InfoHub Logo

ءارقايسىمىز ءوز ءۇيىمىزدى جاقسى كورەمىز. دەگەنمەن ارتىق جيھاز، جيعان-تەرگەن زاتتار، بۇيىمدار مەن كيىم-كەشەك ونسىز دا تار بولمەنى ودان سايىن تارىلتادى. Bilim-all.kz بولمە اۋدانىن ءبىراز كەڭەيتۋ ءۇشىن ينتەرەردى ۇيلەستىرۋ كەزىندە نەندەي قۋلىقتاردى ەسكەرۋ كەرەك ەكەنىن ايتادى.

بەتى اينامەن قاپتالعان جيھاز

^{mebelvs / susandianaharris}

شكاف-كۋپەگە كىرىكتىرىلگەن اينالار بولمەگە تەرەڭدىك بەرىپ، ونى جارقىن ءارى كەڭ ەتەدى. ەڭ باستىسى، اسىرا سىلتەپ، كوپ اينا ورنالاستىرۋدىڭ قاجەتى جوق، ايتپەسە بولمەڭىز بي الاڭىنا اينالىپ كەتۋى مۇمكىن.

 

قابىرعالاردىڭ اشىق ءتۇسى

^{foto-remonta / penza.online-interiors}

قوشقىل جىلى ءتۇستى ءتۇسقاعازدار مەن بوياۋلار ءبىر قاراعاندا بولمەنى جايلى ەتىپ كورسەتەدى، الايدا شىن مانىندە ولار قۇندى كەڭىستىكتى ۇرلايدى. مۇنداي تۇسپەن بولمەلەرى كوپ، كەڭ ءۇي يەلەرى بوياي الادى. ەگەر ءسىزدىڭ ءۇيىڭىز ونداي بولماسا، اشىق كوك، اشىق سۇر، اق تۇستەردى تاڭداڭىز.

 

اينەك جيھاز

^{meb-mig / neo-furniture}

اينەك جيھاز – عاجايىپ قۇرال: ول ءبىر جاعىنان بار سياقتى، ءبىر جاعىنان جوق سياقتى. بۇل اسىرەسە كىشكەنتاي بولمەلەر نەمەسە تار اس ۇيگە وتە ىڭعايلى. اينەكتەن جاسالعان قۇرالدار ينتەرەردى جەڭىل ءارى سالماقسىز ەتەدى. ال ساپاسى مەن فۋنكسيونالدىلىعى جاعىنان زور اعاش جيھازدارىنان كەم ەمەس.

 

جازىلمالى ديۆان

^{psdesigno / decoactual}

جۇمساق توسەكتە دەمالعىسى كەلمەيتىن ادام جوق شىعار. ءبىراق ءۇيى تار ادامدار مۇنداي استامدىققا بارا المايدى. الايدا كوڭىل ءتۇسىرۋدىڭ قاجەتى جوق – جايىلمالى ديۆان ءداۋ توسەكتىڭ ورنىن باسا الادى. بۇل عاجايىپ زات كەڭىستىكتى بوساتىپ قانا قويماي، جاتىپ دەمالۋعا دا وتە ىڭعايلى.

 

جەڭىل ماتەريالداردان پەردەلەر

^{syndyk / vdomax}

بولمە كەڭىرەك كورىنۋى ءۇشىن بولمەگە كۇن ساۋلەسى كەدەرگىسىز تۇسكەنى ابزال. سول سەبەپتى اشىق ءتۇستى جەڭىل ماتالاردان تىگىلگەن پەردەلەر پايدالانعان ءجون. ال قوشقىل بارقىت شىمىلدىقتار جايلى ۇمىتۋ كەرەك.

 

جارىقتاندىرۋ

^{fotodekora / nohomedesign}

جاساندى جارىقتاندىرۋ دا بولمە كەڭىستىگىن كەڭەيتۋدە ماڭىزدى ءرول اتقارادى. مۇندا ەرەجەلەر قاراپايىم: جارقىراعان جارىق بارىنشا كوبىرەك ءتۇسۋى كەرەك. اسپاشامدار، سانساۋلە، برا – بارلىعى ىسكە جارامدى. ەڭ باستىسى، ولار بولمەنىڭ جالپى ستيلىمەن ۇيلەسۋى ءتيىس. سونىمەن قاتار توبەنى اينالدىرا جارىقتاندىرۋ دا تاماشا شەشىم بولار ەدى.

