سۇلۋ بولامىن دەپ سورى قايناعاندار!
سۇلۋلىقتى اركىم ءار ءتۇرلى تۇسىنەدى، ءبىراق ول تۋرالى جالپى تۇسىنىك بار. تابيعاتتىڭ سۇلۋلىعىنا شەكسىز ءسۇيسىنىپ تامسانامىز، سودان ەرەكشە ءلاززات الامىز. ال ادامنىڭ سىرتقى سۇلۋلىعى كىمگە دە بولسىن ۇنايدى. اللا جاراتقان جەر بەتىندەگى بارلىق تىرشىلىك يەلەرىنىڭ ەڭ سۇلۋى – ادام كورىنەدى. ءار ادامنىڭ بەت-بەينەسى، كەسكىن-كەلبەتى، مىنەز-قۇلقى ءار ءتۇرلى، بىر-بىرىنە ۇقسامايدى. بارلىق حالىقتا سۇلۋلىق بەلگىلەرى: سۇڭعاق بوي، قىپشا بەل، قىر مۇرىن، قيعاش قاس، ويماقاۋىز، كۇلىم كوز، قولاڭ شاش، ت.ب. بولىپ كەلەدى. «سۇلۋلىق الەمدى اپاتتان ساقتايدى» دەمەكشى، سۇلۋلىقتىڭ ومىردە ماڭىزى اسا زور.
قازىرگى تاڭدا ەلىمىزدە سۇلۋلىق سالوندارىنا بارىپ بەتىن كۇيدىرگەن قىز-كەلىنشەكتەر كوبەيىپ كەلەدى. 200-دەن اسا قىز-كەلىنشەك سۇلۋلىق سالوندارىنان زارداپ شەككەن. ءبىرىنىڭ بەت تەرىسى بۇلىنسە، ەندى ءبىرى ارتىق داقتاردان ارىلامىن دەپ ءجۇرىپ سارى اۋرۋعا شالدىعىپتى. كۇتپەگەن جەردەن اجارىنان ايىرىلىپ، ۇسقىنسىز كۇيگە تۇسكەندەر ەندى وزدەرىن سورلاتقان سالونداردى جاۋاپقا تارتقىزا الماي ءجۇر. كىرپىك-قاستى قيىلتىپ، ءتىپتى ەرىندى دە شيەدەي ەتىپ بەرەمىز دەيتىن مەكەمەلەردە ەل ەستىمەگەن سۇمدىقتار بولعان. سۇلۋلىق سالوندارىنىڭ قىزمەتىن پايدالانباس بۇرىن مىندەتتى تۇردە كەلىسىم-شارت جاساۋ قاجەت. سوندا عانا ءسىز كوسمەتولوگ بولسىن، شاشتاراز بولسىن،قاي-قايسىسىن زاڭ جۇزىندە جاۋاپقا تارتا الاسىز. وكىنىشكە قاراي، كوپ جاعدايدا كەلىنشەكتەر وسى ماسەلەنى ۇمىت قالدىرىپ جاتادى. دەسە دە ءقازىر كوپشىلىك سالوندا كەلىسىم-شارت تۋرالى انگىمە قوزعاۋدىڭ ءوزى ارتىق. رەسمي قۇجات تۇگىلى، مەديسينالىق انىقتاماسى دا جوق ماماندار قاراڭعى جەرتولەدە وتىرادى. ونىمەن قويماي، اقىسىن تولەسەڭىز قىزمەتتىڭ كەز-كەلگەن ءتۇرىن كورسەتۋگە دايىنبىز دەيدى. وسىنداي كۇماندى مامانداردىڭ كەسىرىنەن سوقىر بولىپ قالعان پاۆلودارلىق كەلىنشەك سول كۇيى كىنالىلەردى جاۋاپقا تارتقىزا العان جوق. ەڭ بولماسا ەمىنە دەپ اقشا دا ۇستاتپاعان. مۇنداي وقيعالار سوڭعى ۋاقىتتا ءتىپتى كوبەيىپ بارادى. ءبىراق ازىرگە ونداي سۇلۋلىق سالونى قىزمەتكەرلەرىن جاۋاپقا تارتاتىن بىردە ءبىر باپ جوق ەكەن.
سونىمەن بىرگە اجارلانامىن دەپ اجال قۇشقاندار دا از ەمەس. ورال قالاسىنىڭ ورتالىعىنداعى «زۆەزدا ۆوستوكا» سۇلۋلىق سالونىنىڭ جەرگىلىكتى قىز-كەلىنشەكتەرگە قىزمەت ەتىپ كەلە جاتقانىنا 10 جىلدىڭ ءجۇزى بولعان. الايدا ونىڭ اتاعى كەشەگى كۇنگە دەيىن ءدال بۇلاي جەر جارعان ەمەس. تۇراقتى كەلۋشىلەرىنىڭ ءبىرى بوتوكس ەكپەسىنەن كوز جۇمعاننان كەيىن بۇل سالون اينالاسى ەكى-ۇش كۇننىڭ ىشىندە عالامتور «جۇلدىزىنا» اينالىپ شىعا كەلدى. رەسەيدەن ارنايى شاقىرتىلعان ماماننىڭ كومەگىمەن اجارىن اشا تۇسكىسى كەلگەن ايجان جاقانوۆا ءۇش بالاپانى جەتىمەك اتانادى دەپ ويلاعان دا جوق ەدى.
بەيرەسمي ەسەپكە جۇگىنسەك، بۇگىندە قازاقستاندا ءاربىر 10-شى ايەل وسى ينەگە اۋەس كورىنەدى. سالا ماماندارىنىڭ پىكىرىنەن ۇققانىمىز، ءقازىر وتاندىق قىز-كەلىنشەكتەر ديدارىن ەكپەنىڭ كومەگىمەن ارلەندىرە ءتۇسۋ ءۇشىن مەديسينالىق ءبىلىمى جوق كوسمەتولوگتاردىڭ الدىنا بارۋدان دا جۇرەكسىنبەيتىن بولعان.
كوركىنە كورىك قوسىپ، سۇلۋلانا ءتۇسۋدى ارماندامايتىن ارۋ كەمدە كەم. ءبىرى كىرپىگىنە كىرپىك جالعايدى، ال ەندى ءبىرى سۋ تيسە دە وشپەيتىن بوياۋلار سالدىرتادى. تەك مۇنداي سۇلۋلىقتىڭ سوڭى سور بولىپ جابىسۋى ابدەن مۇمكىن. سوندىقتان دارىگەرلەر كوبىنە تەرىگە ءقاۋىپسىز ءارى پايدالى بال، قيار سەكىلدى تابيعي ونىمدەردى پايلدالانۋدى ۇسىنادى.
سايىن توعجان جۋرناليستيكا ماماندىعىنىڭ 3 كۋرس ستۋدەنتى
You Might Also Like
-
قازاق مادەنيەتىندە تويدىڭ ورنى ەرەكشە. «ومىرگە ءسابي كەلدى دەگەنشە، توي باستالدى دەسەيشى» دەسەك ارتىق ايتپايمىز.
-
تەحنولوگياداعى جەتىستىك ادامداردىڭ بىر-بىرىمەن ءوزارا قارىم-قاتىناستارىن وزگەرتتى. ادامدار كوبىنەسە بۇل دامۋدىڭ ءوزارا قارىم-قاتىناستارعا تەرىس اسەرىن تيگىزەتىنى تۋرالى پىكىرتالاستار جاسايدى. مەنىڭ و...
