قۇرىسىن!

سۇيدىرگەن سەنى ماعان سالتاق بەتىڭ،
كارى ساۋلىق ەتىندەي توستەك ەتىڭ.
قاراعىم، سىرتىڭ سۇلۋ جاپالاقتاي
اناۋىڭا كەلگەندە، ويباي، بەتىم.
ساسىپ كەتكەن ماڭايىڭ،
مۇرنىمدى باسىپ جابايىن!

سۇيدىرگەن سەنى ماعان كىرلى موينىڭ،
ارباداي قيراتىلعان دوعال وينىڭ.
ءا، دۇنيە، كىرىل بويىم جىلىتار ما ەدىم
قاڭتاردىڭ ايازىنداي ىستىق قوينىڭ.
ىزعار شىعار قوينىڭنان،
جانجال شىعار وينىڭنان!

سۇيدىرگەن سەنى ماعان دۋدار شاشىڭ،
قىستى كۇنگى قىراۋداي قىربىق قاسىڭ.
كەر تاپال، كەردەڭدەگەن جاس بالاسىڭ،
اسسا دا 25-تەن ۇيدە جاسىڭ.
ارباڭداعان دورەسكەل،
بارلىق ءىسىڭ ورەسكەل!

سۇيدىرگەن سەنى ماعان قولا جۇزىك،
قولىڭا ساۋدىرلاتىپ قويعان ءتىزىپ،
كىسى الدىندا قاسىنىپ تەرىس قاراپ،
ءبيتىڭنىڭ بىتىرلاتىپ موينىن ءۇزىپ.
ناس باسقانداي بيت باسقان،
مىنە، سۇلۋ جۇرت اسقان!

سۇيدىرگەن سەنى ماعان تىرىسقانىڭ
كورىنگەنمەن بۇرقىلداپ ۇرىسقانىڭ.
اكەڭ بۇگىن ولگەندەي قاباق جاۋىپ،
قوناق كەلسە قۋارىپ قۇرىسقانىڭ.
قالقام، جانىم، قاراعىم!
بەتىڭە كەلمەس قاراعىم!

سۇيدىرگەن سەنى ماعان وسەكتەرىڭ،
ءوزىم بىرگە سالىسقان توسەكتەرىڭ.
ينەنى ۇستاي بىلمەس شەبەرلىگىڭ
اپىرماي، مەن بەكەرگە وسەكتەدىم.
مىنە سۇلۋ، اسىلىڭ،
موينىڭداعى ماسىلىڭ!

سۇيدىرگەن سەنى ماعان مايلى قالتاڭ،
اۋزىڭا تەرىس قاراپ سالعان مالتاڭ.
«باس» دەگەنگە «قۇلاق» دەپ جاۋاپ بەرىپ،
اڭىرايىپ الاڭداپ جالتاڭ-جالتاڭ.
ەر جىگىتكە بۇ دا سور،
قوسىلساڭ باسىڭ بولار قور!

سۇيدىرگەن سەنى ماعان تەرىس اياق،
ءبىر-بىرى ساۋساعىڭنىڭ جۋان تاياق.
ءولى سۇيەك، ەلەكسە ولىمتىك قىپ،
قۇدايىم ساعان بەرگەن اياماي-اق!
مۇنداي جاندى، قۇدايىم،
كەز كەلتىرمە ىلايىم!

---