InfoHub Logo

مۇعاليما بۇل سىنىپقا جاڭادان كەلگەن ەدى. ول جاس ءارى جىگەرلى ۇستاز بولاتىن. جۇمىس ىستەگىسى كەلىپ قۇلشىنىپ تۇرادى. انىعىنا كەلگەندە، ول ۇستازدىق قىزمەتتى ەندى عانا باستاپ جاتقان جوق. مۇنىڭ الدىندا دا از-ماز تاجىريبەسى بولدى. دەگەنمەن وعان جاڭا ورتا دا، سىنىپ تا ءالى تولىق تانىس ەمەس ەدى. سويتسە دە مۇعاليما ءوز جۇمىسىنا ايرىقشا ءبىر ىقىلاسپەن كىرىسىپ كەتتى.

بىردە ول سىنىپپەن بىرگە كەش وتكىزگىسى كەلدى. كەشكە ءوز ويىنشا بالالاردىڭ اتا-انالارى دا قاتىسسا ەكەن دەپ تىلەدى. دالىرەك ايتقاندا، ولاردىڭ انالارى قاتىسسا ەكەن. سەبەبى مۇعاليمانىڭ ماقساتىندا كەشتىڭ تاقىرىبىن انا تاقىرىبىنا ارناسام دەگەن وي تۇرعان ەدى.

بىردە ول ءوز ويىن سىنىپقا وسىلايشا جەتكىزدى. كەشتى ءبارىمىز بىرگە وتكىزەمىز دەدى مۇعاليما. بۇدان ەشكىم دە تىس قالماق ەمەس. ال انالارىمىز قوناق بولىپ وتىرادى. بالالارعا بۇل وي بىردەن ۇناي قالدى.

- دەگەنمەن، - دەدى مۇعاليما. - كەشىمىزگە تاقىرىپ ويلاپ تابۋىمىز كەرەك. مەن مۇنى سەندەردىڭ وزدەرىڭنىڭ ويلانۋلارىڭا قالدىردىم. كىم كەشىمىزگە جاقسى تاقىرىپ ويلاپ تابادى ەكەن؟ مۇنى سەندەرگە مىندەتتەمەيمىن. ءوز ىنتالارىڭمەن كىرىسكەندەرىڭ جاقسى. ءبىز سوسىن ۇناعان تاقىرىپتى الىپ كەشىمىزدى سولاي اتار ەدىك. ءبىزدىڭ ءالى دە ۋاقىتىمىز بار. تاقىرىپ انا توڭىرەگىندە بولماق.

- تاقىرىپ سەندەردىڭ ءوز جۇرەكتەرىڭنەن شىعۋى كەرەك، - دەدى مۇعاليما تاعى دا. - ول ەش جەردەن كوشىرىلىپ الىنباۋى ءتيىس. ول ءتىپتى قاراپايىم ءسوز نەمەسە سويلەم بولسىن، سەندەردىڭ ءوز جۇرەكتەرىڭنىڭ ءسوزى بولعانى قاجەت. سەندەر مۇنى ءوز انالارىمىزعا ايتىپ جاتىرمىز دەپ سەزىنىڭدەر. وزگەنىڭ جۇرەگىندەگى ادەمىلىكتەن ءوز جۇرەگىڭدەگى قاراپايىمدىلىق الدەقايدا كوركەم ەستىلەدى. وسى باستان وسىعان داعدىلانىڭدار.

بالالار بۇل ىسكە قۇلشىنا كىرىسىپ كەتتى. مۇمكىن ولاردىڭ ءبارى دە ءوز جۇرەكتەرىندەگى ءسوزدى انالارىنا جەتكىزۋگە اسىققان شىعار. ولار ءار كۇن سايىن جۇرەكتەرىنەن شىققان تاقىرىپ رەتىندە الىنعان ءسوزدى ۇستازدارىنا سونداي ءبىر ەلگەزەك مىنەزبەن ۇسىناتىن. مۇعاليما ولاردى وقىپ كۇلىمسىرەپ تۇرادى. بالالار وزدەرى ويلاپ تاپقان تاقىرىپتىڭ قايسىسى اپايلارىنا كوبىرەك ۇنايدى ەكەن دەپ ىشتەي قوبالجىپ تا ءجۇردى.

سىنىپ وسى ءبىر ىسكە ىشكى جان-دۇنيەلەرىمەن بەرىلە كىرىسىپ كەتكەن ەدى. تەك ءبىر بالا عانا بۇعان اتسالىسقان جوق.

- سەن نەگە بۇعان اتسالىسپايسىڭ؟ - دەدى بىردە مۇعاليما ونىڭ جانىنا كەلىپ.

بالا ۇستازى جانىنا كەلگەندە ورنىنان تۇردى. كەنەت ول:

- مەنىڭ انام جوق...انام جوق...- دەدى بۋلىعا جىلاپ جىبەرىپ. - مەن تاقىرىپ ويلاپ تابا المايمىن.

ۇستاز ساسقالاقتاپ قالدى.

- سەنىڭ اناڭ دۇنيە سالعان با ەدى؟ - دەدى ول سىبىرلاعانداي ەتىپ سويلەپ.

بالا باسىن يزەدى.

مۇعاليمانىڭ الاقانى بەينە ءبىر شاكىرتىنىڭ باسىنان سيپاعىسى كەلگەندەي كوتەرىلە بەردى. وسى كەزدە بالا:

- ونىڭ ورنى بولەك ەدى، - دەدى بۋلىعا جىلاپ تۇرىپ.

بالانىڭ بۇل ءسوزدى جاسقا بۋلىعىپ ايتقانىنان مۇعاليما ەستي الماي قالدى.

- نە دەدىڭ؟ - دەدى ول شاكىرتىنە ەڭكەيە ءتۇسىپ.

- ونىڭ ورنى بولەك ەدى، - دەدى بالا.

"بولەك ەكەن عوي، - دەدى مۇعاليما ىشىنەن، - بولەك ەكەن".

- ال اكەڭ بار عوي؟

بالا باسىن يزەدى.

"دەمەك، اكە انانىڭ ورنىن تولتىرا المايدى ەكەن عوي".

كەنەت مۇعاليما سەرپىلىپ كەتتى.

- بالالار، - دەدى ول سىنىپقا ەستىلەردەي داۋىسپەن. - ءبىز انالارىمىزعا ارنالعان ءوز كەشىمىزدىڭ اتىن "ورنى بولەك جان" دەپ اتاساق قايتەدى؟ شىنىندا دا، ءبىزدىڭ بارىمىزگە دە انالارىمىزدىڭ ورنى ايرىقشا بولەك قوي.

بالالار بۇعان ءبىراۋىزدان كەلىستى.

"ونى كەشكە اتسالىستىرۋىم كەرەك، - دەدى مۇعاليما. - مۇمكىن وعان جۇرگىزۋشىلىكتىڭ ءبىرىن ۇسىنارمىن. بالالار ءوز كەشتەرىن وزدەرى جۇرگىزەدى عوي.
ءبارى دە مۇمكىن".

مۇعاليما قىز الدەنەگە جانى اۋىرعانداي ەرنىن تىستەلەپ ويلانىپ قالدى.

---