InfoHub Logo

اتا-بابامىزدىڭ اڭساۋىمەن، ەر جۇرەكتى اعا-اپالارىمىزدىڭ قايسارلىعىمەن، قانىمەن، جانىمەن  كەلگەن  كيەلى تاۋەلسىزدىگىم!  ەگەمەن ەل بولىپ، ەسىمىزدى جيعالى كوزدى اشىپ-جۇمعانشا 30 جىل دا وتە شىعىپتى. بۇگىندە تاۋەلسىزدىك قۇرداستارى وي-ساناسى تولىسقان، وردا بۇزار 30-عا دا كەلدى. 30 جىل – از ۋاقىت ەمەس. 30 جىلدا ءبىز قانداي جەتىستىكتەرگە جەتتىك؟ ەلدىگىمىزدى نىعايتا ءتۇسۋ ءۇشىن تاعى نە ىستەي الامىز؟ دەگەن ساۋالدار ءاربىرىمىزدى تولعاندىرادى.

تاۋەلسىزدىك بىزگە وڭايلىقپەن كەلمەدى. تاريحقا كوز جۇگىرتسەك، قازاق ەلىنىڭ سوعىسسىز، شايقاسسىز وتكەن كۇنى بولماعان. سوناۋ اقتابان شۇبىرىندىدان باستاپ، كەشەگى 1986 جىلعى جەلتوقسان وقيعاسىنا دەيىن قازاعىم ءوز جەرىندە باسىن تومەن ءتۇسىرىپ  ءومىر ءسۇرىپ كەلدى. «بۇگىندە ءبىزدىڭ تاۋەلسىزدىگىمىزدىڭ قاينار كوزى- قازاق حالقىنىڭ سان عاسىرلار بويعى كۇرەسىندە، ازاتتىققا ۇمتىلعان قايسارلىعىندا جاتىر» دەپ ەلباسىمىز ايتقانداي، سول سىندارلى ۋاقىتتا  قايسار اعا-اپالارىمىز ەلىم دەپ، جەرىم دەپ شىرىلداپ، جاندارىن اياماي كوتەرىلىسكە شىقپاعاندا تاۋەلسىزدىككە قول جەتكىزە الماس ەدىك.  سوندىقتان ازاتتىق جولىندا قانىن توگىپ، جانىن بەرگەن اتا-بابا اماناتى- تاۋەلسىزدىگىمىزدى قاستەرلەۋ، باعالاۋ ءاربىر قازاقستاندىق ازاماتتىڭ پارىزى.

بۇگىنگى تاڭدا، قازاقستاننىڭ وزىندىك ءۇنى، مارتەبەسى بار. ءبىز الەمدىك دەڭگەيدە اياعىمىزدى نىق، سەنىمدى باسىپ، ەلىمىزدى باسقا ەلدەرگە مىقتى مەملەكەت رەتىندە تانىتا الدىق.  دۇنيە كەرەمەت وزگەرۋ جولىندا، ءبىراق ءبىز ۇلتتىق  يدەيانى ساقتاپ، تاريحي مۇرا، قۇندىلىقتاردىڭ قاسيەتىن جوعالتپاي كەيىنگى ۇرپاققا امانات ەتۋىمىز كەرەك.

مەنىڭشە، وسىنداي حالگە جەتۋىمىز قۇدايدىڭ بىزگە بەرگەن سىيى، مەيىرىمى، اماناتى دەپ ەسەپتەيمىن. ءبىز ءوز ۇلتىمىزدىڭ، مەملەكەتىمىزدىڭ تاريحىن ەرەكشە قادىرلەپ، ساقتاۋىمىز كەرەك.

وماروۆا ىرىستى
كەشكى (اۋىسىمدى) مەكتەپتىڭ
قازاق ءتىلى مەن ادەبيەتى ءپانى ءمۇعالىمى

 

---