InfoHub Logo

اكەسى قاراباتىر دۇنيە سالعان سوڭ شەشەسى قۇلاقايعا:

— ەلدى ارباپ، الداعانىڭدى قوي. ءوستىپ ءجۇرىپ ءبىر كۇنى بايلاردىڭ قولىنان ولەسىڭ، — دەپ جالىنادى.

— قويامىن، ەندى ەشكىمدى الدامايمىن، — دەپ اناسىنىڭ كوڭىلىن جىققىسى كەلمەگەن قۇلاقاي ەرىكسىز ۋادە بەرەدى.

— قاراعىم، مەنىڭ اقىلىما كونسەڭ، بوقباسار ءبيدىڭ اقىلىن ال! ءوزىم ەرتىپ اپارايىن، — دەپ اناسى سول كەزدەگى قالىڭ قاۋىمنىڭ سىيلىسى بولعان ەل اعاسىن اۋىزعا الادى.

— جارايدى، — دەپ قۇلەكەڭ وعان دا كونەدى.

— ونىڭ باتاسىن الۋ ءۇشىن ءبىر مال تابۋ كەرەك، — دەيدى اناسى.

— جارايدى، جول-جونەكەي بىردەڭە تابىلار، — دەيدى قۇلاقاي.

— قاراعىم-اۋ، الگىندە قويدىم دەگەنىڭ قايدا؟ تاعى بىرەۋدى الداپ العىڭ كەلىپ تۇر ما؟

— ال، الدامايىن، ءبىر جاقسى ات تابا قويىڭىزشى.

— ونى قايدان تابامىن، جارىعىم-اۋ!

— وندا مەنىڭ جولىما كولدەنەڭ تۇرماڭىز. ءجۇرىڭىز، كەتتىك.

— قايدا؟

— باتا الۋعا.

قۇلاقاي اناسىن ەرتىپ، ءبيدىڭ اۋلىنا كەلە جاتسا، جول جيەگىندە ءبىر تابىن سيىر جۋساپ جاتىر ەكەن.

— مىناۋ بوقباساردىڭ سيىرى عوي. اناۋ تارعىل وگىزدى ۇستا، — دەيدى قۇلاقاي قاسىنا ەرىپ جۇرگەن ءىنىسى بايدەككە.

— قوي، قاراعىم، تانىپ قويسا، ۇيات ەمەس پە؟ ءوز مالىن وزىنە اپارعانىمىز، — دەيدى اناسى.

— جوق، شەشە، مەن ەس بىلگەلى مەن ءوز مالىن ءوزى تانىعان باي كورگەم جوق.

بۇلار كەش باتا تارعىل وگىزدى جەتەكتەپ، ءبيدىڭ ۇيىنە كەلەدى.

بي:

— مىنا ءزالىم قايدان كەلىپ ەدى، ءبىر پالە شىعارماسا يگى ەدى،— دەپ، قۇلاقايدى قوي سويىپ، قوناق قىلادى. ەت جەلىنىپ بولعان سوڭ، قۇلاقاي بيدەن باتا سۇرايدى. بي ەسىك جاققا جالتاقتاي قاراپ، بىردەڭە دامەتكەندەي بولادى.

— جاساڭىز، جاساڭىز، بيەكە، تابارىگىڭىز دايىن، — دەيدى قۇلاقاي. سويتەدى دە بايدەككە «بار، الىپ كەل» دەگەندەي ىم قاعادى. بايدەك وگىزدى جەتەلەپ اكەپ، ەسىكتەن باسىن كورسەتەدى.

— مىنە، بيەكە، تابارىگىم — تارعىل وگىز، — دەپ قۇلاقاي قولىن جايادى.

— ە، باسە، — دەپ بي جىمىڭ-جىمىڭ قاعادى، — بۇل قۋ تاعى الداپ سوققالى وتىر ما دەپ ەم.

ول «ءبىسىميللا، راببيم» دەپ باتاسىن شۇبىرتىپ جاساي باستادى. باتا ءبىتىپ، بەت سيپاسقان كەزدە ءبيدىڭ ورتانشى ۇلى وسپان تۇرىپ:

مىناۋ ءوزى ءبىزدىڭ وگىزدەن اۋمايدى ەكەن، — دەسە كەرەك.

— ءا، سولاي ما، — دەيدى قۇلاقاي قۋلانىپ، — ول دا بىرەۋدىڭ تابارىككە بەرگەنى شىعار.

— ءيا، ءيا، تابارىككە كەلگەن. ءاۋمين، يگىلىككە ۇستاسىن، — دەپ بوقباسار بي ساقالىن سيپاپتى.

---