 

بارىنشا ارتىق بولشەكتەردى ازايتۋ

^{housesdesign / interiordesignforhouses}

ءار ۇيدە ىسكە جارامسىز كادەسىيلار، ۆازالار، بۇرىن وقىلعان جۋرنالدار مەن وزگە دە زاتتار بوس ورىندى الىپ تۇرادى. قاجەت ەمەس زاتتاردان قۇتىلۋ ارقىلى ءسىز جانە قوناق بولمەڭىز كەڭ تىنىستاپ قالاسىز.

 

شكافتار

^{fasonmebel / design96}

ەگەر كادەسىيلار مەن ۇساق-تۇيەك بۇيىمشالاردى تاستاۋعا قيماساڭىز، ولاردى تىعىپ قويۋعا بولادى. ءتۇسى مەن ءتۇرى اينالاداعى ينتەرەرمەن ادەمى ۇيلەسەتىن شكاف بولمەنى بەزەندىرىپ قانا قويماي، ونى بارىنشا اشىق جانە كەڭ ەتەدى. ال سىزگە قىمبات زاتتار ءاردايىم قول جەتىمدى جەردە ءارى كوپشىلىكتىڭ نازارىنان تىس بولادى.

 

ءفوتوتۇسقاعازدار

^{ideaonline / rekvartal}

«ءفوتوتۇسقاعازدار — بۇل وتكەن عاسىر» دەپ ەسەپتەيتىندەر بار. شىن مانىندە ولاي ەمەس. ساۋاتتى تاڭدالعان سۋرەت بولمەنىڭ كوركىن اشىپ قانا قويماي، سىرت كوزگە بولمەنىڭ اۋدانىن كەڭەيتەدى. نازار اۋدارىڭىز: ويلاعانىڭىز ىسكە اسۋى ءۇشىن ءفوتوتۇسقاعازدار كورىنىستى اشۋى كەرەك جانە بولمەنىڭ ورتاڭعى ەلەمەنتىنەن تىسقارى ورنالاسۋى كەرەك. وسىنداي ديزاينەرلىك تاپقىرلىقتىڭ ارقاسىندا جاتىن بولمەڭىزدە قاراعاي ورمانىن «جايقالتىپ»، پاريجدىك كوشەنى «تۇرعىزۋعا» بولادى.

 

كوپدەڭگەيلى توبەلەر

^{homedesigns / stroystory}

بولمەڭىزدىڭ توبەسى توبەڭىزدەن باسىپ تۇرعانىن قالاماساڭىز، ونى قايتا قۇرىڭىز. بىرنەشە دەڭگەي قوسۋ ارقىلى توبەنى سىرت كوزگە بىرنەشە مەترگە كوتەرۋگە بولادى. ال بولمەگە ەرەكشەلىك بەرۋ ءۇشىن قوشقىل، اشىق نەمەسە اق تۇستەردى ۇيلەستىرىپ، توبەنى ءارتۇرلى تۇستەرمەن ارلەڭىز، سونىمەن قاتار ەرەكشە ءپىشىندى شامشىراقتار پايدالانىڭىز.

 

شاعىن جيھاز

^{kijashi / abledesign}

ءبىر بولمەلى پاتەردەگى سالتاناتتى ۆەليۋر ديۆاندار مەن التىن ۆەنزەلدى كرەسلولاردىڭ داۋرەنى ءوتتى. ءبىراق كەيبىرەۋلەر ءالى كۇنگە دەيىن زور جيھازداردى ءتورت قابىرعاعا سيدىرۋعا تىرىسىپ قاتتى قاتەلەسەدى. ەگەر ۇيگە ءجيى قوناق كەلەتىن بولسا، بىرنەشە ۇلكەن ديۆانداردى ءبىر بۇرىش ديۆانعا الماستىرىڭىز. سوندا بارىنە ورىن جەتەدى، كەڭىستىك تە تارىلمايدى.

 

قابىرعاداعى كارتينا

^{sklarfurnishings / designlinesltd}

بىرنەشە ولشەمدى قابىرعاداعى سانسىز كارتينالار بولمەدە ىعى-جىعى كورىنەدى، ادامداردىڭ كوڭىلىن بولەدى جانە بولمەنىڭ اۋدانىن تارىلتادى. ودانشا بىرەۋىن، ءبىراق ەڭ ادەمىسىن تاڭداڭىز. قوناق بولمەنى كوركەم جانە ءىرى سۋرەتپەن بەزەندىرۋ ارقىلى ءسىز ونىڭ ەرەكشەلىگىن ايقىنداپ، بولمەڭىزدى بوس ءارى كەڭ ەتەسىز.

---